ەلوردالىق جاستار تەاترى ۇلى جەڭىستىڭ 70 جىلدىعى قۇرمەتىنە قازاقستاننىڭ ەڭبەك سىڭىرگەن قايراتكەرى نۇرقانات جاقىپبايدىڭ ساحنالاۋىمەن ساكەن ءجۇنىسوۆتىڭ «جارالى گۇلدەر» شىعارماسى نەگىزىندە «تىراۋ-تىراۋ, تىرنالار» قويىلىمىن تارتۋ ەتتى.
كەيىپكەرلەردىڭ ءرولىن سومداعان ارتىستەر دە, ءبىز دە سوعىس كورمەدىك. الايدا, ساحناداعى كورىنىس قاراپايىم كورەرمەننىڭ بىردە كوزىنە جاس ۇيىرتسە, ەندى بىردە كۇلكىگە كومدىرىپ وتىردى. بۇرىن سوعىس كورگەن قاريالاردىڭ كوزى كۇننەن كۇنگە سيرەپ بارا جاتىر دەۋشى ەدىك, بيىلعى 70-جىلدىق مەرەكەدە ولار ءتىپتى سەلدىرەپ, اق سامايلى ارداقتى ارداگەرلەر الىستاعى ساعىمعا ۇقساپ بارا جاتقان تارىزدەندى. جاستار تەاترى ۇسىنعان «تىراۋ-تىراۋ, تىرنالار» دراماسىن تاماشالاعاننان كەيىن ەشكىم دە, ەشتەڭە دە ۇمىتىلمايتىنىنا تاعى ءبىر مارتە كوزىمىز جەتىپ, ساربازدار رۋحىن جاڭعىرتقان ساحنالىق تۋىندىنىڭ اسىرەسە, ءوسىپ كەلە جاتقان كەيىنگى جاس ۇرپاق ءۇشىن تاربيەلىك ءمانى وتە زور ەكەندىگىن كوڭىلگە تۇيدىك. ارامىزدا سوعىس تاقىرىبىن ەسكىرىپ, كەلمەسكە كەتكەن تاقىرىپ دەپ تۇسىنەتىندەر بار. ءتىپتى, جىلىنا ءبىر-اق رەت كەلەتىن مەرەكەدە ولارعا جاسالىپ جاتاتىن ازىن-اۋلاق يشاراتتىڭ ءوزىن كوپ كورەتىندەر كەزدەسەدى.
اكەلەرى سوعىسقا اتتانىپ, وزدەرى ەگىن دالاسىندا ەڭبەك ەتەتىن ءبىر اۋىلداعى بەس بالانىڭ تاعدىرىن سۋرەتتەيتىن تۋىندى, ءسوز جوق, كوكەيكەستى, ءساتتى تۋىندى. قويىلىمداعى باقىتتى (سىبىزعى) سومداعان مەيىرعات امانگەلدين, بويىنىڭ قىسقالىعى ءۇشىن دوستارى پيپين كوروتكي اتاعان قاسىم – ەربول تلەۋكەنوۆ, قوجاناسىر-اپلاش – ەلدوس شايكەنوۆ, كەڭىردەك-بالتاش –دانيار ورازاەۆ, شەگىرتكە-بالشەكەر – ناۋرىز ساباعاتوۆا, تاۋريد ەمما يۆانوۆنا – ماحاببات مادعۇلوۆا, باتتال – باحىت حادجىباەۆ, مەكتەپ ديرەكتورى-گۇلسىم – اينۇر راحيپوۆا, ۆوەنكوم – ازامات ەسقۇلوۆ سىندى تالانتتى جاستار ونەرى كوز الدىڭىزعا سوعىس جىلدارىنداعى ەگىس القابىنىڭ تىنىس-تىرشىلىگىن شىنايى ەلەستەتىپ, اكە مەن انانىڭ قادىرىن جەتە باعالاي بىلۋگە, ەل مەن جەردى ەرەكشە سەزىممەن سۇيۋگە ۇندەيدى. ادامي قۇندىلىق ازداپ السىزدەنگەن قازىرگىدەي كۇردەلى كەزەڭدە دراماداعى مەيىرىم مەن شاپاعات, دوستىققا ادالدىق پەن تازا ماحاببات, اتا-اناسىنان ايىرىلعان تۇل جەتىمدى بالا دەمەي, شاڭىراقتىڭ شىن يەسى تۇتۋ سياقتى قاسيەتتەردى قالىڭ ەلدىڭ قاپەرىنە سالا وتىرىپ, ومىرلىك ماڭىزدى ماسەلەنى العا تارتقان قويىلىم وسى تۇرعىدان العاندا, زاماناۋي, بۇگىنگى كۇننىڭ تىنىسىنا ابدەن لايىق دەگەن باعاعا ساي.
«تىراۋ-تىراۋ, تىرنالار» دراماسىنا وزەك ەتىلگەن جازۋشى-دراماتۋرگ ساكەن ءجۇنىسوۆتىڭ «جارالى گۇلدەر» تۋىندىسى دراماتۋرگيالىق شىعارما رەتىندە قيلى قىرىنان زەرتتەۋ نىسانى بولا الدى, بىرنەشە عىلىمي ەڭبەكتەردىڭ تاقىرىبىنا ارقاۋ بولدى. تەاتر ساحناسىنا كۇلدىبادام دۇنيەلەردىڭ بۇتىندەي ءسىڭىپ كەتۋى ەكىتالاي دەسەك, بۇل رەتتە قويۋشى-رەجيسسەر نۇرقانات جاقىپبايدىڭ شىعارماشىلىعى سول ويعا ءبىزدى دە تاعى ءبىر تابان جاقىنداتا تۇسەدى. سوندىقتان ءبىز درامانىڭ كورەرمەن تاراپىنان ءساتتى قابىلدانىپ, تانىلۋى, ەكىنشى تىنىسىنىڭ اشىلۋى ءبىرىنشى كەزەكتە رەجيسسەر ەڭبەگىنىڭ ارقاسى دەگەن تۇجىرىمدى تارتىنباي العا تارتا الامىز. ويتكەنى, «تىراۋ-تىراۋ, تىرنالار» سپەكتاكلىن قاي قىرىنان ءسوز ەتسەك تە, ۇلكەن قوشەمەت پەن قۇرمەتكە لايىق. وسى ورايدا رولدەرگە اكتەرلەر وتە دۇرىس تاڭدالعان دەۋ قيسىندى. ولاردىڭ قاي-قايسىسى دا ءوز كەيىپكەرلەرىنىڭ ىشكى جان-دۇنيەسىنە ەنىپ, ونىمەن جىمداسىپ, بىتە قايناسىپ, ورتاق ءتىل تاۋىپ كەتكەنىن كوردىك. ارتىستەردىڭ سىرتقى كەلبەتى, داۋىس مانەرى مەن ءجۇرىس-تۇرىسى يلانىمدى قابىلداندى. اسىرەسە, مەكتەپ بالاسىنىڭ سوعىس كەزىندەگى كوڭىل-كۇيى قانشالىق ىستىق سەزىممەن بەرىلەدى دەسەڭشى. حابار-وشارسىز كەتكەن اكەسىنەن ءبىر جاپىراق حات كەلمەسە دە ۇزىلمەگەن ءۇمىتىن اسپانداعى تىرنالارعا جەتكىزىپ, مۇڭىن شاعا ەگىلەتىن بالا – باقىتتىڭ (مەيىرعات امانگەلدين) باسىنان سيپاپ, جانارىنداعى جاستى قۇرعاتاتىن زامان تۋادى دەگەن اقجارما ءۇمىت تۇرادى ار جاعىندا...
استاناداعى م.گوركي اتىنداعى ورىس دراما تەاترىندا پرەمەراسى وتكەن سپەكتاكلدىڭ قويۋشى-سۋرەتشىسى – ەرلان تۇياقوۆ. ەگىن القابىنداعى اربا, جينالعان بيدايدىڭ ماساقتارى, شاڭىراق, قول وراق, شالعى, قول ديىرمەن, سىنىپتاعى اعاش پارتالار مەن تاقتالار كورىنىسكە جان بىتىرەدى, سۇراپىل سوعىس جىلدارىنىڭ بەينەسىن كوز الدىڭىزعا اينا-قاتەسىز الىپ كەلەدى. ودان ستسەنوگراف ماماننىڭ كوپ تەر توككەنى بايقالادى. ەكىنشىدەن, سوعىس تاقىرىبىنىڭ يگەرىلۋى جاعىنان ءالى دە بولسا سولعىن تارتىپ تۇراتىن جۇزىنە وسى قويىلىم ارقىلى اجەپتاۋىر قان جۇگىرە باستاعانداي اسەرگە بولەندىك.
قۇندىز ەرالى, جۋرناليست.
استانا.
سۋرەتتى تۇسىرگەن ورىنباي بالمۇرات.