ءبىر ءۇي – ءبىر ەل
ءۇيدىڭ بەرەكەسى قابىرعاسىنىڭ قيۋىمەن ەمەس, تەڭىنىڭ جيۋىمەن, وتباسىنداعى سىيلاستىقپەن, تاتۋلىقپەن كىرەدى.نۇرسۇلتان نازارباەۆ.
ولكەنىڭ, اتىراپتىڭ, ەلدىڭ تىرەگى ەمەس پە بايتەرەكتەي جايقالعان اۋلەتتەر. اقجايىق اۋدانىنداعى ساقىپكەرەي مەن كۇلان جانتۋريندەردىڭ شاڭىراعى سولاردىڭ ءبىرى بولىپ تابىلادى. 1961 جىلى وتاۋ تىككەن ولاردىڭ باي ەڭبەك جولى دا, ءتالىمدى تۇرمىسى دا ناعىز ونەگە مەكتەبى دەرسىڭ. ەڭبەك دەمەكشى, بۇگىندە مارقۇم ساقىپكەرەي اعانىڭ دا, قازىر ءۇش نەمەرە, التى جيەن, ءبىر شوبەرەنىڭ باعىنا بولەنگەن كۇلان انانىڭ دا باسىن قايىرماعان شارۋا جوق. اۋدان ورتالىعى – چاپاەۆتىڭ ىرگەسىندەگى جايىق اۋىلىندا سوناۋ جىلدارى شارۋاشىلىقتاعى مال بورداقىلاۋدىڭ بەل ورتاسىندا بولدى. كۇلان انا اۋداندىق كەڭەستىڭ دەپۋتاتتىعىنا دا سايلانىپ, ورتاق مۇددە ورايىندا قىرۋار ءىس تىندىردى. بەۋ, جىلدار-اي دەيسىڭ. ۇلى وتان سوعىسى كەزىندە, 1944 جىلى وپات بولىپ, تەرنوپول وبلىسى, ۆەربيششا سەلوسى ماڭىنا جەرلەنگەن اكەسى حامزا سەكىلدى جەڭىس ساربازدارىنىڭ رۋحىن ايالاپ, التى ۇل-قىزىن, بۇگىندە ولاردان وربىگەن ۇرپاقتى ەلجاندىلىققا, ەڭبەكقورلىققا, ەلگەزەكتىككە, جاۋاپكەرشىلىككە باۋلىعان ونىڭ اۋلەتىن اقجايىقتىقتار ماقتان تۇتادى. مۇنداي وتباسىلار ءاماندا تاعزىمنىڭ تورىندە, قۇرمەتتىڭ ورىندە. بالا تاربيەسىندە ءوزىنىڭ اناسى, 105 جاس جاساپ, باقيلىققا اتتانعان, اۋداننىڭ شەجىرەسىن جاتقا سوققان قاپيزا احمەتوۆانىڭ ورنى زور بولعانىن كۇلان انا ماقتانىشپەن ايتادى. وزىنەن بۇرىنعىلاردىڭ ەڭبەكتى اماناتتاعانىن دا ۇرپاعىنىڭ قۇلاعىنا قۇيىپ وتىرادى. ەڭبەك دەسە ەلەڭدەپ تۇراتىن, بۇگىندە ەل اعاسى جاسىنا تاياعان ۇلى ءالىپقاليدىڭ ارقاسىندا 20 شاقتى ءىرى قارا, 40 شاقتى ۋاق جاندىق, قىلقۇيرىق تا ءوسىرىپ, سونىڭ يگىلىگىن كورىپ وتىرعانى دا سوندىقتان. مەكتەپتەگى ساباقتان قالت ەتكەندە كىشكەنتايلار مال باعىمىنا جاعالاسىپ جۇرەدى. شىركىن, سونداعى التىن بەسىك اۋىلدىڭ سۋرەتىن ايت! – ادامعا كەرەك نارسە كوپ. بىراق, بالاپاندار – بالاعا جەتەتىن نە بار دەيدى, – كۇلان جانتۋرينا. بۇل سوزگە نە الىپ-قوسارسىڭ. بولات ەسقاليەۆ.باتىس قازاقستان وبلىسى. اقجايىق اۋدانى. چاپاەۆ اۋىلى. قازاقستانىم – قاراشاڭىراعىم اۋلەتتىڭ يەسى افليات ديامۋرشاەۆ قارماقشى اۋدانىنداعى ءىىى ينتەرناتسيونال اۋىلىنداعى «باار» ۇيىرمەسىنە جەتەكشىلىك ەتەدى. ايتا كەتۋ كەرەك, افلياتتىڭ اكەسى تەلمان «قارماقشى اۋدانىنىڭ قۇرمەتتى ازاماتى» بولعان. ديامۋرشاەۆتاردىڭ شاڭىراعىندا ءتورت بالا بار. تۇڭعىشى دافليات بيىل قىزىلوردا قالاسىنداعى قورقىت اتا اتىنداعى مەملەكەتتىك ۋنيۆەرسيتەتتى ءتامامدايدى. شەحناز «بولاشاق» ۋنيۆەرسيتەتىنىڭ ءىىى كۋرس ستۋدەنتى, يسلام شىمكەنت قالاسىنداعى رەسپۋبليكالىق اسكەري مەكتەپ-ينتەرناتتا وقيدى. نۇرسۇلتان 4 جاستا. افليات پەن گوكچاك ديامۋرشاەۆتار – قازاقستاننىڭ ءوسىپ-ءوركەندەۋىن جان-تانىمەن قالايتىن, ەلىمىزدىڭ ءاربىر جەتىستىگىنە شىن قۋاناتىن ادامدار. ويتكەنى, ولار ءوزدەرىنىڭ تاعدىرىن قازاقستاننان ءبولىپ قاراي المايدى. ەرجان بايتىلەس, «ەگەمەن قازاقستان». قىزىلوردا وبلىسى.