سەمەيدە سوڭعى كەزدە «سەمنان» جشس-ءنىڭ ونىمدەرىنە دەگەن سۇرانىس وتە جوعارى. قالالىق كاسىپكەرلىك ءبولىمىنىڭ ماماندارىنىڭ ايتۋىنشا, بۇل كاسىپورىننىڭ ونىمدەرى ساپالى بولۋىمەن قاتار, باعاسى دا حالىققا قولجەتىمدى ءارى ءتيىمدى. كومبينات ساتىپ الۋشىلاردىڭ ءارتۇرلى تاڭداۋلارىن ەسەپكە الا وتىرىپ, ءار ادامنىڭ وزىنە قاجەتتى ءونىمىن ساتىپ الۋعا قولايلى جاعداي جاساعان. «سەمناندا» شىعارىلاتىن ءونىمدەرگە كەلسەك, ولار ناندار, نان-بولكەلەر, توقاشتار, ۇن ءتاتتى تاعامدارى, پەچەنەلەر, تورتتار. قالا دۇكەندەرىندە ديەتا ناندارى مەن دەنساۋلىقتى تۇزەۋگە ارنالعان ناندار سەرياسى ەرەكشە نازار تارتادى. بۇل ونىمدەر تاماقتانۋ راتسيونىن ناتيجەلى ۇيلەستىرۋگە جانە ۇزاق ۋاقىت قولدانعاندا ورگانيزمنىڭ جالپى جاعدايىن جاقسارتۋعا كومەكتەسەدى.
«سەمنان» جشس نان-توقاش كومبيناتى ۇنەمى كورمەلەر مەن رR-اكتسيالارعا قاتىسىپ تۇرادى. مادەنيەت, ءبىلىم جانە سپورتتى دامىتۋعا باعىتتالعان الەۋمەتتىك باعدارلامالاردى بەلسەندى قولداۋ ارقىلى تۇتىنۋشىلارمەن بايلانىس جاساپ, ءتيىمدى شارالاردى جۇزەگە اسىرۋدا. كومپانيا تۇتىنۋشىلارمەن ۇزدىكسىز بايلانىستا بولاتىندىقتان ءونىمدەردىڭ قۇنارلىعى جانە پايدالى قاسيەتتەرى تۋرالى ءمالىمەتتەردى جيناقتاپ وتىرادى. وندا تۇتىنۋشىلار وزدەرىنىڭ ەسكەرتۋلەرى مەن تىلەكتەرىن ايتۋعا مۇمكىندىكتەرى بار. كومبيناتتا جاڭا تەحنولوگيالار ءبولىمى جۇمىس جاساپ, ونىڭ كومەگىمەن بارلىق مۇددەلى جاقتاردىڭ, سونىمەن قاتار, تۇتىنۋشىلاردىڭ, تالاپتارىنا جاۋاپ بەرە الاتىن جاڭا نان-توقاش ونىمدەرى وندىرىسكە تۇراقتى تۇردە ەنگىزىلۋدە.
«سەمنان» نان-توقاش كومبيناتى» جشس ونىمدەرىنىڭ ساپاسى ەرەكشە تۇراقتى جانە تالاپقا ساي. زاماناۋي جابدىقتارمەن جابدىقتالعان تەحنولوگيالىق زەرتحانا شيكىزات, جارتىلاي دايىن ونىمدەر مەن دايىن ونىمدەردىڭ ساپاسى مەن قاۋىپسىزدىگىن قاتاڭ باقىلايدى. وندىرىستىك, تۇرمىستىق جانە اكىمشىلىك ءۇي-جايلارىن جاڭارتۋ, سانيتارلىق-گيگيەنالىق نورمالاردى ساقتاۋعا باسا كوڭىل بولىنەدى. كومبيناتتىڭ بارلىق دايىن ونىمدەرى بەلگىلەنگەن ءتارتىپتە سايكەستىكتى راستاۋ پروتسەدۋراسىنان جۇيەلى تۇردە وتەدى. كومبينات تالاي رەت ءارتۇرلى كونكۋرستاردا جۇلدەلى ورىنداردى يەلەگەن.
«سەمنان» جشس-ءنىڭ ديرەكتورى قايرات جاڭگىرباەۆتىڭ ايتۋىنشا, ولاردىڭ كاسىپورنى سەمەيدەگى دۇكەندەردى الەۋمەتتىك نانمەن قامتاماسىز ەتىپ وتىرعان بىردەن-ءبىر كاسىپورىن. جاقىندا قالا اكىمدىگىمەن 20 كاسىپورىن مەموراندۋمعا وتىرعان ەدى. باعانى شارىقتاتپاۋ تۋرالى مەموراندۋمعا سايكەس نان باعاسى دا اسا قىمباتتامايتىن بولادى.
– ءبىزدىڭ ۇجىم جاقىندا فەدور دوستوەۆسكي مۇراجايىندا وتكەن «ەڭبەك ادامى» جارمەڭكەسىنە قاتىستى, وسىنداي شارالارعا ءجيى اتسالىسىپ تۇرامىز, – دەيدى «سەمنان» جشس-ءنىڭ ديرەكتورى قايرات جاڭگىرباەۆ. – بۇل شارا «ەڭبەك كۇنىنە» ارنالدى. بۇل كۇننىڭ ماعىناسى ادامدى ەڭبەك ەتۋگە باۋلۋ. ەڭبەكسۇيگىشتىكتى ناسيحاتتاۋ بولىپ تابىلادى. شىنى كەرەك, ءبىز قايىرىمدىلىق جاساۋدى دا ۇمىتپايمىز. «بالداۋرەن» بالالار باقشاسى, «انا مەن بالا» قىزىل كرەست قوعامدىق ۇيىمى, بالالار ءۇيى سياقتى كوپتەگەن مەكەمەلەر ءبىزدىڭ قامقورلىعىمىزدا. ايتا كەتۋ كەرەك, «سەمناندا» زەينەتكەرلىككە شىققان ادامدار دا جۇمىس ىستەيدى. ءبىز ەڭبەك ەتەم دەگەن ادامدى دالاعا تاستامايمىز. الەۋمەتتىك جاعىنان از قورعالعان وتباسىلار دا ءبىزدىڭ نازارىمىزدا.
– «ەڭبەك ادامى» جارمەڭكەسىندە ءتۇرلى اشەكەي بۇيىمدار, سىرعالار, سىيكادەلەر جاسايتىن قولونەر يەلەرىمەن قاتار نان-ماكارون ءونىمدەرىن ۇسىنىپ «سەمنان» جشس دە قاتىستى, كورەرمەندەردىڭ ريزاشىلىعىنا يە بولدى. ويتكەنى, سەمەي حالقى نەگىزىنەن «سەمنان» كاسىپورنىنىڭ ونىمدەرىن تۇتىنادى, – دەدى مۇراجايدىڭ عىلىمي اعارتۋشىلىق ءبولىمى مەڭگەرۋشىسىنىڭ ورىنباسارى, ءجارمەڭكەنى ۇيىمداستىرۋشى سالتانات سەكەرباەۆا. – «اس اتاسى – نان» دەمەكشى, كورمەمىزدە ناندى قولدان ءپىسىرۋ, پەشكە سالۋ, ءتۇرلى كونديتەرلىك تاعامدار جاساۋ تاريحى باياندالعان. مۇنىڭ ءبارى دە ەڭبەك ادامىنىڭ قولونەر جەمىسى ەكەندىگىن ۇمىتپاعان ءجون.
– ءيا, نارىقتىڭ ءوز زاڭى بار, ءبىراز جەرلەردە نان باعاسىنىڭ ءوسىپ جاتقاندىعىنان حاباردارمىن, – دەيدى قالا تۇرعىنى گالينا بوندارەنكو, – بىراق, مەن ءوزىم ۇناتقان توقاشتار مەن باتونداردان وسىعان بولا باس تارتپايمىن. باعانىڭ كوتەرىلۋىنە تۇسىنىستىكپەن قاراۋعا بولادى دەپ ەسەپتەيمىن. ويتكەنى, قازىر كاسىپورىندارعا دا وڭاي ەمەس. شىعىندارى كوبەيگەن شىعار. ال «سەمنان» ءونىمى ءارقاشاندا جوعارى باعالانادى, سەبەبى, اسا قىمبات ەمەس, قولجەتىمدى. ءارى نان-توقاشتارى اسا ءدامدى.
راۋشان نۇعمانبەكوۆا.
سەمەي.
سۋرەتتەردى تۇسىرگەن اۆتور.