ەلباسى «ۇلت جوسپارى – 100 قادام: بارشاعا ارنالعان قازىرگى زامانعى مەملەكەت» اتتى بەس ينستيتۋتتىق رەفورماسىن جاريالادى. بۇل – مەملەكەتتى زاماننىڭ داۋىلى مەن جاۋىنىنا ۇرىندىرماي, ەلىمىزدى وركەنيەت كوشىنە ىلەستىرىپ, دامۋىن ودان ءارى جالعاي بەرەتىن باياندى جوسپار. وندا كاسىبي مەملەكەتتىك اپپارات قۇرۋ, زاڭ ۇستەمدىگىن قامتاماسىز ەتۋ, يندۋستريالاندىرۋ جانە ەكونوميكالىق ءوسىم, بىرتەكتىلىك پەن بىرلىك, ەسەپ بەرەتىن مەملەكەت قالىپتاستىرۋ سەكىلدى قاداۋ-قاداۋ ماسەلەلەر ايتىلعان.
باعدارلامادا ايتىلعان ماسەلەلەردىڭ بارلىعىن حالىق جاپپاي قولدايدى. ويتكەنى, بۇل زامان تالابىنا ساي جاسالىپ وتىرعان رەفورما. ال ونى جۇزەگە اسىرۋ ءۇشىن ەلدىڭ بىرلىگى مەن ىنتىماعى اۋاداي قاجەت. سوندىقتان, 130-دان استام ۇلت پەن ۇلىس مەكەندەيتىن قازاقستاندا حالىق اراسىنداعى دوستىقتى نىعايتا بەرۋ كەرەك. بۇل رەتتە ەلباسىنىڭ «ۇلت جوسپارىندا» ناقتى ايتىلعان. بۇگىندە «نۇرلى جولعا» تۇسكەن قازاقستاننىڭ ەڭ بيىك مۇراتى «ماڭگىلىك ەل». تاۋەلسىزدىگىمىزدى تۇعىرلى, مەملەكەتتىلىگىمىزدى عۇمىرلى ەتۋ بارىسىندا ۇلكەن جوبالار قولعا الىندى. سونىڭ ءبىرى – «ماڭگىلىك ەل» پاتريوتتىق اكتسياسى.
مەملەكەت باسشىسى اتالعان اكتسيانى ودان ءارى دامىتا بەرۋدى تاپسىرىپ وتىر. سونىمەن قاتار, ازاماتتىق بىرتەكتىلىكتى نىعايتۋ ءۇشىن «مەنىڭ ەلىم» ۇلتتىق جوباسىن ازىرلەپ, جۇزەگە اسىرۋدى مىندەتتەدى. وسى جوبانىڭ نەگىزىندە «قازاقستان ەنتسيكلوپەدياسى» اتتى كەڭ كولەمدى ينتەرنەت پورتالى قۇرىلادى. مۇنداعى ماقسات ءاربىر قازاقستاندىق ازامات پەن شەتەلدىك قوناقتارعا ەلىمىز تۋرالى جان-جاقتى اقپاراتپەن تانىستىرۋ بولىپ تابىلادى. پورتالدا قازاقستاننىڭ 3D بەينە تۋرلارى, ەلدىڭ تاريحى مەن مادەنيەتى, قىزىقتى وقيعالار مەن قاراپايىم ادامداردىڭ ءومىرى جايىندا اقپاراتتار جاريالانادى. ءبىر سوزبەن ايتقاندا, پورتال قازاقستاننىڭ «ساپارناما كارتوچكاسىنا» اينالادى.
وسى كەزەڭگە دەيىن ەلىمىزدەگى ۇلتارالىق بىرلىكتى ساقتاپ, ءبىرتۇتاس حالىق جاساقتاۋعا بايلانىستى ۇلكەن جۇمىستار اتقارىلدى. ءبىر عانا قازاقستان حالقى اسسامبلەياسىنىڭ قۇرىلىپ, وسى بىرەگەي ينستيتۋتتىڭ توڭىرەگىنە ءتۇرلى ۇلتتىڭ باسىن بىرىكتىرۋدىڭ ءوزى ايتۋعا وڭاي بولعانمەن, ءىس جۇزىندە اۋىر جۇمىس. دەگەنمەن, قازاقستان ونى ءوز قولىمەن جاساپ شىقتى. ال بەس ينستيتۋتتىق رەفورما بارىسىندا بۇل تاراپتاعى جۇمىس ءتىپتى جاندانا تۇسەدى دەگەن ويدامىن.
تيمۋر قاسىموۆ,
وبلىستىق «كىزىلوردينسكيە ۆەستي» گازەتىنىڭ باس رەداكتورى.
قىزىلوردا وبلىسى.