پەتروپاۆل. 1اقپان. قىزىلجار وڭىرىندە بيىل يندۋستريالاندىرۋ كارتاسى شەڭبەرىندە ءبىرىنشى جوبا ىسكە قوسىلىپ, جىلىتۋ كابەلدەرىن جاسايتىن زاۋىت سالتاناتتى تۇردە اشىلدى. بۇل تۋرالى وبلىستىق يندۋستريالىق-يننوۆاتسيالىق دامۋ باسقارماسىنا سىلتەمە جاساعان ەgemen.kz ءتىلشىسى حابارلادى.
زاۋىتتىڭ اشىلۋ راسىمىنە قاتىسقان وبلىس اكىمى ەرىك سۇلتانوۆ يندۋستريالىق-يننوۆاتسيالىق سالانى دامىتۋ باسىم باعىتتاردىڭ ءبىرى بولىپ تابىلاتىنىن, ايماق شەتەلدەن ينۆەستيتسيالىق قارجى تارتۋدا رەسپۋبليكادا ءبىرىنشى ورىندى يەلەنەتىنىن, ەكىنشى بەسجىلدىقتا 16-شى جوبانىڭ پايدالانۋعا بەرىلگەنىن جەتكىزدى.
الەمنىڭ 60 ەلىمەن تىعىز ارىپتەستىك بايلانىس ورناتقان BARTEC كومپانياسى باسشىلىعىنىڭ تمد بويىنشا كابەلدىڭ وسى ءتۇرىن شىعاراتىن العاشقى كاسىپورىندى تۇرعىزۋ ءۇشىن تەرىسكەيدى تاڭداپ الۋىنا شەكارالاس ايماقتا ورنالاسۋى ىقپال ەتكەن. ونىڭ قۇرىلىسىنا 600 ميلليون تەڭگە قاراجات ءبولىنىپ, ايىنا 250 مىڭ مەتر كابەل ءوندىرۋ جوسپارلانعان. گەرمانيادان, شۆەيتساريادان جانە فرانتسيادان اكەلىنىپ, ورناتىلعان زاماناۋي تەحنولوگيالار ەكولوگيالىق جاعىنان تازا ءونىم شىعارۋعا باعدارلانعان. العاشقى كەزەڭدە 15 ادام جۇمىسپەن قامتىلسا, تولىق قۋاتىنا قوسىلعان كەزدە قوسىمشا 30 جۇمىس ورنى اشىلادى.
«جىلىتۋ كابەلدەرىن تۇرعىن ءۇي-كوممۋنالدىق شارۋاشىلىق , مۇناي, گاز, حيميا, فارماتسەۆتيكا سالالارىنا كەڭىنەن پايدالانۋعا بولادى. جاسالۋ تەحنولوگياسى حالىقارالىق تالاپتارعا ساي كەلەتىندىكتەن, قاۋىپسىز سانالادى», – دەيدى BARTEC كومپانياسىنىڭ اتقارۋشى ديرەكتورى حايك لاۋبحايمەر
ءومىر ەسقالي.
دەرەك, سۋرەت: سولتۇستىك قازاقستان وبلىستىق يندۋستريالىق-يننوۆاتسيالىق دامۋ باسقارماسى.