«نۇر وتان» پارتياسىنىڭ استانادا وتكەن كەزەكتەن تىس XVII سەزىندە پارتيا توراعاسى, ەلباسى نۇرسۇلتان نازارباەۆتىڭ جاساعان بايانداماسىن زەيىن قويىپ, مۇقيات تىڭدادىم. ەرەكشە اسەر الدىم. مەملەكەتتىك ساياساتقا ساي وزىندىك ۇلەسىمدى قوسىپ ەڭبەك ەتىپ جۇرگەن «نۇر وتان» پارتياسىنىڭ الدىنا قويعان تۇعىرنامانى مۇلتىكسىز ورىنداساق, ەلىمىز الداعى بەس جىلدا وركەنيەتتى دامىعان ەلدەر قاتارىنا قوسىلۋدىڭ بەرىك قادامىن نىق باساتىنى انىق. كوشباسشىمىز جاستاردىڭ زامان تالابىنا ساي وقىپ, ەڭبەك ەتۋىنە جارقىن جول اشىلعانىن, ءبىلىم بەرۋ مەن دەنساۋلىق ساقتاۋ سالالارىن دامىتقان ۇستىنە دامىتا ءتۇسۋدى ەرەكشە ايتىپ ءوتتى. بارلىق قاجەتتىلىكتەردى سىرتتان تاسىماي ىشكى دۇنيەنى ۇقساتا ءبىلۋدى, وزىمىزدىكىن ءوزىمىز وڭدەپ پايدالانۋدى ناقتىلادى. بۇل دەگەنىمىز رىنوكتا تەڭگەمەن جۇمىس ىستەۋدىڭ ماڭىزدىلىعىن ءبىلدىرۋدىڭ, ايقىن باسىمدىعىن اڭعارتۋدىڭ العاشقى قادامى بولىپ تا سانالادى.
قازاقستاندا شىعارىلاتىن سان الۋان شيكىزاتتى ەلدە جۇمىس ىستەپ تۇرعان ءوندىرىس ورنىنا ساتۋ, سوسىن زاۋىتىمىزدان شىعارىلعان سول ءونىمدى تۇتىنۋشىلار تاپسىرىسىنا ساي ساتىپ الۋدا تەڭگەمەن جۇمىس ىستەۋ كەرەكتىگىن ۇعىندىرعانى قانداي تاماشا! مىسالعا, الەمدىك رىنوكتا ۇلكەن سۇرانىسقا يە بولىپ تۇرعان اليۋميني سەكىلدى وتاندىق ءونىمدى وڭدەپ, قۇرىلىس قاجەتتىلىگىن وتەۋگە ەرەكشە نازار اۋداردى. بۇل رەتتە يندۋستريالاندىرۋدىڭ ورنى بولەك. وتاندىق ءونىمدى دۇرىس پايدالانا ءبىلۋ دەگەندە ءبىر عانا كارتوپتى الساق, بىزدەن شيكىزات ەسەبىندە وتە ارزان باعادا توننالاپ ساتىپ اكەتەتىن كورشىلەرىمىز قىتىرلاق كارتوپ سەكىلدى ۇلكەن سۇرانىس تۋدىراتىن ونىمدەرىن قايتادان وزىمىزگە قىمبات باعاعا ساتاتىنى جاسىرىن ەمەس. نەگە ءبىز ءوزىمىز سونداي ءونىم وندىرە الاتىن ءوندىرىس ورىندارىن ءبىرىنەن ەكىنشىسىن اسىرىپ سالمايمىز. سوندىقتان, قالتالى ازاماتتار قىرۋار قاراجاتىن شەتەلدەردە جاسىرعانشا ەل قاجەتتىلىگى ءۇشىن قازاقستانعا اكەلىپ وزىنە دە, ەلىنە دە پايدا بەرەتىن جۇمىسقا سالسىن. ونداي ازاماتتارعا ەشقانداي قىسىم دا, باسقا ارەكەتتەر دە جاسالمايتىندىعىنا كەپىل بولىپ, سەنىم بەرەتىندىگىن دە ەلباسى اشىق ايتتى. مۇنىڭ ءتۇبى مەملەكەت مۇددەسى ءۇشىن ىستەلىنەتىن يگىلىكتى ءىس ەكەنىن سول ازاماتتار ءتۇسىنۋى كەرەك. ەلباسىنىڭ اسەرلى بايانداماسىندا بىزگە بەرەكە باستاۋى بىرلىكتىڭ, يندۋستريالاندىرۋدىڭ كەرەكتىگى ايقىن اڭعارىلىپ قانا قويماي, جەتە ءتۇسىندىرىلدى. زامان تالابىنا ساي زاڭگەرلەر بىلەك سىبانا ەڭبەك ەتۋلەرى قاجەتتىگى ۇعىندىرىلدى. قورىتا كەلگەندە, ەلباسى بايانداماسىن تىڭداعان سوڭ, ءوزىمنىڭ تۇيگەن ءبىر ويىم – الماتى وبلىسى اگرارلى ءوڭىر بولعاندىقتان, اۋىل شارۋاشىلىعى ونىمدەرى جەتىپ-ارتىلادى. سول ءونىمدى قايتا وڭدەيتىن ءوندىرىس ورىندارى جەتىسۋ جەرىندە دە جارىسا سالىنىپ جاتسا, نۇر ۇستىنە نۇر بولار ەدى. وعان سەنىم دە بار. ويتكەنى, وڭىردە مەملەكەتتىك ساياساتقا ساي اتقارىلىپ جاتقان سان يگى ءىستىڭ كۋاسى بولىپ ءجۇرمىز.
سەرىك مۇقانوۆ,
«نۇر وتان» پارتياسى الماتى وبلىستىق فيليالى توراعاسىنىڭ ءبىرىنشى
ورىنباسارى.