پارلامەنت سەناتىنىڭ ءتوراعاسى قاسىم-جومارت توقاەۆ بيۋرو مۇشەلەرىمەن كەڭەس وتكىزدى, وندا پارلامەنتتىڭ V شاقىرىلىمى كەزەڭىندەگى سەنات قىزمەتىنىڭ ناتيجەلەرى قورىتىندىلاندى, سونداي-اق, پالاتا جۇمىسىنىڭ جوسپارى قارالدى, دەپ حابارلادى سەناتتىڭ ءباسپاسوز قىزمەتى.
كەڭەستە بەسىنشى شاقىرىلىمدا سەنات 127 وتىرىس وتكىزگەنى, وندا 508 زاڭ جوباسى مەن سەناتتىڭ ەرەكشە جانە دەربەس قاراۋىنا جاتاتىن 50-دەن استام ماسەلە قارالعانى اتاپ ءوتىلدى. شاقىرىلىم كەزىندە پارلامەنت 7 كودەكس, 59 دەربەس زاڭ, كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى 205 زاڭ, حالىقارالىق شارتتار مەن كەلىسىمدەردى راتيفيكاتسيالاۋ تۋرالى 237 زاڭ قابىلدادى. ولاردىڭ ىشىندە 30 زاڭ پارلامەنت دەپۋتاتتارىنىڭ باستاماسىمەن ازىرلەندى. بەس ينستيتۋتتىق رەفورمانى ىسكە اسىرۋ جونىندەگى «100 ناقتى قادام» ۇلت جوسپارى اياسىندا پارلامەنت 2015 جىلعى كۇزدە 59 زاڭ قابىلدادى. شاقىرىلىم كەزىندە 484 دەپۋتاتتىق ساۋال جاريا ەتىلىپ, جوعارعى پالاتانىڭ تۇراقتى كوميتەتتەرى 120-دان استام شارا وتكىزدى.
2016 جىلعى 21 قاڭتار مەن 24 ناۋرىز ارالىعىنداعى پارلامەنتتىڭ قىزمەتىن اتقارعان كەزەڭدە سەنات 57 زاڭدى قاراپ, قابىلدادى. بۇل ۋاقىتتا زاڭ جوبالارىن قاراعان كەزدە سەناتورلار 1490 تۇزەتۋ ەنگىزدى. ق.توقاەۆ قۇجاتتارمەن جۇمىس بارىسىنداعى جەمىستى جۇمىسى ءۇشىن كوميتەت توراعالارى مەن بارلىق دەپۋتاتقا العىس ايتتى.
زاڭ شىعارۋ قىزمەتىنىڭ جوسپارى جايىندا ايتا كەلىپ, سەنات توراعاسى 25 ناۋرىزدا پارلامەنتتىڭ VI شاقىرىلىمىنداعى ءبىرىنشى سەسسيانى اشاردا پرەزيدەنت ن.نازارباەۆ العا قويعان مىندەتتەردى ەسكە سالدى. بىرىڭعاي سالىق جانە كەدەن كودەكستەرىن, «جەر قويناۋى جانە جەر قويناۋىن پايدالانۋشىلار تۋرالى» كودەكستى قابىلداۋ, ەلەكتر ەنەرگەتيكاسى, باسەكەلەستىك ماسەلەلەرى تۋرالى زاڭناماعا وزگەرىستەر ەنگىزۋ, سونداي-اق, باسەكەلەستىك ورتاعا مەملەكەتتىك مىندەتتەردى ودان ءارى بەرۋ بولىگىندەگى زاڭنامانى جەتىلدىرۋ قاجەتتىگى تۋرالى ايتىلدى.
«مەملەكەت باسشىسى جاڭا جاعدايدا تۇتاستاي پارلامەنتتىڭ جانە ونىڭ پالاتالارىنىڭ جالپى ساياسي ءرولى مەن جاۋاپكەرشىلىگى ارتا تۇسەتىنىن ەرەكشە اتادى جانە زاڭ شىعارۋ ۇدەرىستەرىندە ءوزارا سىندارلى ءىس-قيمىل ءداستۇرى جالعاساتىنىنا سەنىم ءبىلدىردى», – دەپ اتاپ ءوتتى ق.توقاەۆ. قازاقستاندىق دەپۋتاتتاردىڭ حالىقارالىق پارلامەنتارالىق قوعامداستىققا بەلسەندى قاتىسۋى دا ماڭىزدى مىندەتتەردىڭ ءبىرى بولىپ تابىلادى.
كەڭەستە سەناتتىڭ ساۋىرگە جوسپارلانعان شارالارى دا تالقىلاندى. بيۋرونىڭ تاپسىرماسى بويىنشا سەنات «ەاەو جانە دسۇ جاعدايىندا وتاندىق اگرارلىق سەكتوردىڭ باسەكەگە قابىلەتتىلىگىن ارتتىرۋ – زاڭنامالىق رەتتەۋ جانە ونى ءىس جۇزىنە اسىرۋ» تاقىرىبى بويىنشا پارلامەنتتىك تىڭداۋعا ازىرلىك جۇمىستارىن جۇرگىزەدى. سەناتتاعى تىڭداۋ 29 ساۋىرگە جوسپارلاندى.
كەڭەستى قورىتىندىلاي كەلىپ, سەنات توراعاسى جاڭا پارلامەنتتىك ماۋسىمدا دەپۋتاتتاردىڭ ۇيلەسىمدى ءارى ءونىمدى جۇمىستارى جالعاساتىنىنا سەنىم ءبىلدىردى.