گولوۆكين تەمىر تايسوندى تاعىنان تايدىردى
وتكەن جەكسەنبى كۇنى تاڭەرتەڭ قازاقستاندىق كاسىپقوي بوكسشى اقش-تا ءوزىنىڭ 33-ءشى جەكپە-جەگىن وتكىزىپ, تاعى دا مەرزىمىنەن بۇرىن جەڭىسكە جەتتى. ول بۇل جولى امەريكالىق بىلعارى قولعاپ شەبەرى كىشى ۆيللي مونرومەن WBA (Super), IBO جانە WBC (Interim) نۇسقالارى بويىنشا ورتا سالماقتاعى الەم چەمپيونى اتاعى ءۇشىن شايقاستى 6-راۋندتا اياقتادى. ءبىزدىڭ باعلان وسى ارقىلى اتاقتى مايك تايسوننىڭ تاعى ءبىر رەكوردىنا وزگەرىس ەنگىزدى.
جەكپە-جەك امەريكانىڭ كاليفورنيا شتاتىنداعى ينگلۆۋد قالاسىنىڭ «فورۋم» سپورت ارەناسىندا ءوتتى. گەننادي گولوۆكين ادەتتەگىدەي ۇرىستىڭ باسىنان العا ۇمتىلىپ, قاۋىرت شابۋىلعا كوشتى. ول ايقاستىڭ باسىندا-اق مونرونى تەڭسەلتىپ جىبەرەتىندەي بىرنەشە جويقىن سوققىلار بەرىپ تاستادى. ال ەكىنشى راۋندتا ءبىزدىڭ جەرلەسىمىز قارسىلاسىن ءتىپتى ەكى رەت نوكداۋنعا دا جونەلتىپ ۇلگەردى. بىراق امەريكالىق بوكسشى گونگ سوعىلعانعا دەيىن ورنىنان تۇرىپ كەتتى. ءۇشىنشى راۋندتا گەنناديدىڭ ەپتەپ قارقىنى باسىلىپ قالعانداي بولىپ كورىندى. مۇنى وسى كەزگە دەيىن ءبىراز ەسەسى كەتىپ قالعان ۆيللي جاقسى پايدالاندى. ونىڭ وسى بولىكتەگى بىرنەشە قارسى شابۋىلى ءساتتى شىقتى. بۇدان كەيىنگى ءتورتىنشى جانە بەسىنشى راۋندتار دا وسىنداي سيپاتپەن ءوتتى. وسى تۇستاردا قازاقستاندىق جانكۇيەرلەردىڭ كوڭىلدەرى ەپتەپ قوبالجىعانداي دا بولدى. گەنا قارسىلاسىنا بىرنەشە رەت اۋىر سوققى بەرگەنىمەن, باسەكەلەسىنىڭ قارىمتا جۇدىرىق سىلتەۋىنە دە جول بەرىپ قويدى. سەرىك ءپىرنازار, «ەگەمەن قازاقستان».