جاقىندا «ماتەماتيكالىق جانە كومپيۋتەرلىك مودەلدەۋ ماسەلەلەرى» اتتى رەسپۋبليكالىق عىلىمي سەمينار ءوتتى. وعان قازاقستاندىق ماتەماتيكا بىرلەستىگى, ەلىمىزدىڭ ۇلتتىق ينجەنەرلىك اكادەمياسى مەن عىلىمي جانە تەحنولوگيالىق ۇيىمدار قاۋىمداستىعى ۇيىتقى بولدى. سەمينارعا اكادەميك, قازاقستاندىق ماتەماتيكا بىرلەستىگىنىڭ پرەزيدەنتى باقىتجان جۇماعۇلوۆ جەتەكشىلىك ەتتى.
بۇل سەميناردى ءداستۇرلى دەۋگە بولادى. توقسانىنا ءبىر رەت وتكىزىلەدى. وندا ماتەماتيكالىق مودەلدەۋ ماسەلەلەرى, شەشۋ جولدارى, ساندىق ادىستەر مەن الگوريتمدەردىڭ دامۋى, كومپيۋتەرلىك جانە اقپاراتتىق جۇيەلەر, باسقا دا ەسەپتەۋىش, اقپاراتتىق تەحنولوگيالار قاراستىرىلادى.
وسى جولعى سەميناردىڭ ءبىرىنشى وتىرىسىندا ماتەماتيكالىق جانە كومپيۋتەرلىك مودەلدەۋدىڭ جاي-كۇيى تۋرالى فيزيكا-ماتەماتيكا عىلىمدارىنىڭ دوكتورى, پروفەسسور ءۋاليحان ابدىبەكوۆ بايانداماسى تىڭدالدى.
سونىمەن قاتار, رعا ءسىبىر ءبولىمى ەسەپتەۋىش تەحنولوگيالار ينستيتۋتىمەن بايلانىس جاساۋ كەڭىنەن ايتىلدى.
الداعى جىلى استانا قالاسىندا وتەتىن تۇرىك الەمى ماتەماتيكتەرىنىڭ VI حالىقارالىق كونگرەسىن وتكىزۋگە دايىندىق تا قاراستىرىلدى. وسى كونگرەسس قۇرىلعان ساتتەن باستاپ ول جاھاندىق پىكىرسايىس الاڭىنا اينالىپ, جاڭا يدەيالاردىڭ شوعىرلانۋىنا ىقپال ەتكەنىن اتاپ ايتقانىمىز ءجون.
2018 جىلى برازيليانىڭ ريو-دە-جانەيرو قالاسىندا وتەتىن حالىقارالىق ماتەماتيكتەر كونگرەسىنە قازاقستاندىق ماتەماتيكتەردىڭ دە قاتىسۋى ماڭىزدى ماسەلە بولىپ تابىلاتىنى حاق. بۇل كونگرەسكە قاتىسۋعا اكادەميك تىنىسبەك كالمەنوۆ باستاعان ماتەماتيك عالىمدار ۇسىندى.
سەميناردىڭ قورىتىندىسىندا اكادەميك باقىتجان جۇماعۇلوۆ قازاق ەلى بويىنشا ماتەماتيكا جانە كومپيۋتەرلىك مودەلدەۋ سالاسى بويىنشا ساپالى كادرلاردى دايىنداۋ, ولاردىڭ الەۋەتىن كوتەرۋ, حالىقارالىق بايلانىستى نىعايتۋ, سونىمەن قاتار, وتاندىق عالىمداردىڭ زەرتتەۋ جۇمىستارىنىڭ ناتيجەلەرىن گاز-مۇناي, ەكولوگيا جانە باسقا سالالاردا دا وندىرىسكە ەنگىزۋدى ءتيىمدى پايدالانۋ قاجەت ەكەندىگى تۋرالى باسا ايتتى. سەمينارعا قاتىسقان عالىم-ماتەماتيكتەر ءبىراۋىزدان عىلىم مەن ءوندىرىستى ۇشتاستىرۋ تۋرالى ورتاق بايلامعا كەلىپ, ۇسىنىس-پىكىرلەرىن ورتاعا سالدى.
سۇلەيمەن مامەت,
«ەگەمەن قازاقستان»