قازاقستان مۇسىلماندارى ءدىني باسقارماسى قاجىلىق ميسسياسى ەلىمىزدىڭ قاجىلارىن تەك «FlyNas» حالىقارالىق اۋە كومپانياسى تاسىمالداۋعا قۇقىلى ەكەنىن جانە ودان وزگە كومپانيالارمەن ۇشۋعا رۇقسات ەتىلمەيتىنىن حابارلايدى.
قازاقستان رەسپۋبليكاسى ينۆەستيتسيالار جانە دامۋ مينيسترلىگى ازاماتتىق اۆياتسيا كوميتەتى مەن ساۋد ارابياسى كورولدىگى ازاماتتىق اۆياتسيا باسقارماسى اراسىندا قابىلدانعان مەموراندۋمعا سايكەس, 2015 جىلعى قاجىلىق ماۋسىمىندا قازاقستان قاجىلارىن تولىق تاسىمالداۋ قۇقىعى «FlyNas» حالىقارالىق اۋەكومپانياسىنا بەرىلدى. تاسىمالداۋ تەك الماتى – جيددا – ءمادينا – الماتى باعىتى بويىنشا ورىندالادى. قاجىلاردىڭ اتتانۋ ۋاقىتى 11-16 قىركۇيەك, ال ۇشىپ كەلۋ ۋاقىتى 27 قىركۇيەك پەن 7 قازان ارالىعىندا جۇزەگە اسادى.
قۇرمەتتى باۋىرلار!
قاجىلىققا قۇجاتتاردى قابىلداۋ مەرزىمىنىڭ بىتۋىنە وتە از ۋاقىت قالدى. ساناۋلى ساتتەردى ءساتتى پايدالانۋلارىڭىزدى سۇرايمىز. قاجىلىققا قاتىستى سۇراقتار بويىنشا قمدب قاجىلىق ميسسياسى مۇشەلەرىنە, قاجىلىق كومپانيالارىنىڭ وكىلدەرىنە جولىعىپ, قاجەتتى اقپاراتتاردى الۋعا بولادى.
بيىل ەلىمىزدەن 4005 قاجى پارىزىن ورىندايدى. ولارعا بىلىكتى دارىگەرلەردى, تەولوگ-عالىمداردى, يمامداردى, جۋرناليستەردى بىرىكتىرگەن قمدب قاجىلىق ميسسياسى قىزمەت كورسەتەدى, دەپ حابارلادى قازاقستان مۇسىلماندارى ءدىني باسقارماسىنىڭ ءباسپاسوز قىزمەتى.