شىمكەنتتىڭ «ورداباسى» فۋتبول كلۋبى ەلەكتروندى ساۋدا الاڭىندا 156,9 ملن تەڭگەگە ساتىلىپ, جەكە مەنشىككە ءوتتى. بۇل سوما كلۋبتىڭ باعالاۋ قۇنىنان شامامەن 30 پايىزعا تومەن, دەپ حابارلايدى Egemen.kz.
16 ماۋسىم كۇنى e-qazyna پورتالىندا اۋكتسيون ۇيىمداستىرىلدى. وعان ءبىر عانا قاتىسۋشى ءوتىنىم بەرگەندىكتەن, كلۋب سول جالعىز ۇمىتكەرگە ساتىلدى. ساتىپ الۋ باعاسى 156 913 355 تەڭگەنى قۇرادى, بۇل باستاپقى باعادان نەبارى 1 مىڭ تەڭگەگە جوعارى. ازىرگە جاڭا مەنشىك يەسىنىڭ ەسىمى جاريالانعان جوق.
نىساندى ساتۋشى رەتىندە شىمكەنت قالاسىنىڭ قارجى باسقارماسى ارەكەت ەتسە, كلۋبتىڭ يەسى شىمكەنت قالاسىنىڭ دەنە شىنىقتىرۋ جانە سپورت باسقارماسى بولعان.
ايتا كەتەيىك, بۇعان دەيىن كلۋب 2026 جىلعى 28 مامىردا 224,1 ملن تەڭگە باستاپقى باعامەن ساۋداعا شىعارىلعان ەدى. الايدا ساتىپ الۋشىلاردىڭ بولماۋىنا بايلانىستى اۋكتسيون وتپەي قالدى. كەيىن قايتا ۇيىمداستىرىلعان ساۋدادا باستاپقى باعا 30 پايىزعا تومەندەتىلىپ, 156,9 ملن تەڭگە بولىپ بەلگىلەنگەن.
«اتىراۋ» فۋتبول كلۋبىنىڭ جاڭا يەسى انىقتالدى
وسى جىلدىڭ اقپان ايىندا شىمكەنت اكىمدىگى مەن «Integra Construction KZ» جشس اراسىندا «ورداباسىنى» جەكەشەلەندىرۋگە قاتىستى مەموراندۋم جاسالعانى حابارلانعان بولاتىن. كومپانيانىڭ بەنەفيتسيار يەسى – كاسىپكەر شاحمۇرات ءمۇتالىپ.
مەموراندۋمعا سايكەس, جاڭا ينۆەستور كلۋبتىڭ تۇراقتى دامۋىن قامتاماسىز ەتىپ, ينفراقۇرىلىمدى جاڭعىرتۋعا, جاس فۋتبولشىلاردى دايارلاۋعا جانە باسەكەگە قابىلەتتى كوماندا قالىپتاستىرۋعا كوڭىل بولۋگە ءتيىس. سونداي-اق باسقارۋ پروتسەستەرىن تسيفرلاندىرۋ مەن كلۋبتىڭ كوممەرتسيالىق تيىمدىلىگىن ارتتىرۋ مىندەتى قويىلعان.
«ورداباسى» – قازاقستان پرەمەر-ليگاسىندا ونەر كورسەتەتىن شىمكەنت قالاسىنىڭ باستى فۋتبول كلۋبى. كوماندانىڭ تاريحى 1976 جىلى قۇرىلعان «مەليوراتور» ۇجىمىنان باستاۋ الادى. كەيىن كلۋب «جىگەر», «دوستىق» اتاۋلارىمەن ونەر كورسەتىپ, 2002 جىلدان بەرى «ورداباسى» اتاۋىمەن بەلگىلى.
«استانا» فۋتبول كلۋبىنىڭ باس ديرەكتورى قىزمەتىنەن كەتتى
كلۋب ءوز تاريحىندا 2011 جىلى قازاقستان كۋبوگىن, ال 2012 جىلى قازاقستان سۋپەركۋبوگىن جەڭىپ العان. سونىمەن قاتار 2023 جىلى قازاقستان پرەمەر-ليگاسىنىڭ چەمپيونى اتانعان.
ەسكە سالايىق, شىمكەنتتىك «ورداباسى» فۋتبول كلۋبىنىڭ پرەزيدەنتى دارحان قىزايباەۆ كوماندانىڭ رەسمي اتاۋىن وزگەرتۋ جانە اۋقىمدى رەبرەندينگ جۇرگىزۋ جوسپارى تۋرالى مالىمدەدى.