جەتىستىكتەر دە, كەمشىلىكتەر دە سارالاندى

استانا قالالىق سوتى وتكەن جىلدىڭ جۇمىسىن قورىتىندىلادى كەشە استانا قالالىق سوتىندا 2015 جىلدىڭ جۇمىس قورىتىندىلارىنا قاتىستى كەڭەيتىلگەن جالپى وتىرىس بولىپ ءوتتى. ەلوردالىق سوتتاردىڭ جۇمىسى تۋرالى استانا قالالىق سوتىنىڭ ازاماتتىق جانە اكىمشىلىك ىستەر بويىنشا القا توراعاسى بەرىك ەستاي, قىلمىستىق القا توراعاسى اسقارجان كەنجەعارين بايانداما جاسادى. سونداي-اق, قالالىق سوتتىڭ ماتەريالدىق-تەحنيكالىق بازاسى جانە شارۋاشىلىق ماسەلەلەرى تۋرالى سوت اكىمشىلىگىنىڭ باسشىسى رەنات تاۋىمبەكوۆ ءسوز سويلەدى. جارىسسوزگە شىققان سارىارقا اۋدان­دىق سوتىنىڭ توراعاسى ەرلان تاسى­روۆ جانە اۋدانارالىق ەكونوميكالىق سوتىنىڭ توراعاسى اقان جۇماعۇلوۆ وزدەرى باسقارىپ وتىرعان ۇجىمدارداعى اتقارىلىپ جاتقان جۇمىستاردىڭ بارىسى تۋرالى ايتىپ ءوتتى. – مەملەكەت باسشىسى نۇرسۇلتان نازارباەۆ سوت جۇيەسىن ودان ءارى جەتىلدىرۋگە ۇنەمى نازار اۋدارىپ, سوت ادىلدىگىن جۇزەگە اسىرۋدىڭ تيىمدىلىگىن ارتتىرۋعا ناقتى شارالار جاساپ جاتقانى بارشامىزعا ءمالىم, – دەدى استانا قالالىق سوتىنىڭ توراعاسى تىلەكتەس بارپىباەۆ. – جوعارعى سوت باس­شى­لىعى ازاماتتاردىڭ قۇقىقتارى مەن زاڭ­دى مۇددەلەرىنىڭ سەنىمدى قورعالۋىنا, ەلباسىمىزدىڭ سوت جۇيەسىنىڭ الدىنا قويعان تالاپتارىن جۇيەلى تۇردە ىسكە اسىرۋ ماقساتىندا جەرگىلىكتى سوتتار الدىنا سوت تورەلىگىن ۋاقتىلى, زاڭ تالاپتارىنا سايكەس ادىلەتتى جۇزەگە اسىرۋدى مىندەتتەپ وتىر. – جوعارعى سوت وتكىزگەن رەيتينگ قو­رى­تىندىلارى بويىنشا استانا قا­لا­سىنىڭ سوتتارىنىڭ جالپى كورسەتكىشى الدىڭعى جىلدارمەن سالىستىرعاندا ەداۋىر ىلگەرىلەدى. بۇل ءبىز ءۇشىن جەتىستىك. دەگەنمەن, مەن سىزدەرگە سەنەمىن, بۇدان دا جوعارى ناتيجەگە جەتۋگە مۇمكىندىگىمىز بار, – دەدى ت.بارپىباەۆ. شارافاددين ءامىروۆ, «ەگەمەن قازاقستان».