قاسىمىزدا جاساعان جاقسىلىقتارىمەن ماقتانبايتىن مەيىرىمدى, قاراپايىم ءارى ىزگى جانداردىڭ جۇرگەنىن كۇندەلىكتى تىرشىلىك اعىمىمەن بايقاماي دا جاتامىز. دەگەنمەن, ونداي ادامدار بار. تۇرمىسى تومەن وتباسىلارىن قامقورلىعىنا الىپ, جاعدايلارىنان شىعارۋعا تىرىساتىن, كومەك سۇراپ كەلەتىندەردىڭ قولىن قاقپايتىن بۇل كاسىپكەردىڭ ىسكەرلىگى مەن ۇيىمداستىرۋشىلىق قابىلەتى وتە جوعارى. ونىڭ كاسىبي مايتالمان مامان ەكەندىگىن ازعانا ۋاقىت ىشىندە زاۋىت اشىپ, ونى ورلەتە ورگە جۇزگىزگەندىگىنەن-اق بايقايسىز. كاسىپكەرلىككە بەيىم مىنەزى تەز ارادا شەشىم قابىلداپ, جۇمىستى قىسقا ۋاقىتتا ءارى ساپالى ورىنداۋعا سەبەپكەر بولىپ ءجۇر.
ۋاقىت كوشىنەن قالماۋ “يبراەۆ جانە ك” وندىرىستىك كووپەراتيۆىنىڭ توراعاسى عابباس يبراەۆتىڭ كاسىپكەر رەتىندەگى جەتىستىكتەرىنىڭ ءبىرى. ول باسشىلىق جاسايتىن “يبراەۆ جانە ك” وندىرىستىك كووپەراتيۆى 2000 جىلى قۇرىلعان. العاش رەت جۇمىسىن باستاعاندا جوندەۋ تسەحتارىن جالعا العان بولاتىن. تسەحتاردىڭ اتى بار دا زاتى جوق. ىشىندەگى قۇرىلىس جۇمىستا-رىن جۇرگىزىپ, جوعارعى تەحنولوگيالارمەن جاراقتاندىرۋ, كاسىپورىنعا ىسكەر ماماندار تاڭداۋ العاشقى باتىل قادام بولدى. جاڭادان اشىلعان زاۋىتقا جان-جاقتان بىلگىر ماماندار شاقىرىلدى. بۇل باعىتتاعى ەڭ باستى جۇمىس ينجەنەرلىك-تەحنيكالىق قۇرامدى جيناقتاۋ ەدى. اسىرەسە, جۇك ۆاگوندارىن تولىق جانە دەپولىق جوندەۋدەن وتكىزۋ ماڭىزدى بولاتىن. رەسەي مەن ۋكراينادان ءىرى تاپسىرىس بەرۋشىلەرمەن بايلانىس ورناتىلدى. ولار قازاقستاندا وسىنداي ءوندىرىس ورنى اشىلىپ, شىعارعان ونىمدەرى حالىقارالىق دەڭگەيدەگى سۇرانىسقا يە بولادى دەپ ويلاماعان ەكەن. شەتەلدىك ارىپتەستەرى بۇگىندە عابباس توكەش ۇلىنىڭ ىسكەرلىك قابىلەتى مەن ەڭبەگىنە جوعارى باعا بەرۋدە. ءبارىن ايت تا ءبىرىن ايت, “يبراەۆ جانە ك” وندىرىستىك كووپەراتيۆى بۇل كۇندەرى ورلەپ تۇر.
بۇكىل قازاقستانداعى جۇك ۆاگوندارىن جاڭارتۋ ارينە جاعداي كەلىپ, مۇمكىندىك بولىپ جاتسا ۇلكەن ءبىر عانيبەت ءىس. ساپالى ۆاگون جاساۋ ەكىنىڭ ءبىرىنىڭ قولىنان كەلە بەرمەسى انىق. اسىرەسە قاراكوز قازاقتاردىڭ وسىنداي كۇردەلى ءوندىرىستى باعىندىرا ءبىلۋى ەرەكشە قۇبىلىس. قازاقستانداعى ۆاگون جوندەيتىن ەڭ وزىق كاسىپورىنعا جاتاتىن سەمەيدەگى وسىناۋ زاۋىتتا 300 ادام جۇمىس ىستەيدى. كاسىپورىنداعى ەڭ باستى تالاپ – جۇمىستىڭ ساپالى بولۋى. جاقىندا عانا كاسىپورىن جۇك ۆاگوندارىنا اكۋستيكالىق دياگنوستيكا جاسايتىن قىمبات باعالى قۇرالدى ساتىپ الىپ, ىسكە قوسىپتى. ناتيجەسىندە ۆاگوننىڭ قۇرال-سايماندارى بۇرىنعىداي ءۇش جىل ەمەس, جەتى جىلعا دەيىن شىداس بەرەتىن بولعان.
– كاسىپورىندى دامىتۋ ءۇشىن ەكى ۇلكەن جوبانى قولعا الماقشىمىز, – دەيدى عابباس توكەش ۇلى, – ءبىرىنشىسى, ۆاگون جاسايتىن زاۋىت سالۋ, ول ايىنا 250-270 ۆاگون شىعاراتىن بولادى. بۇگىندەرى زاۋىتتىڭ جوباسى اياقتالۋ ۇستىندە, “قازاقستان تەمىر جولى” اق-پەن مەموراندۋمعا قول قويىلعان ساتتەن باستاپ قۇرىلىسى باستالادى. ەكىنشى جوبامىز قازىرگى زامان تالابىنا ساي باسسەين سالۋ.
“يبراەۆ جانە ك” وندىرىستىك كووپەراتيۆىندەگى جۇمىسشىلار ءۇشىن كوپ پاتەرلى تۇرعىن ۇيلەر سالىنىپ, جاقىندا پايدالانىلۋعا بەرىلگەن ەكەن. جىل سايىن جۇمىسشىلارىنا پاتەرلەر, جەڭىل كولىكتەر سىيلاۋ كاسىپورىندا قالىپتاسقان ءداستۇر. تەگىن مەديتسينالىق قىزمەت تە قاراۋىنداعى قاراپايىم جۇمىسشى قاۋىمعا دەگەن ءىلتيپاتتىڭ ءبىر ءتۇرى. عابباس توكەش ۇلى وبلىستىق ءماسليحاتتىڭ دەپۋتاتى. دەپۋتتاتىق جولعا كەلۋىنە ءبىر سەبەپ, الەۋمەتتىك جاعىنان از قورعالعان جانداردىڭ, بالالار ءۇيى مەن سپورت ۇيىمدارىنىڭ كومەك سۇراپ كەلۋى. ال بيزنەسىنىڭ ءساتتى ءجۇرۋى وعان ءبىلىم مەكەمەلەرى مەن اۋرۋحانالارعا, قوعامدىق ۇيىمدار مەن سپورت, مادەني وشاقتارعا كومەك قولىن سوزۋعا مۇمكىندىك بەرەدى. وسىلايشا ول حالىق قالاۋلىسى اتانىپ, قالاداعى قوردالانعان پروبلەمالاردى شەشۋگە اتسالىستى. بۇگىندە قالاداعى №5, 35,42, 20 مەكتەپتەر مەن بالەت مەكتەبى, №3 جانە №5 بالالار ءۇيى ونىڭ تىكەلەي قامقورلىعىندا. ول “پوليگون بالالارى” قوعامدىق بىرلەستىگىنە, ينتەرناتسيوناليست-جاۋىنگەرلەرگە دە دەمەۋشىلىك كومەگىن جاسايدى.
عابباس يبراەۆ “نۇر وتان” حالىقتىق-دەموكراتيالىق پارتياسىنىڭ سەمەي بولىمىندە سىبايلاس جەمقورلىقپەن كۇرەس جونىندەگى قوعامدىق كەڭەستىڭ توراعاسى. پارتيالىق ارىپتەستەرى بۇل جاۋاپتى جۇمىستى وعان زور سەنىممەن تاپسىرعان. ەڭبەكقور, ىسكەر ءارى ادامگەرشىلىگى مەن قايىرىمدىلىعى جوعارى تۇراتىن عابباس اعا بىلتىرعى جىلدىڭ قورىتىندىسى بويىنشا مەتالل وڭدەۋ ءوندىرىسىنىڭ ەڭ ۇزدىك كاسىپكەرى دەپ تانىلعان.
راۋشان نۇعىمانبەكوۆا.