بۇگىنگىنىڭ ستۋدەنتى ساباقتان تىس نەمەن اينالىسادى؟ بوس ۋاقىتىن قالاي وتكىزەدى؟ جالپى, ولاردى نە قىزىقتىرادى؟ تەحنولوگياڭىز كوز ىلەسپەس جىلدامدىقپەن دامىپ, الەۋمەتتىڭ ومىرىنە الەۋمەتتىك جەلىلەر ارالاسقان مىنا زاماندا مۇنداي سۇراقتاردى قويۋدىڭ ءوزى ابەستىكتەي كورىنەر. «ۆكونتاكتەدە» ءان تىڭداپ, «فەيسبۋكتە» پىكىرتالاس ۇيىمداستىرىپ, «تۆيتتەردە» ءار نارسەنى تۇرتكىلەپ, «ينستاگرامدا» سۋرەتتەرىمەن ءبولىسىپ وتىراتىن ستۋدەنتتەر جەتكىلىكتى. ولاردىڭ بوس ۋاقىتى وسىلاي ءوتىپ جاتقانى دا جاسىرىن ەمەس. ال وسىدان پايدا بار ما؟ بار شىعار. بىراق از. ەندى جاستاردىڭ بويىنا ءجونى ءتۇزۋ, ۇلتتىق بولمىستاعى ءتالىم-تاربيە بەرىپ, ادامگەرشىلىك قاسيەتتەرگە قالاي باۋلۋعا بولادى؟ ول ءۇشىن نە ىستەۋ كەرەك؟
جاستار تاربيەسىنە قاتىستى سان-قيلى سۇراقتىڭ جاۋابىن قىزىلورداداعى «بولاشاق» ۋنيۆەرسيتەتى تاۋىپ وتىر. اسىرا ايتقاندىق ەمەس, بۇل. ۋنيۆەرسيتەتتىڭ عىلىمي جەتەكشىسى باقبەرگەن دوسمامبەتوۆ وسىدان ءبىر جىل بۇرىن وقۋ ورنىنان ستۋدەنتتىك تەاتر اشتى. ماقسات – جاستاردى ونەرگە تاربيەلەۋ. ونەر دەگەنىڭىز تاربيەنىڭ تورەسى ەمەس پە؟! سولايشا, ستۋدەنتتەر ترۋپپاسى جاساقتالدى. ەڭ ءبىرىنشى قويىلىمىنا يسرايىل ساپاربايدىڭ «اۋىلدان كەلگەن ارۋ» پەساسىن تاڭداپ الىپتى. تۇساۋكەسەردىڭ الدىندا اقىنمەن «مارتەبەلى مەيمان» اتتى جوبانىڭ شەڭبەرىندە كەزدەسۋ وتكىزدى. وعان ەڭ العاش اقىن ءرولىن سومداعان بايعالي ەسەناليەۆ تە قاتىستى. قىسقاسى, ادەمى ءبىر رۋحاني كەش بولدى. ستۋدەنتتەر تەاترىنىڭ تۇڭعىش پرەمەراسى دا كەرەمەت ءوتتى. جاستار زالدان زور اسەرمەن شىقتى.
ودان كەيىن ليديا ەگەمبەرديەۆانىڭ «قالتالى كۇيەۋ, قايداسىڭ؟» اتتى پەساسىن ساحنالادى. بۇل دا بۇگىنگى ءومىردى سومدايتىن, جاستارعا وي سالاتىن, كەرى ادەتتەردەن اۋلاق جۇرۋگە شاقىراتىن, ءتالىم-تاربيەسى زور قويىلىم ەدى. جاستار سول ۇدەدەن شىقتى. ال تەاتردىڭ ءۇشىنشى قويىلىمى رەتىندە جۇماگۇل سولتيەۆانىڭ «ادامدى شايتان ازعىرسا...» اتتى ميستيكالىق سپەكتاكلى تاڭدالدى. ءبىر جىلدا ءۇش بىردەي سپەكتاكل قويۋ دەگەنىڭىز – ۇلكەن جەتىستىك. ونىڭ ۇستىنە جۇماگۇل سولتيەۆانىڭ ميستيكالىق باعىتتا جازىلعان پەساسىن ساحنالاۋدىڭ ءوزى ەرلىك. ويتكەنى, بۇل جانرعا كاسىبي تەاترلاردىڭ ءوزى اياعىن اڭداپ باسىپ بارادى.
«بولاشاقتىڭ» جاستارى «ادامدى شايتان ازعىرسا...» اتتى قويىلىمىمەن پاۆلوداردا وتكەن ستۋدەنتتىك تەاتر ۇجىمدارىنىڭ حالىقارالىق فەستيۆالىنە باردى. قازاقستان حالقى اسسامبلەياسىنىڭ 20 جىلدىعى اياسىندا وتكەن فەستيۆالعا قازاقستان, رەسەي, ۋكراينا سەكىلدى ەلدەردەن 11 جوعارى وقۋ ورىندارىنىڭ ۇجىمدارى قاتىستى. وسىنداي الامان جارىستا قۇرىلعانىنا ءبىر جىل ەندى بولعان, ەشقانداي اكتەرلىك ءبىلىمى جوق «بولاشاق» ۋنيۆەرسيتەتىنىڭ ستۋدەنتتەرى ەكىنشى ورىندى جەڭىپ الدى. ازعانتاي عانا ۋاقىتتىڭ ىشىندە وسىنداي جەتىستىككە جەتكەن ستۋدەنتتەردىڭ تالابى زور. تەاتردىڭ رەجيسسەرلەرى, نارتاي بەكەجانوۆ اتىنداعى وبلىستىق دراما تەاترىنىڭ ارتىستەرى قانات ارحاباەۆ پەن اسەل بايمۇحانوۆا فەستيۆالدان زور اسەر الىپ قايتقاندارىن ايتادى. ال ستۋدەنتتەر تەاترىنىڭ ارتىستەرى ۇلكەن تاجىريبە جيناپ, قاناتتانىپ, كەلەر جولى باس جۇلدەمەن ورالۋعا ۋادە ەتىپ وتىر. بۇل تاراپتا ۋنيۆەرسيتەت باسشىلىعى دا جان-جاقتى قولداۋ كورسەتەتىندەرىن ءمالىم ەتتى. «الداعى ۋاقىتتا ستۋدەنتتەرىمىزدى تەك قازاقستاننىڭ شەڭبەرىندەگى عانا ەمەس, شەتەلدەردە وتەتىن حالىقارالىق فەستيۆالدارعا دە جىبەرەمىز», – دەيدى ۋنيۆەرسيتەت رەكتورى عالىمجان كالەنوۆ.
قازىر قازاقستاندا جەكەمەنشىك جوعارى وقۋ ورىندارى كوپ. وندا قانشاما جاس ءبىلىم الىپ جاتىر. «بولاشاق» ۋنيۆەرسيتەتىنىڭ مىنا باستاماسى سولارعا ۇلگى بولسا ەكەن دەيمىز. ستۋدەنتتەرىن بەلگىلى ءبىر ماماندىق بويىنشا وقىتىپ قويماي, ونەرگە تاربيەلەپ, بويلارىنا ادامگەرشىلىك, يبا, يمان, يناباتتىلىق قاسيەتتەردى سىڭىرسە دەگەن تىلەك بار.
ەرجان بايتىلەس, «ەگەمەن قازاقستان».
قىزىلوردا وبلىسى.