«قازاقمىس» كومپانياسى داعدارىس زامانىنىڭ وزىندە دامۋعا مۇمكىندىك بارىن ىسپەن ءدالەلدەپ كەلەدى. بۇگىنگى كۇندە كاسىپورىن اقتوعاي جانە بوزشاكول كەن ورىندارىن ىسكە قوسۋدى قولعا العان. قازىرگى ۋاقىتتا اتالعان كەن ورىندارى «KAZ Minerals» توبىنا قارايدى. بۇل سوڭعى كەزدە كومپانيادا بولعان قۇرىلىمدىق وزگەرىستەردىڭ ناتيجەسى. جاڭا جىل قارساڭىندا سەمەي وڭىرىندەگى اقتوعاي كەشەنى ىسكە قوسىلىپ, توتىقتاندىرىلعان كەننەن العاشقى كاتودتى مىس الىنعان بولاتىن. جوسپار بويىنشا بيىلعى جارتىجىلدىق ىشىندە ءوندىرىستىڭ قۋاتى جىلىنا 15 مىڭ توننا مىس وندىرەتىن دەڭگەيگە جەتكىزىلمەكشى.
اقتوعاي كەن ورنىن يگەرۋ جۇمىستارى 2012 جىلدان بەرى ءجۇرگىزىلىپ كەلەدى. سول جىلدىڭ جەلتوقسان ايىندا مىس كەنىن ءوندىرۋ جونىندەگى جوبا بەكىتىلىپ, العاشقى جۇمىستار باستالعان بولاتىن. شالعايداعى بوزشاكولدەن بۇل جەردىڭ ايىرماشىلىعى, بولاشاق كومبينات جانىندا ەلەكتر قۋاتىنىڭ جەلىلەرى, كولىك كوممۋنيكاتسياسى سەكىلدى ينفراقۇرىلىمدار دايىن ەدى. قۇرىلىس جۇمىستارىن كەدەرگىسىز باستاۋدا بۇل ايتارلىقتاي قولايلىلىق تۋعىزدى. تاۋ-كەن جابدىقتارى قويىلاتىن ورىنعا دەيىن تەمىرجول, سۋ قۇبىرى تارتىلىپ, ەكى-ءۇش جىل بويى جاڭا كەشەن سالۋ ءجونىندەگى قايناعان ەڭبەك تولاسسىز جۇرگىزىلدى. سونىڭ ناتيجەسىندە وتكەن جىلدىڭ باسىندا كەندى توپتاپ سىلتىلەندىرۋ جانە ەلەكتروليزدەۋ كورپۋستارىنىڭ قۇرىلىسى قولعا الىنىپ, جاڭا جابدىقتار جەتكىزىلە باستادى. ۆاحتالىق كەنت تە سالىنىپ بىتۋگە جاقىن. وسىلايشا كەن ءوندىرىسىنىڭ ۇلكەن جوباسى باس-اياعى ءۇش جىلدىڭ ىشىندە ءىس جۇزىنە اسىرىلدى دەۋگە بولادى. توتىققان كەننەن العاشقى كاتود مىسىنىڭ الىنۋى سونىڭ ايعاعى.
مامانداردىڭ ەسەبىنشە, اشىق ادىسپەن كەن وندىرەتىن اقتوعاي كەشەنى جوباسىنىڭ قۇنى 2,3 ميلليارد دوللاردى قۇرايدى. ءونىمنىڭ وزىندىك قۇنى دا بەلگىلى. قازىرگى بولجام بويىنشا ءبىر توننا مىستىڭ ءوندىرۋ شىعىنى 2200 دوللاردان اينالادى. مۇندا 2017 جىلى ءسۋلفيدتى كەن قۇرامىن وڭدەيتىن فابريكا ىسكە قوسىلماقشى. قازىر قۇرىلىس جانە جابدىقتاۋ جۇمىستارى جالعاسۋدا. العاشقى 10 جىلدىڭ ىشىندە ورتا ەسەپپەن جىلىنا 150 مىڭ توننا مىس ءونىمى الىنۋى ءتيىس. كومبينات تولىق پايدالانۋعا بەرىلگەن كەزدە 1500-دەي ادام ەڭبەك ەتەتىن كەن ورنىنىڭ قورى 50 جىلعا جوبالانعان.
– اقتوعاي كەن بايىتۋ كومبيناتىندا العاشقىدا توتىققان كەندى ءوندىرۋ جانە وڭدەۋ ۇدەرىسى جۇرگىزىلەدى. ءبىزدىڭ كومپانيا ءۇشىن قۋانىشتى ءسات, ايتۋلى وقيعا. كەن ءوندىرۋ, وڭدەۋ كەشەنىندە 2 مىڭداي ادام ەڭبەك ەتكەنىن دە اتاپ ءوتۋ كەرەك. ولاردىڭ باسىم كوپشىلىگى ءوزىمىزدىڭ جۇمىسكەرلەر بولدى, قالعان ەكى پايىزى عانا شەتەلدەن كەلگەن ماماندار, – دەپ اتاپ وتكەن «KAZ Minerals» توبى باسقارماسىنىڭ ءتوراعاسى ولەگ نوۆاچۋك كومپانيا باسپاسوز قىزمەتى تاراتقان حابارلامادا.
قايرات ءابىلدينوۆ,
«ەگەمەن قازاقستان».
قاراعاندى وبلىسى,
جەزقازعان قالاسى.