ەلدىڭ باياعى ساۋمال پاتريوتتارىنىڭ «بابامىزدىڭ «اق بىلەگىنىڭ كۇشىمەن, كوك نايزاسىنىڭ ۇشىمەن» قالعان كيەلى جەرى ساۋداعا تۇسكەلى جاتىر» دەگەن داڭعازالى داۋرىعۋى ەل اراسىنا تەز تاراپ, ورىنسىز رەنىشكە جەل بەرگەندەي بولدى. ال شىنداپ كەلسەك, تۋعان حالقىمىز ءۇشىن جەرىمىزدىڭ كيەلى ەكەندىگى دە, سول جەرى ءۇشىن قانشاما سۇرگىن شايقاستاردىڭ وتكەندىگى دە, بابالارىمىزدىڭ قاسيەتتى قانىنىڭ توگىلگەندىگى دە اقيقات قوي. ولاي بولسا, سول كىندىك قانىمىز توگىلگەن ۇلى دالامىزدىڭ داۋ-دامايعا سەبەپ بولۋى جۇرتىمىزدى جاڭىلىستى قادامعا جەتەلەگەندىگىن جاسىرىپ قالماساق كەرەك. الايدا, نارىقتىق قاتىناستىڭ قاتال زاڭىن سارالاي الساق كولدەنەڭ كوك شىبىقتىڭ دا تەگىن, تەككە جاتپايتىندىعىنا كوز جەتكىزدىك ەمەس پە. ەندەشە, جەر دە ءوز حالقىمىزعا قىيامەت ەتىپ, باياندى, باقۋاتتى تۇرمىسىنىڭ قاينار كوزىنە اينالسا نەسى ايىپ.
مەن اگرارلى, استىقتى ءوڭىردىڭ بالاسىمىن. كەڭەس داۋىرىندە جەردىڭ ۇلتاراقتاي كولەمىنە دەيىن كادەگە استى. ميلليون پۇتتاپ استىق بەردى. ەندى مىنا جەكەشەلەندىرۋ كەزىندە سول جەردىڭ دەنى يەسىز قالدى, جۋسان مەن قىزىل قۋرايدىڭ استىندا جاتىر. باياعى شارۋا وزىنە تيەسىلى جەرىن جەتىمسىرەتتى, يە بولا المادى. جەكەلەگەن لاتيفۋنديستەردىڭ جەمساۋلارىن پايعا العان جەرلەرىن تىعىنداۋمەن وتىر. وسى كەلىسىمسىز جاعدايعا ءوزىمىز كىنالى بولماساق, كىمدى كىنالايمىز. جۇمىستىڭ ىڭعايىنا كوشىپ, قىبىن تاپقاندار جەر سۇمەسىن ەمىپ, بايىپ جاتىر. ال يكەمسىز, جەر قادىرىن قاشىرعاندار تاقىر كەدەيگە اينالۋدا. بۇعان دا بىرەۋدى ايىپتايمىز با؟ سوندىقتان پرەزيدەنتىمىز ايتقانداي, «ءبىزدىڭ مىندەت – جەردىڭ مەنشىك يەسى بولىپ, ونىڭ دۇرىس پايدالانۋى ءۇشىن قازاقستان ازاماتتارىنا جەردى جەكەشەلەندىرۋ مۇمكىندىگىن بەرۋ. جەر قۋراي باسىپ, يەسىز جاتپاي, تۇسىنىكسىز ماقساتقا پايدالانىلماي, حالىقتىڭ يگىلىگىنە اينالۋى كەرەك».
مەنىڭشە, ايتىلعان پىكىر ەش بۇلتاقسىز, ورنىقتى, ورىندى ايتىلعان ايقىن تۇجىرىم.
جاسىراتىنى جوق, ءاۋ باستا جەردى جالعا بەرۋ, ساتۋ سياقتى شەتىن ماسەلەنى بۇلتاقسىز ايقىن ءتۇسىندىرۋ جەتپەي جاتتى. بۇل بوستەكى سوزگە جول اشىپ, الىپقاشپا داۋ-دامايعا الىپ كەلدى.
مەن دە ءوز ەلىمنىڭ, ءوز جەرىمنىڭ پەرزەنتى بولعاندىقتان بۇل ماسەلەگە نەمقۇرايدى قاراي المايمىن. سول سەبەپتى دە, ماسەلەنىڭ بايىبىنا بارىپ, سارابدال سابىرلىلىققا ۇندەگىم كەلەدى.
ءبىز ءۇشىن تاپ قازىر ورىنسىز داۋ-دامايدان گورى تىنىشتىق, تۇسىنىستىك قىمبات. تاۋەلسىز مەملەكەتىمىزدىڭ باستى مۇددەسى دە وسىعان سايادى. ال تۋعان جەردىڭ ءار سۇيەمى باعا جەتپەس بايلىق, ۇلى كيەمىز ەكەندىگىندە داۋ جوق قوي.
تولەگەن قاجىباي,
جازۋشى, قازاقستاننىڭ ەڭبەك سىڭىرگەن مادەنيەت قىزمەتكەرى
كوكشەتاۋ