ساۋلەتتى ءومىر كەپىلى

تۋعان ەلىمىزدىڭ, ۇلى وتانىمىزدىڭ تاريحىندا التىن ارىپتەرمەن جازىلار شۋاقتى كۇننىڭ ءبىرى – 30 تامىز. وسى كۇنى قازاقستان رەسپۋبليكاسىنىڭ اتا زاڭى ومىرگە كەلدى. 16 جەلتوقساندا قازاق ەلى ءوز تاۋەلسىزدىگىن جاريالاپ, ىرگەلى جۇرت ەكەنىن تانىتسا, 30 تامىزدا تاۋەلسىزدىگىمىزدى زاڭمەن قورعايتىن اتا زاڭىمىز دۇنيەگە كەلدى. ەلىمىز ءۇشىن تاۋەلسىزدىك كۇنى قانشالىقتى قۇرمەتتى بولسا, بۇل كۇن دە سونشالىقتى ارداقتى. ال بيىلعى جىلى بۇل كۇن ەكى ەسە نۇرلى, ەكى ەسە شۋاقتى. سەبەبى, بيىلعى جىلى اتا زاڭىمىزعا تۋرا جيىرما جىل. قاسىم حاننىڭ قاسقا جولىنىڭ, ەسىم حاننىڭ ەسكى جولىنىڭ, ءاز تاۋكەنىڭ «جەتى جارعىسىنىڭ» مۇراگەرى – تاۋەلسىز ەلدىڭ اتا زاڭىنا 20 جىل تولدى. وسىدان 20 جىل بۇرىن بۇكىلحالىقتىق رەفەرەندۋم ناتيجەسىندە قازاقستان حالقى ءوز تاڭداۋىن جاساپ, ءوز اتا زاڭىن تاڭداپ العان بولاتىن. مىنە, وسى اتا زاڭىمىز 20 جىل ەلىمىزگە قالتقىسىز قىزمەت ەتىپ كەلەدى. اتا زاڭىمىز – ساۋلەتتى ءومىردىڭ كەپىلى. بۇعان ءاربىر قازاقستاندىق سەنەدى. عاسىرلار توعىسىندا ماڭگىلىك ەل – قازاقستاننىڭ اتا زاڭى ومىرگە كەلدى. تاۋەلسىزدىگىمىزدىڭ تۇعىرلى بولماعىنا اتا زاڭىمىزدىڭ قوسار ۇلەسى زور, قوسقان دۇنيەسى دە مول. تاۋەلسىزدىگىمىزدىڭ 24 جىلىنا اياق باسقان ورتاق وتانىمىز قازاقستاننىڭ گۇلدەنۋى جولىندا اتا زاڭ باعىت بەرۋشى تەمىرقازىق ىسپەتتەس. اتا زاڭ – مەملەكەتتىڭ قۇقىقتىق جۇيە­سىنىڭ مايەگى, قاينار بۇلاعى. سەبەبى وزگە زاڭ اتا زاڭ نەگىزىندە عانا جۇزەگە اسىرىلادى. كونستيتۋتسيامىزدا كۇندەلىكتى كۇيبەڭ تىرشىلىكتە قولدانىلاتىن دۇنيە­لەردەن باس­تاپ, مەملەكەتتىڭ ساياسي ستراتەگياسىنا دەيىن تولىق قوزعالعان. ءبىزدىڭ اتا زاڭىمىزدىڭ باستى نىسانى – ادام ءومىرى جانە ادام قۇقىقتارى. «مەملەكەتتىڭ باستى بايلىعى – ادام» دەگەن ۇراندى العان التى الاشتىڭ قۇقىعىن قورعاپ, ادامزاتتىڭ مۇددەسىن ماقسات تۇتقان اتا زاڭىمىز – ساۋلەت­تى ءومىردىڭ كەپىلى. بۇعان ءاربىر قازاقستاندىق سەنەدى. ازات ەلىمىزدىڭ ايبارلى ار-نامىسىنىڭ قورعاۋشىسى ءارى قولداۋشىسى – اتا زاڭ. ەلباسى نۇرسۇلتان ءابىش ۇلى نازارباەۆ ءوز سوزىندە «كونستيتۋتسيا ءبىزدىڭ تاۋەل­سىز­دىگىمىزدى نىعايتتى, مەملەكەتتى جانە بۇكىل قوعامدى بەرىك ەتتى. سوندىقتان دا, ءبىزدىڭ ورتاق پارىزىمىز – نەگىزگى زاڭعا قۇنتتىلىقپەن قاراۋ, ونى ءوز وتانىمىزدى, ءوز تاريحىمىزدى قۇرمەتتەگەندەي قۇرمەت­تەۋ» دەپ اتاپ ايتقان بولاتىن. تۇعىر­لى تاۋەلسىزدىگىمىزدىڭ, مەرەيلى مەملە­كەتتىگىمىزدىڭ كەپىلى – ايبارلى اتا زاڭىمىز. ءبىزدىڭ اتا زاڭىمىزدا ادام قۇقىقتارى تولىقتاي قورعالعان. بۇل اتا زاڭىمىزدىڭ ءىى بولىمىندە تولىقتاي ايتىلعان. وسى ءبولىمنىڭ 12-بابىندا «ادام قۇقىقتارى مەن بوستاندىقتارى اركىمگە تۋمىسىنان جازىلعان, ولار ءابسوليۋتتى دەپ تانىلادى, ولاردان ەشكىم ايىرىلا المايدى, زاڭدار مەن وزگە دە نورماتيۆتىك قۇقىقتىق اكتىلەردىڭ مازمۇنى مەن قولدانىلۋى وسىعان قاراي انىقتالادى», دەپ جازىلعان. قازىرگىدەي زىمىراپ اققان جۇلدىزداي جەدەل دامىعان زاماندا جاھاندىق دامۋ كوشىنەن قالىسپاي, دامۋدىڭ داڭعىل جولىنا تۇسكەن بولساق, بۇل دا اتا زاڭىمىزدىڭ سالاماتتى ءومىر كەپىلى ەكەندىگىنىڭ دالەلى. اتا زاڭىمىزدى قابىلدار الدىندا «ءبىز, ورتاق تاريحي تاعدىر بىرىكتىرگەن قازاقستان حالقى, بايىرعى قازاق جەرىندە مەملەكەتتىلىك قۇرا وتىرىپ, ءوزىمىزدى ەركىندىك, تەڭدىك جانە تاتۋلىق مۇراتتارىنا بەرىلگەن بەيبىتشىل ازاماتتىق قوعام دەپ ۇعىنا وتىرىپ, ءوزىمىزدىڭ ەگەمەندىك قۇقى­عىمىزدى نەگىزگە الا وتىرىپ, قازىرگى جانە بولاشاق كونستيتۋتسيانى قابىلدايمىز» دەگەن ۇلى ماقسات قويعان بولاتىن. قازاقستان حالقى سول ۇلى ماقساتىنا قول جەتكىزە ءبىلدى.  باقىتجان وتارباەۆا, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى جۋرناليستيكا فاكۋلتەتىنىڭ ستۋدەنتى.