اراب الەمىنىڭ باس باسىلىمى

 وسى گازەتتەگى ارىپتەستەرىمىز قازاقستاندى «ورتالىق ازيانىڭ جۇرەگىن ۇستاپ تۇرعان قىران» دەپ باعالايدى ەكەن

بۇدان بۇرىن حابارلاعانىمىزداي, جاقىندا, ءحىىى ەۋرازيالىق مەديا فورۋمعا كەلگەن قوناقتار قاتارىندا بولعان مىسىر ەلىنىڭ ەڭ ۇلكەن گازەتى «ءال-احرام» مەديا-حولدينگى باسقارماسىنىڭ توراعاسى احمەد ءاس سايد ءان ناگگار «ەگەمەن قازاقستان» گازەتىنىڭ رەداكتسياسىنا كەلىپ, ارىپتەستەرىمەن كەزدەس­كەن ەدى. كەزدەسۋدى «ەگەمەن قازاقستان» رەسپۋبليكالىق گازەتى» اق باسقارما توراعاسى ەركىن قىدىر اشىپ, جۇرگىزىپ وتىردى. سونداي-اق, كەزدەسۋگە مىسىر اراب رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى حايسام سالاح كامەل يبراھيم قاتىستى. – احمەد ءان ناگگار قازاقشاعا اۋدارعاندا «پيراميدا» دەپ اتالاتىن «ءال – احرام» گازەتىنىڭ كۇنىنە 900 مىڭ دانامەن ەكى رەت شىعىپ, تارايتىنىن جەتكىزدى. ونىڭ اعىلشىن, فرانتسۋز تىلدەرىندەگى نۇسقالارى دا قاتار تارايتىن كورىنەدى. بۇل مىسىردا عانا ەمەس, ءيسى اراب الەمىندەگى ەڭ كوپ جانە 140 جىلدان بەرى شىعىپ كەلە جاتقان بايىرعى باسىلىم. وندا 16 مىڭ قىزمەتكەر ەڭبەك ەتەدى. نەگىزگى گازەتكە قوسىمشا رەتىندە شاعىن تيراجبەن تاعى دا اپتالىق جانە اي سايىنعى 15 گازەت پەن جۋرنال شىعارادى. مەديا-حولدينگتىڭ قۇرامىندا 3 ساياسي-ستراتەگيالىق زەرتتەۋ ينستيتۋتتارى بار. اتاپ ايتار بولساق, ولار امەريكا, ەۋروپا جانە ازيا ەلدەرىنىڭ ساياسي, ەكونوميكالىق دامۋ باعىتتارىن زەرتتەپ, وزدەرىنىڭ تۇجىرىمدارىن گازەتكە بەرىپ وتىرادى. ازيا ەلدەرى ينستيتۋتىنىڭ ىشىندە تۇركىتىلدەس ەلدەرمەن, سونىڭ ىشىندە قازاقستانمەن تىكەلەي اينالىساتىن باسقارما بار. الەمدىك ساراپشىلار رەيتينگى بويىنشا وسىنداي ىستەردى زەرتتەۋگە قاتىساتىن بارلىق 500 ۇيىمنىڭ ىشىندە ءبىزدىڭ ورتالىقتارىمىز 20-شى ورىن الادى. سونىمەن قاتار, ءبىزدىڭ حولدينگىمىزدىڭ فارماتسەۆتيكالىق پرەپاراتتار, كەڭسە تاۋ­ارلارى, كومپيۋتەرلىك ديسكىلەر, قاعاز ونىمدەرىن دايىندايتىن زاۋىتتارى مەن تسەحتارى بار. وسىنىڭ ۇستىنە بيىل ءبىز قاعاز جانە كارتون شىعاراتىن جاڭا زاۋىت سالۋدى قولعا الىپ جاتىرمىز. بۇل زاۋىت قىتايلىق ارىپتەستەرىمىزبەن بىرلەسە وتىرىپ قولعا الىنعان, – دەدى احمەد ءان ناگگار ءوزىنىڭ مەديا-حولدينگ تۋرالى قىسقاشا سوزىندە. ءسويتىپ, «ءال-احرامنىڭ» ءباسپاسوز قۇرالى عانا ەمەس, پيراميدا دەگەن اتىنا زاتى ساي تۇتاستاي مەديا-يمپەريا ەكەندىگى بەلگىلى بولدى. وسىدان ءارى ەگەمەندىكتەر قوناقتى ءتۇرلى سۇراقتاردىڭ استىنا الدى. قاعاز شىعارۋمەن اينالىسىپ جاتقاندارىنا قاراعاندا ونىڭ تاپشىلىعى سەزىلىپ, وسى ۋاقىتقا دەيىن قاعازدى قايدان الاسىزدار دەگەن سۇراققا, ونى نەگىزىنەن رەسەي فەدەراتسياسىنان جانە از مولشەرىن فينليانديادان جەتكىزەتىندىكتەرىن ايتتى. اراب الەمىندە كاتاردىڭ «ءال-جازيرا» اگەنتتىگىمەن سالىستىرعانداعى گازەتتىڭ وتىمدىلىك رەيتينگى قانداي ءدا­رەجەدە دەگەن سۇراققا قوناق ءبىرشاما كىر­بىڭدەۋ كوڭىلمەن جاۋاپ بەرە باستادى. سوعان قاراعاندا بۇل ەكى باق ءوزارا باسەكەلەس ەكەندىگى سەزىلىپ تۇردى. احمەد ءان ناگگاردىڭ ايتۋىنا قارا­عاندا, «ءال-احرام» قاعازعا شى­عاتىن گازەتتەن باسقا 32 ەلەكتروندىق نۇسقامەن تارايدى ەكەن. بىزدەن «ءال-جازيرانىڭ» ارتىقشىلىعى تەك سول, وندا تەلەارنا بار. ءبىز دە الداعى ۋاقىتتا تەلەنۇسقانى شىعارۋعا دايىندالىپ ءجۇرمىز. تەحنيكالىق مۇمكىنشىلىكتەردەگى ايىرماشىلىعىمىز وسى عانا. ال حالىق­قا ۇسىناتىن ماتەريالدارىمىزدىڭ شىنشىلدىعى مەن وتكىرلىگىنە كەلەتىن بولساق, ايىرماشىلىعىمىز كوپ. «ءال-جازيرا» الدىمەن اقپاراتتىق ارنا رەتىندە اشىلعان. بىراق ولار اقپاراتتاردى بۇرمالاپ, وزدەرىنىڭ تاپسىرىس بەرۋشىلەرىنىڭ ىڭعايىنا كەلتىرەتىن بولدى. بۇل جەردە ولار كەيبىر ساياسي كۇشتەردىڭ قولشوقپارىنا اينالدى دەسەك ارتىق ەمەس. بۇگىنگى تاڭدا بارلىق اراب الەمى «ءال-جازيرانىڭ» وسىن­داي ماقساتتى كوزدەيتىنىن ءبى­لىپ, ونىڭ حابارلارىنا ساقتىقپەن قارايدى جانە ونى ادىلەتتى اقپارات كوزى دەپ سانامايدى. بىراق ەۋروپالىق تىڭدارماندار «ءال-جازيرانىڭ» تۇپكى ماقساتىن بىلمەگەندىكتەن, وكىنىشكە وراي, ونىڭ حابارلارىنا قۇلاق تۇرەدى. سوندىقتان, اراب الەمى مەن ەۋروپانىڭ كوپتەگەن تالعامپاز وقىرماندارى ءبىزدىڭ گازەتىمىزدىڭ اقپاراتتارىنىڭ ادىلەتتى ءارى شىنشىل ەكەنىن بىلەدى. ويتكەنى, ءبىزدىڭ باسىلىم ەشقانداي ساياساتقا ارالاسپاي, تاۋەلسىز, شىنايى جانە اشىق حابار عانا تاراتادى. سونىمەن قاتار, ءبىز تاۋەلسىز ءباسپاسوز رەتىندە ءوز ەلىمىزدىڭ باسشىسى تۋرالى ادىلەتتى اقپاراتتاردى اشىق تاراتا بەرەمىز. ەگەر ءبىزدىڭ پرەزيدەنتىمىزدىڭ ءىس-ارەكەتىندە زاڭ بۇزۋشىلىقتار نەمەسە مەملەكەت پەن حالىق مۇددەسىن اياققا باسۋشىلىق بولسا اشىق سىنايمىز. ونىڭ ۇستىنە پىكىر الۋاندىعى بولۋىن ۇنەمى ەسكەرىپ وتىرامىز. ال «ءال-جازيرا» ەشقاشان دا كاتاردىڭ حانزاداسىن سىناي المايدى, ويتكەنى, اگەنتتىكتى قارجىلاندىراتىن سونىڭ ءوزى. مىنە, وسىدان-اق ەكى باق-تاعى دەموكراتيانىڭ قانشالىقتى دارەجەدە ەكەنىن وزدەرىڭىز باعامداي بەرىڭىزدەر, دەدى احمەد ءان ناگگار. ءسوز بوستاندىعى دەگەن الدىمەن ءوز بيلەۋشىڭە قاتىستى بولۋى كەرەك قوي. وزگە ەلدىڭ باسشىلارىن سىناۋ وڭاي, ەگەر سەن ناعىز دەموكراتياشىل بولساڭ – ءوز ەلىڭنىڭ باسشىسىن سىنا, سوندا عانا سەندەردە ءسوز بوستاندىعى بار دەگەن ءسوز, دەگەندى قوستى ول. مەديا-حولدينگتىڭ قۇرىلتايشىسى كىم, ونىڭ اكتسيالارىنىڭ ىشىندە مەملەكەتتىڭ ۇلەسى بار ما دەگەن سۇراققا وراي قوناق گازەتتىڭ قۇرىلۋ تاريحىنان ءبىرشاما قىزىقتى اڭگىمەلەر ايتتى. ءبىزدىڭ گازەتىمىزدى 1875 جىلى ءوز زامانىنىڭ وزىق ويلى وقىمىستىلارى بەشاروي جانە ساليم ەسىمدى اعايىندى ەكى ليۆاندىق ۇيىمداستىرعان. العاشقى كەزدە ولار گازەتتى الەكساندريا قالاسىندا اپتاسىنا ءبىر رەت شىعارىپ تۇرعان. سۇرانىس كوبەيگەن سوڭ گازەت كۇندە شىعاتىن حالگە جەتەدى. 1899 جىلى باسىلىم وقىرماندار كوپ شوعىرلانعان كاير قالاسىنا كوشىرىلەدى. ۇزاماي ونىڭ بەدەلى ءتىپتى ارتىپ, مىسىرلىق وقىمىستىلار, اقىندار مەن جازۋشىلار وعان ءجيى شىعىپ تۇرۋدى وزدەرىنە مارتەبە ساناعان. سونىڭ ىشىندە نوبەل سىيلىعىنىڭ بولاشاق لاۋرەاتى, جازۋشى, دراماتۋرگ ناگيب ماحفۋز دا ءبىر كەزدەردە بۇل گازەتتە ءجيى جاريالانىپ تۇرعان. ءوزىنىڭ العاشقى روماندارى مەن دراماتۋرگيالىق شىعارمالارىنان ۇزىندىلەردى جازۋشى الدىمەن وسى گازەتكە جاريالاعان. 1988 جىلى 77 جاستاعى جازۋشى نوبەل سىيلىعىن العاندا ءوز شىعارمالارىن العاش رەت جارىققا شىعارعان «ءال-احرام» گازەتىنە دە العىسىن ءبىلدىردى, دەدى باسىلىم باسشىسى. 1950-ءشى جىلداردىڭ باسىندا مى­سىردا كورول قۇلاتىلىپ, ەلدە رەس­پۋبليكا جاريالانعانىن بىلەسىزدەر. العاشقى پرەزيدەنت مۇحاممەد ناگيب بولعان ەدى, الايدا, ول ءبىر-اق جىل بيلىك قۇرىپ, وتستاۆكاعا كەتتى. 1954 جىلى وكىمەت باسىنا گامال ابدەل ناسىر كەلدى. ول كسرو-مەن جاقسى قارىم-قاتىناس ورناتىپ, ەلدەن اعىلشىن اسكەرلەرىن شىعاردى. سول كەزدە كسرو-نىڭ جولىمەن رەۆوليۋتسيالىق تارتىپتەر ەنگىزىپ, كوپتەگەن ۇلكەن كومپانيالاردى مەملەكەت مەنشىگىنە الدى. سونىڭ ىشىندە سۋەتس كانالى دا بولعانىن كەڭەستىك ازاماتتار جاقسى بىلەدى. مىنە, وسى ناۋقان كەزىندە «ءال-احرام» گازەتى دە ىلىگىپ, تولىعىمەن مەملەكەتتىڭ يەلىگىنە كوشتى. الايدا, وسى كەزدە گازەتتىڭ رەداك­تورلىعىنا وتە تانىمال پۋبليتسيست, اراب ەلدەرىنە بەلگىلى جازۋشى, قوعام قايراتكەرى مۇحاممەد حاسانەين حەيكال كەلدى. ول گازەت قىزمەتكەرلەرى قاتارىنا مىسىردىڭ عانا ەمەس, بارلىق اراب الەمىنىڭ جەتەكشى جۋرناليستەرى مەن ۇزدىك قالامگەرلەرىن تارتتى. سونىڭ ارقاسىندا گازەتتىڭ شەبەرلىگى ارتىپ, حالىق اراسىنداعى وتىمدىلىگى ءوستى  جانە باعىتى دا وزگەرمەي, ساياساتتىڭ سويىلىن سوقپاي, وبەكتيۆتى قالىبىنان تايمادى. گ.ا.ناسىردىڭ تۇسىندا تسەنزۋرا قانشا كۇشتى بولعانىمەن باس رەداكتوردىڭ بەدەلىنىڭ جانە پرەزيدەنتپەن دوستىعىنىڭ ارقاسىندا «ءال-احرام» گازەتىنە ەشقانداي قىسىم جاسالمادى. سول كەزدىڭ وزىندە «ءال-احرام» اراب ەلى عانا ەمەس, بۇكىل دۇنيەجۇزىنە بەلگىلى بەدەلدى باسىلىمداردىڭ بىرىنە اينالدى. نەگىزگى قۇرىلتايشىسى مەملەكەت دەپ سانالعانىمەن گازەت مەملەكەتتەن ەشقانداي قاراجات الماي, ءوزىنىڭ تاپقان تابىسىمەن كۇن كورگەن. ال بۇگىنگى تاڭدا جوعارىدا اتالعان كاسىپورىندار ونىمدەرى جانە جارناما بەرۋشىلەردىڭ تولەمدەرىنىڭ ارقاسىندا كۇن كورىپ كەلەمىز. سوڭعى جىلدارداعى توڭكەرىستىڭ كەسىرىنەن تۋعان داعدارىس كەزىندە مەملەكەت گازەتكە ءبىرشاما كومەك بەردى, بىراق بۇل ەشقانداي شارتسىز بەرىلگەن قولداۋ ەدى, دەدى قوناق. ەگەمەندىكتەردى «ءال-احرام» جۋر­نا­ليستەرىنىڭ ورتاشا تابىسى قىزىقتىردى. وعان قوناق تۋرا جاۋاپ بەرمەي, باسى­لىمنىڭ جالپى قارجىلىق قۋاتى تۋرالى ايتىپ كەتتى. سونىڭ ىشىندە جىل­دىق بيۋدجەتى 950 ملن. ەگيپەت فۋنتىنا تەڭ ەكەندىگى ايتىلدى. بۇل دوللارعا شاققاندا 110 ملن-داي. قاتارداعى ءجۋرناليستىڭ جىلدىق ەڭبەكاقىسى 12 مىڭ دوللار شاماسىندا ەكەن. سوندا ول ايىنا 1 مىڭ دوللار شاماسىندا ەڭبەكاقى الاتىن بولىپ شىقتى. ءبىر گازەتتىڭ وزىندىك قۇنى قانشا دەگەن سۇراققا بەرگەن جاۋابى ءبىزدىڭ جۋرناليستەرىمىزدى ءتىپتى قايران قالدىردى. ويتكەنى, گازەت بولشەك ساۋدادا 2 ەگيپەت فۋنتىنا ساتىلاتىن كورىنەدى, ال بۇل وزىندىك قۇننان الدەقايدا تومەن ەكەن. سوندا وزدەرىڭىزدىڭ شىعىندارىڭىزدى قالاي جاباسىزدار, بانكروت بولىپ قالمايسىزدار ما دەگەن سۇراققا قوناق جارنامادان تۇسەتىن مول قاراجات ءبىزدىڭ شىعىندارىمىزدى جاۋىپ قانا قويماي, تازا تابىس الۋىمىزعا مول مۇمكىندىك بەرەدى دەپ جاۋاپ بەردى. ونىڭ ۇستىنە جارناما, حابارلاندىرۋلاردى جالعىز مىسىر تۇرعىندارى عانا ەمەس, بارلىق اراب الەمى بەرىپ تۇرادى ەكەن. قازاقستاندىق باسىلىمدارمەن بايلانىس جاساۋ جوسپارلارىڭىز بار ما دەگەن سۇراققا احمەد ءان ناگگار ءۇل­­كەن ىجداھاتپەن جاۋاپ بەردى. ءبىز قازاق­ستاندى ورتالىق ازياداعى جەتەكشى ەل دەپ سانايمىز. ونىڭ ەكونوميكالىق دامۋ الەۋەتى زور ەكەنىن دە بىلەمىز. الەمدىك قاۋىمداستىقتىڭ قازاقستاننىڭ بەيبىت باستامالارىن قولداپ جاتقانىن كورىپ ءجۇرمىز. ءوزارا اڭگىمەلەسكەندە ءبىز قازاقستاندى ورتالىق ازيانىڭ جۇرەگىن ۇستاپ تۇرعان قىران دەپ ازىلدەيمىز. سوندىقتان دا, قازاقستانمەن تىكەلەي بايلانىس ورناتۋعا ىقىلاستىمىز. ءبىر وكىنىشتىسى سول, بۇگىنگە دەيىن ءبىز قازاقستان تۋرالى اقپاراتتاردى تۋرا الماي, تەك ەۋروپالىق ەلدەردەن تۇسەتىندەرمەن قاناعاتتانىپ كەلەمىز. سونىڭ ىشىندە, «رەيتەر», «اسسوشيەيتەد پرەسس» جانە ت.ب. بار. ودان دا ەكى ەلدىڭ اقپاراتتىق ايدىنىندا تىكەلەي بايلانىس ورناتىپ, ەكى جاقتىڭ كەلىسىمىمەن ءبىز الماتىدا نەمەسە استانادا, سىزدەر كايردە تىلشىلەر قوسىنىن اشاتىن بولساق, ەكى مەملەكەتكە دە ءتيىمدى بولار ەدى. ءبىز قازاقستان تۋرالى اقپاراتتى تىكەلەي سىزدەردەن العاندى دۇرىس دەپ سانايمىز. بىزدە سىزدەرگە ءوز ەلىمىز تۋرالى شىنايى اقپاراتتى جەتكىزىپ تۇرار ەدىك, دەدى قوناق. وسى ورايدا ارىپتەسىمىز تالعات باتىرحان: ءبىز سىزدەرگە ۇلى قولباسشى بەيبارىستىڭ ءوزىن جىبەرگەندە ءبىر ءتىلشىنى جىبەرۋگە دە شاما كەلەدى عوي دەگەن ۇتىمدى ءازىل تاستاعان ەدى, قوناعىمىز بۇل تاقىرىپتى قاناعاتپەن اۋىزعا الىپ, ۇلكەن تاقىرىپقا ويىسىپ كەتتى. سونىڭ ىشىندە, مىسىر حالقىنىڭ بەيبارىستى ءالى كۇنگە توبەگە كوتەرىپ قۇرمەتتەيتىنىن, ونىڭ ەسىمىمەن ماقتاناتىنىن, كايردەگى ەڭ ۇلكەن مەشىت سونىڭ اتىندا ەكەنىن جانە ونىڭ ەسىمىنە جەڭىمپاز دەگەندى بىلدىرەتىن «از-زاھير» سۋففيكسىن قوسىپ سويلەيتىندەرىن جەتكىزدى. وسى ورايدا, ءبىز «ءال-احرام» باسى­لىمىنىڭ قازاقستان پرەزيدەنتى نۇرسۇلتان نازارباەۆتىڭ ۆاشينگتوندا بولعان ءتورتىنشى انتي يادرولىق سامميتتە جاريالاعان مانيفەسى تۋرالى نە جازعانىن سۇرادىق. ءبىز بۇل ماسەلەگە ۇلكەن نازار اۋداردىق دەپ باستادى ءوزىنىڭ ءسوزىن قوناق. ويتكەنى, مىسىر جەرىندە بۇل ماسەلە ەجەلدەن وزەكتى بولىپ كەلەدى. سوندىقتان دا, بۇل ماسەلەنى ءبىز جازىپ قانا قويعان جوقپىز, وقىرماندار اراسىندا تالقىلاۋلارعا دا ورىن بەردىك. وسىدان 20 جىل بۇرىن بىزدە «تاياۋ شىعىس – يادرولىق قارۋدان ازات ايماق بولسىن!» دەگەن باستاما كوتەرگەن ەدى. بۇل باستاما ءبىزدىڭ وڭىرىمىزدە ۇلكەن سەنساتسيا بولىپ, قىزۋ تالقىلاندى. ءبىزدىڭ گازەتىمىز دە بۇل ىسكە بەلسەنە قاتىستى. الايدا, ءوڭىردى بەيبىتشىلىككە شاقىرعان بۇل باستاما ايماق ەلدەرى تاراپىنان تولىق قولداۋعا يە بولماي, جارتى جولدا قالدى. سوندىقتان دا, ءبىز پرەزيدەنت ن.نازارباەۆتىڭ باستاماسىنا ۇلكەن نازار اۋدارىپ, وزىمىزدە تۋعان بۇرىنعى باستامامەن جالعاستىرۋعا تىرىستىق جانە ونىڭ الەم ەلدەرى تاراپىنان تولىق قولداۋ تاپقانىن جاقتايمىز. ءبىزدىڭ ەلىمىز يادرولىق قارۋدى جاساۋ نەمەسە ونىڭ ارسەنالىن ارتتىرىپ, كورشىلەرىن قورقىتۋ ارقىلى باسىمدىققا جەتەمىن دەگەن جامان ويلى ساياساتتى ارقاشان اشكەرەلەپ, ونى سىن تەزىنە سالادى. مىنە, سوندىقتان دا, ءبىز ن.نازارباەۆتىڭ باستاماسىن قولداپ, ونى ءوزىمىزدىڭ وقىرماندارىمىزعا كەڭىنەن تاراتۋدامىز. سونىمەن قاتار, احمەد ءان ناگگار «ءال-احرام» گازەتى قىزمەتكەرلەرىنىڭ كاسىپوداعى دا مىقتى ەكەنىن جەتكىزدى. ءبىزدىڭ ۇجىمنىڭ كاسىپوداعى مىسىرداعى جۋرناليستەر كاسىپوداعىمەن بىرلەسە وتىرىپ, قالامگەرلەردىڭ قۇقى مەن ءسوز بوستاندىعىن, جەكە باستارىنىڭ ەركىندىگىن قورعاۋ باعىتىندا ۇلكەن شارۋالار تىندىرادى. ءبىزدىڭ بارلىق جۋرناليستەرىمىز دە كاسىپوداققا مىندەتتى تۇردە مۇشە بولىپ ەنەدى. ۇكىمەتتىڭ ءوزى ولاردىڭ تالاپتارىن ءسوزسىز ەسكەرەدى, دەدى ول. وسى ورايدا, مىسىردا بولعان بىل­­تىرعى جاپپاي تارتىپسىزدىكتەر كەزىندە «ءال-احرام» گازەتىنىڭ سيناي تۇبەگىندەگى ايماقتىق تىلشىلىك قوسىنىنا جاسالعان شابۋىلدى ەسكە تۇسىردىك. وندا باسىلىمنىڭ التى قىزمەتكەرى قازاعا ۇشىراپ, ءبىرشاماسى جارالانعان ەدى. تاقتان تايدىرىلعان ءدىنشىل پرەزيدەنت مۇحاممەد ءمۋرسيدىڭ جاقتاستارى گازەتتىڭ دەموكراتياشىل, زايىرلى باعىتىن ۇناتپاي, وعان شابۋىل جاساعانى بەلگىلى بولعان. سوندا «ءال-احرامنىڭ» بارلىق ۇجىمى كاسىپوداقتىڭ باستاماسىمەن قازا بولعاندار مەن جارالانعاندارعا, ولاردىڭ وتباسىلارىنا ۇلكەن كومەكتەر ۇيىمداستىرعانىن بىرقاتار ەۋروپالىق اقپارات قۇرالدارى جارىسا جازعان ەدى... كەزدەسۋ بارىسىندا قازاقستان مەن مىسىر اراسىنداعى تۋريزم سالاسىنداعى ىنتىماقتاستىقتى دامىتۋ ماقساتىندا تىڭ ويلار ايتىلىپ, ورىندى ۇسىنىستار جاسالدى. بىلتىرعى تەراكتىنىڭ سالدارىنان قازاقستاننان باراتىن تۋريستەر سانى كۇرت ازايىپ كەتكەنى بەلگىلى. قازىر جاعداي تۇراقتالعانىمەن ءبىزدىڭ تۋريستەر مىسىرداعى احۋالعا ءالى دە الاڭداۋلى. سوندىقتان, تۋريستىك فيرمالاردىڭ حالىق­تى تىنىشتاندىرۋ جونىندەگى اقپاراتتارى مەن جاڭا ۇسىنىستارى تۋرالى حابارلارىنا «ەگەمەن» ورىن بەرۋگە ءازىر ەكەنى ايتىلدى. بۇل ۇسىنىستى قوناعىمىز قۋانا قولدايتىنىن جەتكىزدى. وسى ماسەلەگە كەزدەسۋگە قاتىسىپ وتىرعان مىسىردىڭ قازاقستانداعى توتەنشە جانە وكىلەتتى ەلشىسى حايسام سالاح كامەل يبراحيم دە قىزۋ ارالاسىپ, مۇنداي پىكىرگە ءوزىنىڭ ريزاشىلىعىن ايتتى. سونىمەن قاتار, ول مىسىرداعى تۋريزم يندۋسترياسى تۋرالى ءبىرشاما اقپاراتتار بەرىپ, وسى سالانى ەكىجاقتى دامىتۋعا بىرلەسىپ ۇلەس قوسۋعا دايىن ەكەنىن ايتتى. قازىر قازاقستان باسشىلىعى مىسىرعا ۇشاتىن رەيستەرىن العاشقىلاردىڭ ءبىرى بولىپ تولىق قالپىنا كەلتىردى. ءبىزدىڭ ەل ءۇشىن بۇل وتە ماڭىزدى دوستىق قادام, دەدى ول. ال 20 مامىردا الماتىعا سيناي قالاسى مەن قىزىل تەڭىز وڭىرىنەن ۇلكەن دەلەگاتسيا كەلىپ, ەكى ەلدىڭ اراسىن­داعى ناق وسى تۋريزم سالاسىنداعى ىن­تى­ماقتاستىقتى دامىتۋ ماسەلەلەرى بويىنشا كەلىسسوزدەر جۇرگىزەدى ەكەن. ەلشى سول شارانى «ەگەمەننىڭ» كەڭىنەن كورسەتەتىنىنەن ءۇمىت ەتەتىنىن ايتتى. كەزدەسۋ سوڭىندا «ءال-احرام» باسى­لىمىنىڭ باسشىسى احمەد ءاس سايد ءان ناگگار وزىمەن جىلى ءجۇزدى كەزدەسۋ ۇيىمداستىرعان «ەگەمەن قازاقستان» گازەتىنىڭ باسشىلىعىنا, بەلسەنە قاتىسقان ۇجىم مۇشەلەرىنە ريزاشىلىعىن ءبىل­دىرىپ, العىسىن ايتتى.  جازىپ العان جاقسىباي سامرات, «ەگەمەن قازاقستان»