مارتەبەسى قىتايدىڭ باس قالاسىنا قاراي اۋىستى
قىتاي استاناسى – بەيجىڭ الەمدە دوللار بويىنشا ميللياردەرلەرى ەڭ كوپ قالاعا اينالدى. ول بۇل جاعىنان ۇزاق جىلدار بويى ەشكىمگە تەڭدىك بەرمەي كەلگەن نيۋ-يوركتى دە باسىپ وزدى.
بۇل دەرەكتەردى جىل سايىن الەمدەگى ميللياردەرلەر سانى ءجونىندە ارنايى بايان دايىنداپ تۇراتىن شانحايدىڭ Hurun كومپانياسى سۋدىڭ بەتىنە شىعاردى. 2015 جىلدىڭ قورىتىندىسى بويىنشا بەيجىڭدە تۇراتىن ميللياردەرلەر سانى 100-گە جەتسە, ول نيۋ-يوركتە 95 اداممەن شەكتەلگەن. جىل ىشىندە قىتاي استاناسىنداعى ميللياردەرلەر 32 ادامعا وسسە, امەريكانىڭ ەڭ ۇلكەن شاھارىندا بايلىعى بەلشەسىنەن كەلگەن تەك 4 ادام عانا قاتارعا قوسىلعان.
Hurun باسىلىمىنىڭ ءمالىمەتىنشە, قىتايدا سوڭعى ءۇش جىلدا وسىنشاما بايلىقتارى بارلار سانى 242-دەن 596 ادامعا جەتكەن. ونىمەن جاقىن اراداعى اقش بايلارىنىڭ قاتارىن 537 ادام ءتۇزىپ وتىر. ال قىتاي ميللياردەرلەرىنىڭ جالپى سانىن بۇل مەملەكەتتىڭ ءوز قۇرامداس ءبىر بولىگى سانايتىن گونكونگ, ماكاو جانە تايپەي ەلدەرىندەگى اۋقاتتىلارمەن قوسىپ ەسەپتەسە, بۇل كورسەتكىش 715 ادامعا ءبىر-اق بارار ەدى.
زەرتتەۋشىلەر اتاپ كورسەتكەندەي, پلانەتادا بايلىعىنىڭ اۋقىمى 1 ملرد. دوللاردان اساتىن 2188 ادام تۇرادى. ولاردىڭ 47-ءسىنىڭ جاستارى ءالى قىرىققا دا جەتپەپتى. جەر جۇزىندەگى دوللار بويىنشا جيناعان اقشالارى جاعىنان ميللياردەرلەرى كوپ ەلدەر ۇشتىگىن قىتاي, اقش جانە ءۇندىستان قۇرايدى.
مۇرات ايتقوجا.