ەلىمىزدە «مەن ەلىمدى سۇيەمىن» اكتسياسى وتۋدە. وسىعان وراي كەشە پرەزيدەنت جانىنداعى ورتالىق كوممۋنيكاتسيالار قىزمەتىندە تىكەلەي ەفيردە تەلەكوپىر بولىپ ءوتتى. تۋعان ەلگە, وتانعا دەگەن تۇرعىنداردىڭ سۇيىسپەنشىلىك سەبەپتەرى مەن ماحاببات لەبىزىن كورسەتۋگە باعىتتالعان جوبانىڭ ماقساتى ايقىن. بۇل رەتتە ەكى جۇما ىشىندە 200-دەن استام جاريالانىمدار مەن بەينەماتەريالدار تاراپ ۇلگەرگەن الەۋمەتتىك جەلىدە بۇل جوبانى قولداۋشىلار كۇن ساناپ ارتا تۇسۋدە.
ءبىرىنشى كەزەكتە ارنايى ءتۇسىرىلگەن بەينەروليكتەرگە كەزەك بەرىلىپ, وندا ەلىمىزدىڭ بەدەلدى تۇلعالارى ءوز وتانىن نەلىكتەن جاقسى كورەتىندىگى جايىندا ءسوز قوزعايدى. تەلەكوپىر اياسىندا ەلىمىزدىڭ وزگە وڭىرلەرىمەن بايلانىس ورناتىلىپ, ماڭعىستاۋ وبلىسىنان بايلانىسقا شىققان قارت كاسپيدىڭ تۇرعىندارى وسىناۋ پاتريوتتىق باستاماعا قولداۋ كورسەتۋگە قاشاندا ءازىرمىز دەگەن ىزگى نيەتتەرىن جەتكىزدى. سونداي-اق, بۇگىن ءبىزدىڭ بەلسەندى جاستارىمىز تەڭىز جاعالاۋىندا ەلدىگىمىزدى ايقىندايتىن شاراعا ءوز ۇلەستەرىن قوسۋ ءۇشىن جينالىپ تۇر. وسى رەتتە ءسوز كەزەگىن وليمپيادا ويىندارىنىڭ كۇمىس جۇلدەگەرى ادىلبەك نيازىمبەتوۆ پەن قحا جاستار قاناتىنىڭ مۇشەسى يسلام مۇساەۆقا بەرەمىز دەگەن جاستار ولارعا ءسوز تىزگىنىن ۇستاتتى. اتا-بابامىزدىڭ ازاتتىق جولىنداعى ارمانى جۇزەگە اسقان بۇگىنگى ەلىمىزدى ماقتان تۇتامىن. شارشى الاڭعا شىققاندا مەنى قولداپ وتىرعان وتانىمنىڭ بار ەكەندىگىن سەزىنەمىن. سول قولداۋ مەنى جەڭىسكە جەتەلەيدى. تۋىمىز بيىككە كوتەرىلگەندە بويىمدى اسقاق رۋح بيلەيدى, مەن وتانىمدى سۇيەمىن, دەدى ءا.نيازىمبەتوۆ ءوز سوزىندە.
سونداي-اق, ەلىمىزدىڭ شىرايلى شىعىسىنان بايلانىسقا شىققان وسكەمەندىكتەر دە بۇل شارانى قولداۋدا بەلسەندىلىك تانىتتى. ءوز ءوڭىرىنىڭ ماقتانىشى, ەلىمىزدىڭ ەڭبەك سىڭىرگەن سپورت شەبەرى, ازيا ويىندارىنىڭ ءۇش دۇركىن چەمپيونى ولگا رىپاكوۆاعا ءسوز بەرىلدى. ول قازاقستاندى شەكسىز سۇيەتىنىن, سەبەبى مۇندا ءساتتى ومىرگە باعىتتالعان كەرەكتى جاعدايلاردىڭ بارلىعى جاسالعانىن جانە وتاننىڭ قۇشاعى قاشاندا ىستىق ەكەنىن ەرەكشە اتاپ وتكەن سپورتشى جاس ۇرپاقتى ەلدىڭ داڭقىن كوتەرۋدە ايانباي ەڭبەك ەتۋگە شاقىردى.
تەلەكوپىر قوناقتارىنا ارنايى ءسوز بەرىلىپ, ولار دا ءوز كەزەگىمەن جىلى لەبىزدەرىن جەتكىزدى. بۇل رەتتە ەلىمىزدىڭ تانىمال تۇلعالارى, سپورتشىلار مەن ۇستازدار, انشىلەر جانە ونەر مايتالماندارى جيىلعان ستۋديادا ءسوز العاندار قاتارىندا مەملەكەتىمىزدىڭ بەلگىلى اكتەرى قۋاندىق قىستىقباەۆ بولدى. مەنىڭ باعىم بولار, تەاتردا دا, كينودا دا مەن سومدايتىن رولدەردىڭ بارلىعى ەرلىككە, وتانشىلدىققا ارنالادى. سونىڭ ىشىندە ەلگە دەگەن ماحابباتىمدى داڭقتى پارتيزان, حالىق قاھارمانى قاسىم اتامىزدىڭ ءرولىن سومداعان كەزدە ەرەكشە سەزىندىم. بۇل ءفيلمدى الەمنىڭ باسقا دا ەلدەرىندە كورسەتۋدە, مەن ونى ەلىمىزدىڭ ءتاۋەلسىزدىگىنە جاسالعان سىي دەپ بىلەمىن, دەدى ول.
جاس بۇلدىرشىندەردىڭ جۇرەگىنە پاتريوتتىق سەزىم ءنارىن ەگىپ جۇرگەن ۇستاز گۇلدەن ەرتاۋباەۆا دا بالا تاربيەسىندە, ۇرپاق تالىمىندە باستى ورىن الاتىن ۇستانىمنىڭ وتانسۇيگىشتىككە باۋلۋ ەكەندىگىن اتاپ ايتتى. كەلەشەگىمىزگە داڭعىل جول سالىپ, بولاشاقتىڭ بەرىك ىرگەسىن قالايتىن جاستاردىڭ ساناسىنا ەلگە دەگەن سۇيىسپەنشىلىكتى ءسىڭىرۋدىڭ ماڭىزدىلىعىنا ايرىقشا توقتالعان مۇعالىم, بىرلىگى جاراسقان ەل جاستارىنىڭ جۇرەگى وتان دەپ سوعۋى قاجەتتىگىن جەتكىزدى.
الماتى قالاسىنداعى مەدەۋ مۇز ايدىنىنا جيىلعان جۇرت ەلوردامەن بايلانىسقا شىقتى. ولاردىڭ قاتارىندا ەلىمىزدىڭ بەدەلدى ازاماتتارى – وليمپيادا چەمپيونى ەرماحان يبراگيموۆ, ءانشى ءمادينا سادۋاقاسوۆا, تۋرال ەۆەرەست, تۇرار راحىمبەرلين, مۇرات مۇتىرعانوۆ تا بار. وتانعا دەگەن سەزىمىن توپتىق بيمەن جەتكىزگەن تۇرعىندار فلەش-موب ۇيىمداستىردى. الماتىنىڭ ىستىق سالەمىنەن سوڭ تەلەموست ءانشى بۇركىتتىڭ پاتريوتتىق انىمەن اياقتالدى.
ەلميرا ماتىباەۆا,
«ەگەمەن قازاقستان».