مىناۋ اۋمالى- توكپەلى دۇنيە

فينليانديا رەتسەسسيا قۇرساۋىندا

فينليانديا پرەزيدەنتى ساۋلي نينيستە ەل ەكونوميكاسىنىڭ تەرەڭ داعدارىسقا ۇشىراعانىن مالىمدەدى. فينلياندياداعى ەكونوميكالىق داعدارىس رەسەيگە جاسالعان سانكتسيانىڭ سالدارى. Eurostat ەسەبى بويىنشا, ەۋروپالىق وداق مەملەكەتتەرى ىشىندە رەسەي مەن باتىس اراسىنداعى سانكتسيالار سوعىسىنان ەڭ كوپ زارداپ شەككەن فينليانديا بولىپ تابىلادى. وتكەن اپتادا جارىق كور­گەن  Eurostat ەسەبى بويىنشا, ەۋروپالىق وداق ەلدەرىنىڭ ىشىندە فينليانديا ەكونوميكاسى عانا بيىلعى جىلدىڭ ەكىنشى توقسانىندا تومەندەپ كەتكەن. فينليانديانىڭ ءىجو-ءسى وتكەن جىلدىڭ سايكەس مەرزىمىمەن سالىستىرعاندا, 1 پايىزعا تومەندەگەن. ەڭ الاڭداتارلىق ماسەلە, فين ەكونوميكاسىنىڭ رەتسەسسياسى سوڭعى 4 جىل قاتارىنان جالعاسۋدا. Standard&Poor´s حالىقارالىق اگەنتتىگى 2014 جىلى فينليانديا ەكونوميكاسى قالپىنا كەلىپ, ءوسۋ باعىتىنا بەت بۇرادى دەپ مالىمدەگەن. الايدا, 2014 جىلى رەسەيگە قارسى جاسالعان سانكتسيالىق سوعىس فينليانديا ەكونوميكاسىنا سوققى بولىپ ءتيدى. تاۋار اينالىمىنىڭ كورسەتكىشى بويىنشا فينليانديا ءۇشىن رەسەي گەرمانيا مەن شۆەتسيادان كەيىنگى 3-ءشى ورىن الاتىن. ەۋروپالىق وداق تاراپىنان ەنگىزىلگەن سەكتورلىق سانكتسيا جانە وعان جاۋاپ رەتىندە رەسەي تاراپىنان جاريالانعان ازىق-ت ۇلىك ەمبارگوسى سالدارىنان فينليانديا جانە رەسەي اراسىنداعى تاۋار اينالىمى 16 پايىزعا قۇلدىرادى. بيىلعى جىلدىڭ قاڭتار-مامىر ايلارىندا فينلياندياعا شىعارىلاتىن رەسەي يمپورتى 37 پايىزعا, ال رەسەيگە كەلەتىن فين ەكسپورتى 35 پايىزعا ازايىپ كەتتى.  وسىنىڭ سالدارىنان فينليانديا پرەزيدەنتى ەلدە اۋىر ەكونوميكالىق داعدارىستىڭ ورىن العاندىعىن مويىندادى. «بىرتە-بىرتە ءبىزدىڭ تەرەڭ ەكونوميكالىق داعدارىسقا ۇشىراعانىمىز ايقىن بولا باستادى. ءداستۇرلى شارالار ەندى كومەكتەسە المايدى, ءبىز جاڭا مۇمكىندىكتەردى ىزدەۋىمىز كەرەك», دەدى ساۋلي نينيستە.

تۋريزم سالاسى تۇرالادى

نەپالدا ءساۋىر ايىندا بولعان قاتتى جەر سىلكىنىسىنەن كەيىن ەلگە كەلەتىن تۋريستەر سانى كۇرت ازايىپ كەتكەن. نەپالدىڭ تۋريزم جونىندەگى كوميتەتىنىڭ دەرەگى بويىنشا, تۋريستەر سانى 80 پايىزعا دەيىن ازايعان. تامىز ايىنىڭ 19 جۇلدىزىنا دەيىن نەپالعا كەلگەن شەتەلدىك تۋريستەر بار بولعانى 1 635 ادام ەكەن. وتكەن جىلدىڭ سايكەس كەزەڭىندە بۇل ەلگە كەلگەن  8 854 شەتەلدىك تۋريست تىركەلگەن ەدى. قازىر نەپال ۇكىمەتى جەر سىلكىنىسىنەن بۇزىلعان تاۋداعى جولدار مەن كوپىرلەردى قالپىنا كەلتىرۋدە. ەلدەگى تۋريزم دەڭگەيىن كوتەرۋ ماقساتىندا 2016 جىلدىڭ ساۋىرىندە جەر سىلكىنىسىنىڭ 1 جىلدىعىنا بايلانىستى اۋقىمدى شارالار وتكىزىلمەك. سونىمەن بىرگە, ۇستىمىزدەگى جىلدىڭ قازان ايىندا نەپالدا ءتۋريزمدى دامىتۋعا ارنالعان اپتالىق وتەدى. وعان كوپتەگەن حالىقارالىق تۋروپەراتورلار شاقىرىلعان. ەسكە سالا كەتەتىن بولساق, بيىلعى جىلدىڭ 25 ساۋىرىندە نەپالدا بىرنەشە قاتتى جەر سىلكىنىسى ورىن العان. ونىڭ ىشىندەگى ەڭ كۇشتىسى 7,9 بالدى قۇرادى. وسى ءزىلزالا زاردابىنان 9 مىڭ ادام قازا تاۋىپ, 22 مىڭ ادام زارداپ شەككەن. ءزىلزالا ەلدىڭ تۋريستىك نارىعىنا ۇلكەن كەسىرىن تيگىزدى. قازىر نەپالدا ءتۋريزمدى دامىتۋ ماقساتىندا كەشەندى شارالار جۇزەگە اسىرىلۋدا.

دەنني  داۋىلى كۇش الىپ كەلەدى

اتلانت مۇحيتى ارقىلى باتىسقا قاراي كەزەكتى دەنني تروپيكالىق داۋىلى جىلجىپ كەلەدى. تاياۋ ۋاقىتتا بۇل الاپات داۋىل اقش-تىڭ جاعالاۋلارىنا جەتەدى. ساراپشىلاردىڭ پىكىرىنشە, دەنني تروپيكالىق داۋىلى قۇرلىققا جەتكەن كەزدە ۇلكەن تابيعي اپاتقا اينالۋى مۇمكىن. قازىر دەننيدىڭ جىلدامدىعى ساعاتىنا 17 شاقىرىمدى قۇرايدى. بارا-بارا ونىڭ جىلدامدىعى ساعاتىنا 85 شاقىرىمعا جەتۋى مۇمكىن. اقش-تاعى  داۋىلداردى زەرتتەۋ جونىندەگى ۇلتتىق ورتالىقتىڭ حابارلاۋىنشا, دەنني داۋىلى جاقىن كۇندەردە ەكپىنىن كۇشەيتىپ, اپتانىڭ سوڭىندا, ياعني دەمالىس كۇندەرى امەريكا جاعالاۋلارىنا جەتەدى. جەرگىلىكتى بيلىك دەنني داۋىلىنىڭ الدىن الۋ شارالارىن ويلاستىرۋدا. ەۋروپانى  بوسقىندار باسىپ بارادى سلوۆاكيا ۇكىمەتى تاياۋ ۋاقىتتا سيريادان قاشقان 200 عانا بوسقىندى قابىلداي الاتىندىعىن مالىمدەدى. ۇكىمەت سونىمەن بىرگە بوسقىنداردىڭ ءبارى حريستيان دىنىندە بولۋى كەرەك دەگەن شارت قويىپ وتىر. بۇل مالىمدەمەنى سلوۆاكيا ۇكىمەتى «بىزدە مەشىت جوق» دەگەن سىلتاۋمەن تۇسىندىرمەك بولدى. ساراپشىلاردىڭ ايتۋىنشا, سلوۆاكيا ۇكىمەتىنىڭ بۇل مالىمدەمەسى ەلگە بوسقىنداردى كىرگىزبەۋ ءۇشىن جاسالعان سىلتاۋ دەيدى. وسىدان-اق, بۇگىندە ەۋروپالىق وداق ەلدەرى اراسىندا بوسقىندار ماسەلەسىندە ۇلكەن كەلىسپەۋشىلىك ورىن العانىن كورۋگە بولادى. بوسقىندار ماسەلەسىندە ەۋرووداق مەملەكەتتەرى اراسىنداعى كەلىسپەۋشىلىك كۇننەن-كۇنگە تەرەڭدەي تۇسكەنىنە قاراماستان, كارى قۇرلىققا اعىلعان زاڭسىز ميگرانتتار تاسقىنى تولاستار ەمەس. Frontex اگەنتتىگىنىڭ دەرەگى بويىنشا, ۇستىمىزدەگى جىلدىڭ تەك شىلدە ايىندا عانا ەۋروپالىق وداققا كەلگەن زاڭسىز ميگرانتتار سانى 107 500 ادامنان اسقان. بۇل 2014 جىلدىڭ سايكەس مەرزىمىمەن سالىستىرعاندا ەداۋىر كوپ. شىعىس ەۋروپا مەملە­كەت­تەرىنىڭ اراسىندا زاڭسىز ميگرانتتار ماسەلەسىنە بايلانىس­تى تەرەڭ داعدارىسقا ۇشىراعان ۆەنگريا بولىپ تابىلادى. بۇل مەملەكەتتەن ۇستىمىزدەگى جىلى عانا باسپانا سۇراعان بوسقىندار ءوتىنىشى 120 مىڭنان اسىپ كەتكەن. ۆەنگريا ەگەي تەڭىزى ارقىلى تاياۋ شىعىستان تۇركيا جانە گرەكيا ارقىلى كارى قۇرلىققا اعىلعان بوسقىنداردىڭ ورتالىعىنا اينالدى. وسى اپتادا ۆەنگريا ۇكىمەتى سەربيا مەملەكەتىمەن اراداعى شەكاراعا بىرنەشە مىڭ پوليتسيا قىزمەتكەرلەرىن شىعاراتىندىعىن, زاڭسىز شەكارادان وتكەندەردى جازاعا تارتاتىندىعىن مالىمدەدى. ەلدىڭ زاڭى بويىنشا زاڭسىز شەكارانى بۇزعاندار 4 جىلعا دەيىن باس بوستاندىعىنان ايىرىلادى. سونىمەن بىرگە, ەۋروپالىق وداقتىڭ باسقا مەملەكەتتەرىنەن باسپانا سۇراعان بوسقىندار سانى كۇننەن-كۇنگە وسۋدە. ماسەلەن, ۇستىمىزدەگى جىلدىڭ 3 ايى ىشىندە 83 175 بوسقىن گەرمانيادان باس­پانا الۋ تۋرالى ءوتىنىش بىلدىرگەن. بۇل جالپىەۋروپالىق ميگرانتتار سانىنىڭ 40 پايىزىن قۇرايدى. ال پولشا, چەحيا, سلوۆاكيا, رۋمىنيا, بولگاريا جانە بالتىق جاعالاۋى مەملەكەتتەرىنەن باسپانا سۇراپ ءوتىنىش بەرگەن بوسقىندار سانى 6 080 ادام بولدى. بيىلعى جىلدىڭ مامىر ايىندا بريۋسسەل يتاليا جانە گرەتسيا مەملەكەتتەرىنىڭ اۋما­عىندا شوعىرلانعان 40 مىڭ زاڭسىز ميگرانتتى ەۋروپالىق وداق ەلدەرىنە كۆوتا ارقىلى ءبولۋدى ۇسىنعان بولاتىن. بۇدان باسقا تاياۋ شىعىستاعى بوسقىندار لاگەرلەرىندە 20 مىڭ ادام ەۋروپاعا ءوتۋ كەزەگىن كۇتىپ جاتىر. 200 سيريالىق حريستيانداردى عانا قابىلدايتىندىعىن ايتقان سلوۆاكيا ۇكىمەتىنىڭ مالىمدەمەسى ەۋروپالىق وداق شەڭبەرىندە بريۋسسەل بەلگىلەگەن بوسقىندار كۆوتاسىنىڭ جۇمىس ىستەمەيتىندىگىن كورسەتتى. ويتكەنى, كۆوتا بويىنشا سلوۆاكيا مەملەكەتى 1 100 بوسقىندى قابىلداۋعا ءتيىس بولاتىن. بۇل ماسەلە تۋرالى سلوۆاكيا پرەمەر-ءمينيسترى روبەرت فيكو «مەندە ءبىر عانا سۇراق بار: ليۆيانى كىم بومبالادى؟ سولتۇستىك افريكادا بۇل پروبلەمانى تۋدىرعان كىم؟ سلوۆاكيا ما؟ جوق!», دەپ جاۋاپ بەردى. پولشا پرەمەر-ءمينيسترى ەۆا كوپاچ ءوزىنىڭ ەلى 2000 بوسقىن قابىلداي الاتىندىعىن ايتتى. بۇل ەۋروپالىق وداق بەلگىلەگەن كۆوتادان 1 600 ادامعا كەم. وسىعان بايلانىستى, ساياساتكەرلەر ەلدەرىندەگى قوعامدىق پىكىردى العا تارتادى. ماسەلەن, ماۋسىم ايىندا پولشادا وتكەن سۇراۋ سالۋ بارىسىندا پولياكتاردىڭ 61 پايىزى ءوز ەلدەرىنە بوسقىندار اكەلۋگە قارسىلىق بىلدىرگەن. سلوۆاكيادا وتكەن سۇراۋ سالۋ ناتيجەسىندە ەل تۇرعىندارىنىڭ 70 پايىزى ەۋروپالىق وداقتىڭ بەلگىلەگەن كۆوتاسى بويىنشا تاياۋ شىعىس جانە سولتۇستىك افريكا ەلدەرىنەن قاشقان بوسقىنداردى قابىلداۋعا قارسىلىق بىلدىرگەن. سول سياقتى, چەحيادا جۇرگىزىلگەن وسىنداي سۇراۋ سالۋ بارىسىندا, حالىقتىڭ 70 پايىزى سيريا جانە سولتۇستىك افريكا ەلدەرىنەن قاشقان زاڭسىز ميگرانتتاردى قابىلداۋعا قارسىلىق ءبىلدىرىپتى.

مازاسىز ميگرانتتار

لوندون مەن پاريج ميگرانتتار ماسەلەسىندە ناقتى شەشىم قابىلداماق. بۇل تۋرالى ۇلىبريتانيا مەن فرانتسيا ىشكى ىستەر مينيسترلەرى كەلىسسوزدەر جۇرگىزۋدە. ۇلىبريتانيا مەن فرانتسيا ىشكى ىستەر مينيسترلەرى كالە قالاسىنىڭ تۇبىنە ورنىعىپ, بىرتە-بىرتە ەۋروتۋننەل ارقىلى انگلياعا وتۋگە ارەكەتتەنىپ جۇرگەن زاڭسىز ميگرانتتاردىڭ ماسەلەسى جونىندە ورتاق كەلىسىمگە كەلدى. بۇل ەلدەردە بوسقىندار ماسەلەسى جازدىڭ باسىندا-اق ۋشىعىپ كەتكەن بولاتىن. پاريج بەن لوندون وسى ورايدا قانداي دا ءبىر ناقتى شەشىم قابىلداۋ ءۇشىن ءۇش ايعا جۋىق ۋاقىت كەتىردى. «كەيبىر بوسقىندار ۋاقىتشا باس­پانالاردا 6-8 ايعا دەيىن بولادى. ولار مۇندا نەعۇرلىم ۇزاق بولعان سايىن, پروبلەمالار دا سوعۇرلىم كوبەيە تۇسەدى. ماسەلەن, جاتاتىن جاي, تاماق, سانيتارلىق جاعداي سياقتى ماسەلەلەردى شەشۋ قيىندىق تۋعىزادى», – دەيدى «ميگرانتتار باسپاناسى» ۇيىمىنىڭ نەگىزىن قالاۋشى فرانسۋا گەننوك. فرانتسيا مەن ۇلىبريتانيا ىشكى ىستەر مينيسترلەرى بەرنار كازنەۆ پەن تەرەزا مەي كالە قالاسىندا كەلىسىم جاساسقان كەزدە ماسەلەنىڭ شەشىلۋىن قاراستىراتىن «ناقتى شارالارعا» قول قويىلۋى كەرەك دەپ كۇتىلۋدە. الايدا, ول شارالار جونىندە نە پاريج, نە لوندون ازىرگە ەشقانداي اقپارات تاراتپاي وتىر. لا-مانش جاعالاۋىنداعى مىڭداعان ميگرانت وزدەرىن ۇلىبريتانيادا فران­تسياعا قاراعاندا, جەڭىل ءومىر كۇتىپ تۇر دەپ ەسەپتەيدى. انگليادا جەكە كۋالىكتىڭ بىرىڭعاي نۇسقاسى قولدانىلمايدى, سوندىقتان ميگرانتتار وندا ۇزاق ۋاقىت بويى قۇجاتسىز دا ءجۇرىپ, زاڭسىز بيزنەس­پەن دە اينالىسا الاتىن كورىنەدى.

تۋرفيرمالاردىڭ كوپشىلىگى بانكروت

گرەكيانىڭ تۋريزم سالاسى بيىل­عى جازدا كۇردەلى پروبلەمالارعا ۇرىن­دى. تۋريستەر تاسقىنى بەلەڭ الاتىن جاز ايلارىندا گرەكيانىڭ پارومدىق تاسىمالى توقتاپ قالدى. وسىنىڭ سالدارىنان مىڭداعان تۋريستەر ەگەي تەڭىزىندەگى ارالدارعا جەتە الماي قالدى. «بيىلعى جىلى ەلدەگى داعدا­رىستىڭ تىم اسقىنىپ كەتۋىنە بايلانىستى ءبىز جاز ايلارىنداعى دەمالىستان قول ۇزدىك. تەڭىزدە تۋريستەر تاسىمالدايتىن پارومدار جۇمىسى دا ىركىلىسكە ۇشىرادى», دەيدى گرەكيا تۇرعىنى. تاجىريبەلى كاپيتان يااننيس كالاۆروس ۇزاق جىلداردان بەرى تۋريستەردى ەۆبەي ارالىنا تاسۋمەن اينالىساتىن ەدى. الايدا, بيىلعى جىلى ول جۇمىسىنا قاناعاتتانباي وتىر. «وسى ۋاقىتقا دەيىن ءبىز تاسىعان جولاۋشىلاردىڭ سانىن ساراپتايتىن بولساق, ءبىز بۇرىنعى جىلدارمەن سالىستىرعاندا, تۋريستەردىڭ 40 پايىزىنان ايىرىلىپ وتىرمىز», دەيدى تاجىريبەلى كاپيتان. ساراپشىلاردىڭ ايتۋىنشا, گرەكياداعى 4 مىڭنان استام تۋرفيرمانىڭ كوپشىلىگى 2015 جىلدىڭ جازىنان كەيىن بانكروتقا ۇشىرايدى. سەبەبى, ولاردىڭ كوپشىلىگىنىڭ تۋريستەرگە تاپسىرىسى 80 پايىزعا دەيىن تومەندەپ كەتكەن. «ءبىزدىڭ جاعدايىمىز بيىل كۇرت تومەندەپ كەتتى, ەل تۇرعىندارىنىڭ كوپشىلىگى ءداستۇرلى دەمالىستارىنان باس تارتتى, سەبەبى, ەل ەكونوميكاسىن تۇرالاتقان داعدارىس تۇرعىنداردىڭ تابىسىن ازايتتى. تۋريستەر قاتارى ەسەلەنەتىن جاز ايلارىندا ءبىز جارتى كۇشىمىزبەن عانا جۇمىس ىستەۋدەمىز. الداعى ۋاقىتتا تۋريستىك مەكەمەلەردىڭ قىزمەتكەرلەرىن قىسقارتۋعا ءماجبۇر بولاتىن شىعارمىز», – دەيدى گرەكيا تۋروپەراتورلارى اسسوتسياتسياسىنىڭ وكىلى ليسساندروس تسيليديس.

تۇتىنۋشىلاردىڭ توسىن مىنەزى

[caption id="attachment_73846" align="alignleft" width="560"] 131994978MN0001_blackfriday[/caption] RT  ساراپشىلارىنىڭ حابارلاۋىنشا, اقش تۇتىنۋشىلارى اراسىندا ۇلكەن ۇرەي بەلەڭ العان. تۇرعىندار دۇكەن سورەلەرىندەگى تاۋارلاردى سىپىرىپ-سيىرىپ ساتىپ الۋدا. دۋالى اۋىز ساراپشىلاردىڭ پىكىرىنشە, تۇتىنۋشىلاردىڭ مۇنداي مىنەز كورسەتۋىنىڭ باستى سەبەبى, ەلدەگى ەكونوميستەردىڭ ءجيى-ءجيى ايتاتىن بولجامىنىڭ سالدارىنان تۋىنداپ وتىر. 2008 جىلعى الەمدىك داعدارىستى بولجاعان اتاقتى امەريكالىق قارجى ساراپشىسى, Trends Research زەرتتەۋ ينستيتۋتىنىڭ نەگىزىن سالۋشى دجەرالد سەلەنتا ەكونوميكادا ورىن الىپ وتىرعان قازىرگى جاعداي داعدارىس ەمەس, بۇل ۇلى كۇيزەلىس. ايىرماشىلىعى ەندى بۇل كۇيزەلىس جاھاندىق اۋقىمدا كورىنىس بەرۋدە, دەپ اتاپ ءوتتى. ەكىنشى ءبىر تانىمال ساراپشى لارري ەدەلسوننىڭ ايتۋىنشا, بۇل «دوللار كوبىگىنىڭ» جارىلار ۋاقىتىنىڭ جاقىنداعانىن كورسەتەدى. ونىڭ پىكىرىنشە, بيىلعى جىلدىڭ قازان ايىندا «دوللار كوبىگى» جارىلىپ, «اقش, ەۋروپا جانە جاپونيا تىزەرلەپ قالادى». ال كەيبىر ساراپشىلار تۇتىنۋشىلار اراسىنداعى مۇنداي «بەلسەندىلىكتى» فەدەرالدىق قور جۇيەسى ستاۆكانى كوتەرۋ قارساڭىندا ادەيى جاساپ وتىر, دەگەن پىكىر ايتادى.

جۇمىسسىزدىق بەلەڭ الدى

برازيليا ەكونوميكاسى سوڭعى ۋاقىتتا تەرەڭ داعدارىستى باستان كەشىرۋدە. ۇستىمىزدەگى جىلدىڭ سوڭعى توقسانىندا ەل ەكونوميكاسىنىڭ ءوسىمى تۇرالاپ, ينفلياتسيا 2004 جىلدىڭ ءى توقسانىندا ورىن العان ەڭ ناشار دەڭگەيگە جەتتى. ونىڭ ۇستىنە ەلدەگى فيسكالدىق تاپشىلىق سوڭعى 10 جىل ىشىندە بولماعان دەڭگەيگە جەتىپ وتىر. بيۋدجەت تاپشىلىعى ءىجو-ءنىڭ 7,9 پايىزى دەڭگەيىنە جەتتى. بۇل سوڭعى 137 ايدىڭ ىشىندەگى ەڭ ناشار كورسەتكىش. ەلدەگى ەكونوميكالىق احۋالدىڭ ناشارلاۋى پرەزيدەنت  ديلما رۋسسەففتىڭ رەيتينگىسىنىڭ كۇرت ناشارلاۋىنا سەبەپ بولدى. قازىر رۋسسەفف 2003 جىلدان 2010 جىلدىڭ ارالىعىندا Petrobras كومپانياسىنىڭ توراعاسى بولىپ تۇرعان كەزدە سىبايلاس جەمقورلىققا جول بەردى دەگەن ايىپپەن ۇلكەن ساياسي ناۋقان باستالدى. «جىعىلعانعا جۇدىرىق» دەگەندەي, ەكونوميكانىڭ داعدارىسقا ۇشىراۋى ەلدەگى جۇمىسسىزدىقتىڭ بەلەڭ الۋىنا سەبەپ بولدى. ەلدەگى جۇمىسسىزدىق دەڭگەيى سوڭعى 5 جىل ىشىندەگى ەڭ جوعارى دەڭگەيگە كوتەرىلدى. ساراپشىلاردىڭ ەسەبىنشە, برازيليادا جۇمىسسىزدىق دەڭگەيى 7 اي بويى وسۋمەن كەلەدى. قازىر جۇمىسسىزدىق دەڭگەيى 7,5 پايىزدى قۇراپ وتىر.

لوۋرەنس گونورارى –  52 ملن. دوللار

Forbes جۋرنالى ەڭ جوعارى تابىس تاباتىن ارتىستەردىڭ جىل سايىنعى ءداستۇرلى ەسەبىن جاريالادى. وسى ءتىزىم بويىنشا ءبىرىنشى ورىنعا «جارىماعان ويىندار» ءفيلمىنىڭ جۇلدىزى دجەننيفەر لوۋرەنس شىقتى. ول 2014 جىلدىڭ ماۋسىمى مەن 2015 جىلدىڭ ماۋسىمى ارالىعىندا, سالىقتاردى ەسەپتەمەگەندە, 52 ميلليون اقش دوللارى كولەمىندە تابىس تاپتى. وتكەن جىلدىڭ سايكەس كەزەڭىمەن سالىستىرعاندا, ءارتىستىڭ تابىسى 20 ميلليون دوللارعا ارتتى. بۇگىندە دجەننيفەر لوۋرەنس الەمدەگى گونورارى ەڭ جوعارى ارتىسكە اينالدى. بۇدان بۇرىنعى, ياعني 2014 جىلعى ءتىزىمدى باستاعان ساندرا بۋللوك بۇل جولى تەك 15-ورىندى يەلەندى. ونىڭ تابىسى 51 ميلليون دوللاردان 8 ميلليون دوللارعا دەيىن تومەندەگەن. بيىلعى تابىسى كوپ اكتريسالار ءتىزىمنىڭ ەكىنشى ورنىن 35,5 ميلليون دوللار تابىس تاپقان سكارلەتت يوحانسسون يەلەندى. ءۇشىنشى ورىن 23 ميلليون تابىس تاپقان مەليسسا ماككارتيدىڭ ۇلەسىنە, ال ءتورتىنشى ورىن جىل ىشىندە 21 ميلليون اقش دوللارى كولەمىندە تابىس تاپقان قىتايلىق كينوجۇلدىز بينبين فاننىڭ ۇلەسىنە ءتيدى. ەگەر جاقىندا جارىق كورگەن ايەل اكتريسالار ءتىزىمىن Forbes جۋرنالى بۇدان بۇرىن جاريالاعان اكتەرلەر تىزىمىمەن سالىستىراتىن بولساق, ەرلەر ايەلدەرگە قاراعاندا مول  تابىس تابادى ەكەن. ماسەلەن, ەرلەر اراسىنداعى ءتىزىمدى باستاعان روبەرت داۋني – كىشىنىڭ تابىسى جىل ىشىندە 80 ميلليون اقش دوللارىن قۇراپتى. دايىنداعان جىلقىباي جاعىپار ۇلى, «ەگەمەن قازاقستان».