ەقىۇ-نىڭ ءىس باسىنداعى ءتوراعاسى, قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ كەشە ۇيىمنىڭ ۆەناداعى تۇراقتى كەڭەسىنىڭ قىرعىزستانعا پوليتسەيلىك كونسۋلتاتيۆتىك توپتى جولداۋ تۋرالى قابىلداعان شەشىمىن جوعارى باعالادى, دەپ حابارلادى ءسىم-ءنىڭ ءباسپاسوز قىزمەتى.
“قازاقستان باسىنان باستاپ, ۇيىمنىڭ مانداتىنا سايكەس, ەقىۇ-نىڭ قىرعىزستانداعى جاعدايدى رەتتەۋگە بارىنشا ءتيىمدى قاتىسۋىن قولداعانى بەلگىلى. وسى ورايدا ءبىز اۋەل باستان قىرعىزستاننىڭ پوليتسەيلىك كونسۋلتاتيۆتىك توپتى جولداۋ تۋرالى ءوتىنىشىن قولداعان بولاتىنبىز. مەن ەقىۇ-نىڭ بارلىق 56 مۇشە-مەملەكەتى كورەگەندىك تانىتىپ, قىرعىزستانعا پوليتسەيلىك كونسۋلتانتتار جىبەرۋ جونىندە كەلىسىمگە كەلگەندەرىنە جانە ءبىزدىڭ ۆەناداعى وكىلەتتى وكىلدەرىمىزدىڭ شەشىمىمەن راسىمدەلگەنىن شىن نيەتىممەن قولدايمىن. پوليتسەيلىك كونسۋلتاتيۆتىك توپتىڭ جاقىندا قانتوگىس قاقتىعىستاردىڭ ارەناسىنا اينالعان ايماقتاردا بولۋى ەلدەگى سەنىمنىڭ ارتۋىنا, تۇراقتىلىقتىڭ نىعايۋىنا جانە ءتارتىپتىڭ ورناۋىنا ءوز ىقپالىن تيگىزەدى. الماتىدا ءوتكەن ەقىۇ مينيسترلەرىنىڭ بەيرەسمي كەزدەسۋىندە پرەزيدەنت نۇرسۇلتان نازارباەۆ اتاپ ءوتكەندەي, قازاقستان الداعى ۋاقىتتا دا تۋىستاس قىرعىز ەلىنە ەقىۇ ءتوراعاسى رەتىندە دە, ەكىجاقتى فورماتتا دا ءوز قولداۋىن كورسەتە بەرمەك”, دەپ اتاپ كورسەتتى ق.ساۋداباەۆ.
ۇستىمىزدەگى جىلدىڭ 22 ءشىلدەسىندە ەقىۇ-نىڭ تۇراقتى كەڭەسى قىرعىزستانعا پوليتسەيلىك كونسۋلتيۆتىك توپتى شۇعىل ءتۇردە جىبەرۋ تۋرالى شەشىم قابىلداعانى بەلگىلى. ەقىۇ-نىڭ مۇشە مەملەكەتتەرىنىڭ ازاماتتارى ءىشىنەن قۇقىق قورعاۋ سالاسىنىڭ ماماندارى اراسىنداعى جەدەل تۇردە وتكەن ىرىكتەۋدەن كەيىن 52 ادامنان تۇراتىن ءبىرىنشى توپ شامامەن ءتورت ايعا جىبەرىلەتىن بولادى.
قىرعىزستاننىڭ ۇكىمەتى مەن ەقىۇ-نىڭ تۇراقتى كەڭەسىنىڭ شەشىمى بويىنشا ميسسيانىڭ مەرزىمى, سونىمەن قاتار قاتىسۋشىلاردىڭ سانى كوبەيۋى مۇمكىن.
17 شىلدەدە الماتىدا وتكەن ەقىۇ-نىڭ سىرتقى ىستەر مينيسترلەرىنىڭ بەيرەسمي كەزدەسۋىنىڭ سوڭىندا قىرعىزستانعا پوليتسەيلىك كونسۋلتيۆتىك توپتى جىبەرۋ تۋرالى مۇشە مەملەكەتتەر اراسىندا كەلىسىمگە قول جەتكىزىلگەنى تۋرالى حابارلانعان بولاتىن.