29 قىركۇيەكتە ەكونوميكانى مودەرنيزاتسيالاۋ جونىندەگى كوميسسيانىڭ كەزەكتى وتىرىسى ءوتتى, دەپ حابارلادى پرەمەر-ءمينيستردىڭ ءباسپاسوز قىزمەتى.
پارلامەنت دەپۋتاتتارى, ورتالىق اتقارۋ ورگاندارىنىڭ باسشىلارى, عىلىمي مەكەمەلەر مەن قوعامدىق ۇيىمداردىڭ وكىلدەرى قاتىسقان وتىرىستا ۇدەمەلى يندۋستريالىق-يننوۆاتسيالىق دامۋدىڭ مەملەكەتتىك باعدارلاماسى شەڭبەرىندە يندۋستريا جانە جاڭا تەحنولوگيالار مينيسترلىگى ازىرلەگەن قازاقستان رەسپۋبليكاسىندا يننوۆاتسيالاردى دامىتۋ جانە تەحنولوگيالىق مودەرنيزاتسيالاۋعا ىقپال ەتۋ جونىندەگى 2010-2014 جىلدارعا دەيىنگى كەزەڭگە ارنالعان باعدارلاما جوباسى تالقىلاندى.
تالقىلاۋ قورىتىندىسى بويىنشا يندۋستريا جانە جاڭا تەحنولوگيالار مينيسترلىگىنە ەنگىزىلگەن ۇسىنىستاردى ەسكەرە وتىرىپ, جوبانى تولىقتىرۋ جونىندە تاپسىرما بەرىلدى.
وڭتۇستىك مەملەكەتتىك شەكارالاردى ودان ءارى نىعايتۋ ماسەلەلەرى جونىندەگى جۇمىس بابىنداعى كەڭەستە قازاقستان رەسپۋبليكاسىنىڭ كەدەن وداعى شەڭبەرىندەگى مىندەتتەمەلەرىن ورىنداۋعا قاتىستى مەملەكەت باسشىسىنىڭ تاپسىرمالارىنىڭ ورىندالۋ بارىسى ءسوز بولدى.