كوكشەتاۋ. 25 تامىز. كوكشەتاۋدا قازاقستان رەسپۋبليكاسى پارلامەنتى ءماجىلىسى توراعاسىنىڭ ورىنباسارى سەرگەي دياچەنكو «نۇر وتان» پارتياسىنىڭ اقمولا وبلىستىق فيليالىندا ازاماتتاردى جەكە ماسەلەلەرىمەن قابىلدادى. وندا اركىم ءوزىن تولعاندىرعان ماسەلەلەردى ورتاعا سالىپ, پارلامەنت وكىلىنەن كومەك قولىن سوزۋىن سۇرادى. بۇل تۋرالى egemen.kz ءتىلشىسى حابارلادى.
الدىمەن ازاماتشا شىنار عابباسوۆا ۇسىنىسپەن جۇگىندى. ول ءوزىنىڭ جۇبايى ءبىرىنشى توپتاعى مۇگەدەك ەكەنىن ايتىپ, بەس ادام اياداي ءبىر بولمەلى پاتەردە قىسىلىپ-قىمتىرىلىپ تۇرىپ جاتقاندارىن جەتكىزدى. بىراق, ءوزىنىڭ پاتەر سۇراپ كەلمەگەنىن تىلگە تيەك ەتتى. سەبەبى, وسىعان دەيىن قالالىق اكىمدىكتە بولىپ تۇرعىن ءۇي الۋدىڭ جاعدايىمەن دە تانىسادى. زاڭ بارىنە ورتاق. ەشكىمگە كەزەكتى اتتاتىپ پاتەر كىلتىن قولىنا ۇستاتا قويمايدى. سوندىقتان, قر «تۇرعىن ءۇي قاتىناستارى تۋرالى» زاڭىنا وزگەرتۋلەر ەنگىزىلسە دەگەن ۇسىنىسىن الا كەلىپتى. مۇنداعى ويى الەۋمەتتىك تۇرعىدا از قامتىلعان توپتاعى تۇرعىندارعا جەرگىلىكتى اتقارۋشى ورگاندار جەكەلەگەن تىزىمدەر جۇرگىزسە دەگەن تىلەك.
ءوز كەزەگىندە سەرگەي دياچەنكو بۇل ماسەلەگە زاڭ قابىلداۋ كەزىندە باسا نازار اۋدارىلاتىنىن ايتتى. ول كوپتىڭ ورتاق پىكىرىمەن شەشىلەتىن ماسەلە دەدى.
ششۋچينسك قالاسىنىڭ تۇرعىنى الەكساندر بويكونىڭ تالاي شەكپەندىنىڭ تابالدىرىعىن توزدىرىپ جۇرگەنىنە دە بىرسىدىرعى ۋاقىت بولىپتى. ءوزى ەلىمىزدىڭ ەڭبەك سىڭىرگەن تۋريزم نۇسقاۋشىسى ەكەن. ا.بويكو جۇمىسسىزدار سانىن قىسقارتۋدا بۋراباي كۋرورتتى ايماعىندا تۋريزم جانە بۇقارالىق دەمالىس يندۋسترياسىن دامىتۋ قاجەتتىگىن ايتادى. وسىنىڭ ىشىندە, «ششۋچينسكي» ساناتورياسىن قۇرىلىمدىق وزگەرىستەرگە ءتۇسىرۋ جونىندە كاسىپوداقتاردىڭ رەسپۋبليكالىق فەدەرەتسياسىنا جولداعان جازباشا شاعىمى ونىڭ جۇمىستان بوساتىلۋىنا نەگىز بولعان كورىنەدى.
ال, اللا ميشينا ەلىمىزدىڭ سولتۇستىك وڭىرلەرىندە بۇرىنعى كەڭەس زامانىنداعىداي جالاقىعا 15 پايىزدىق ۇستەمەاقى بەرىلسە دەيدى. ويتكەنى, ءبىزدىڭ جاقتىڭ تابيعاتى دا قاتال, قىسى دا ۇزاق. ادامدارعا كوممۋنالدىق شىعىندى وتەۋ دە وڭايعا سوقپايدى.
پارلامەنت وكىلى بۇل ۇسىنىستى دا نازارعا الاتىنىن جەتكىزدى.
ءماجىلىس توراعاسىنىڭ ورىنباسارى قازىرگى تاڭدا بيۋدجەت قاراجاتىن مەيىلىنشە ءتيىمدى جۇمساۋعا باعىت ۇستالعانىن ايتا كەلىپ, پارلامەنت تالقىلاۋىنداعى زاڭدىق اكتىلەر جونىندە حاباردار ەتتى.
ۆيتسە-سپمكەرمەن بىرگە قوعامدىق قابىلداۋعا پارلامەنت سەناتىنىڭ دەپۋتاتى راشيت اكىموۆ تە قاتىسىپ, سايلاۋشىلار سۇراقتارىنا جاۋاپ قايتاردى.
باقبەرگەن امالبەك.
دەرەك, سۋرەت: egemen.kz