اتىراۋدا تاعى دا جاڭا ءۇش تۇرعىن ءۇي پايدالانۋعا بەرىلدى. س.داتوۆ كوشەسىنەن بوي كوتەرگەن ارقايسىسى 30 پاتەرلى ءۇش تۇرعىن ۇيگە باسپانالارى اپاتتىق جاعدايداعى وتباسىلار كوشىرىلدى. جاڭا تۇرعىن ۇيدەن پاتەر العاندار قاتارىندا ەلىمىزدىڭ قارۋلى كۇشتەرىندە قىزمەت ەتەتىن ءاسكەريلەر دە بار. باسپانا قۋانىشىنا كەنەلگەندەرگە پاتەر كىلتتەرىن تاپسىرعان وبلىس باسشىسى ب.رىسقاليەۆ: “بۇل باسپانالار ەلباسىمىز نۇرسۇلتان نازارباەۆتىڭ تاپسىرماسىمەن قولعا الىنعان تۇرعىن ءۇي قۇرىلىسىن دامىتۋدىڭ 2008-2010 جىلدارعا ارنالعان مەملەكەتتىك باعدارلاماسى شەڭبەرىندە سالىندى. ماقسات –تۇرعىنداردىڭ الەۋمەتتىك احۋالىن جاقسارتۋ, ءسويتىپ, باقۋاتتى تۇرمىسىنا قولايلى جاعداي تۋعىزۋ”, – دەدى.
جاڭا باسپانادان پاتەرلەر العان وتباسىلاردىڭ قۋانىشىندا شەك جوق. ماسەلەن, باتىس وڭىرلىك قولباسشىلىعىنداعى اسكەري ءبولىمدە مەديتسينا قىزمەتىن باسقاراتىن سەرىك مىرزاعاليەۆ بۇعان دەيىن ەلىمىزدىڭ ءار قيىرىندا قىزمەت جاساعان. 2007 جىلى سانكت-پەتەربۋرگتەگى اسكەري اكادەميانى بىتىرىسىمەن اتىراۋعا قىزمەتكە كەلىپتى. سودان بەرى ءۇش پەرزەنتىمەن قالادان ءۇي جالداپ جۇرگەن اسكەري دارىگەر قۋانىشىن بىلايشا جەتكىزدى: “الاڭسىز جۇمىس جاساۋ ءۇشىن ادامعا الدىمەن باسپانا قاجەت قوي. بۇگىن جاڭا پاتەرگە يە بولىپ, ەرەكشە قۋانىپ تۇرمىن”.
– تۇڭعىش پرەزيدەنتىمىز نۇرسۇلتان نازارباەۆتىڭ ساليقالى ساياساتىنىڭ ارقاسىندا ەلىمىزدە بەيبىت ءومىر ورنادى. ەل ىشىندەگى تاتۋلىق ەكونوميكانىڭ وركەندەۋىنە نەگىز قالادى. تۇرعىن ءۇيلەر كوپتەپ سالىنىپ جاتىر. كوپ جىل پاتەر جالداپ ءجۇرۋشى ەدىك. ەندى, مىنە, 5 بالاممەن جاڭا ءپاتەرگە يە بولدىم, – دەيدى ەنەرگەتيكا سالاسىنىڭ ارداگەرى زويا نۇرعايباەۆا. ال زەينەتكەر ءمارزيا تۇرماعانبەتوۆا ءتورت جىل بويى قۇلاعان ءۇيدە تۇرعان. باسپانا جاعدايىنىڭ اۋىر ەكەنىن اكىمدەرگە ايتىپ, ايتەۋىر ءبىر كۇنى جاقسى پاتەرگە قولى جەتەرىنەن ءۇمىتىن ۇزبەپتى.
مىنە, وسىلايشا جىل باسىندا وبلىس ورتالىعىندا تاعى دا 90 وتباسى قونىس تويىن تويلادى.
جولداسبەك شوپەعۇل.
اتىراۋ.