الەمدى ەلەڭ ەتكىزدى دەگەندە, بۇل وقيعاعا تالاي ەلدەر, ۇيىمدار, اقپارات قۇرالدارى جەدەل تۇردە ۇنقاتتى. ەل ۇكىمەتى «بالكانداعى ەڭ قاۋىپتى تەررورلىق ۇيىمنىڭ شابۋىلى» دەپ مالىمدەسە, پرەزيدەنت گەورگە يۆانوۆ ەلدە ەكى كۇندىك ازا جاريالادى. ەلدەگى وپپوزيتسيا مۇنى بيلىكتىڭ وتكىر ساياسي داعدارىستان جۇرت نازارىن باسقاعا اۋدارۋ ارەكەتى دەپ مالىمدەدى. ال ەۋرووداق پەن ناتو باسشىلىعى اشىق زەرتتەۋ جۇرگىزۋ كەرەك دەسە, الىستاعى ماسكەۋ ماكەدونيادا «ءتۇرلى-ءتۇستى رەۆوليۋتسيا» ۇيىمداستىرۋ ارەكەتىنىڭ قاۋىپتى سالدارىنان ساقتاندىردى.
سوعان قاراماي, مۇندا ءالى جۇمباق جاي كوپ. ماكەدونيانىڭ رەسمي ورىندارى كىم ەكەنىن ناقتى ايتپاي, كورشى ەل دەيدى. تۇتقىنعا تۇسكەن 30 ادامنىڭ ءبىرازى كوسوۆولىق بولسا, ءبىرازى ماكەدونيالىق كورىنەدى. سولاردان قايدان كەلدىڭدەر, كىمسىڭدەر دەپ سۇراۋعا دا بولادى ەمەس پە؟ سكوپەدە شىعاتىن گازەتتە بۇل ارەكەتتى موينىنا العان «ازاتتىقتىڭ ۇلتتىق ارمياسى» دەيتىن ۇيىمنىڭ مالىمدەمەسى جاريالانىپ, وندا پوليتسەيلەر مەن اسكەريلەردىڭ «بىرنەشە كۇن قاتارىنان بەيبىت حالىقتى ۇرەيدە ۇستاعانى» ايتىلعان.
كورشى ەلدەر دەگەندە, بۇلاردىڭ كوڭىلىندە كوسوۆو مەن البانيا تۇرعانى انىق. ال كوسوۆونىڭ پرەزيدەنتى اتيفەت ياكياگا مەن پرەمەر-ءمينيسترى يسا مۇستافانىڭ بىرلەسكەن مالىمدەمەسىندە ءوز ەلىنىڭ ادامدارىنىڭ بۇل شابۋىلعا قاتىسىن ايىپتاپ, بۇل ارەكەتتى كوسوۆو مەن كورشى ەلدەردەگى جاعدايدى ۋشىقتىرۋعا باعىتتالعانىنا نازار اۋدارعان. البانيا باسشىلىعى ارەكەت ورىن العان كۋمانوۆو قالاسىنداعى ەتنوستىق البانداردى قورعاۋعا شاقىرعان.
سوندا ايىپتى كىم, ەلدەگى ازشىلىق (25 پايىز) – ەتنوستىق الباندارعا كوپشىلىك ماكەدونداردىڭ تىزەسى باتقان با, جوق سىرتقا سۇيەنگەن البانداردىڭ سەپاراتيستىك ارەكەتتەرى مە؟ اشىپ ايتىلمايدى. بىراق سىرتتاعىلاردىڭ بۇل وقيعاعا ءمان بەرۋى وزگەرەك. ءتىپتى, ماسەلەنىڭ اق-قاراسى ايقىندالماي جاتىپ, الىستاعى ماسكەۋدىڭ ايعاي سالۋى قالاي؟ ەو مەن ناتو دا ىلە-شالا نازار اۋداردى. اقپارات قۇرالدارى دا بىردەن بۇرىنعى يۋگوسلاۆيالىق ماكەدونيا رەسپۋبليكاسى رەسەي مەن باتىس اراسىنداعى جاڭا تارتىس ايماعىنا اينالۋى مۇمكىن دەگەندى العا تارتىپ وتىر. نەگە؟ مۇندا ماسكەۋدىڭ نە قاتىسى بار؟ نەگىزىنەن العاندا, بۇل ەۋروپانىڭ ىشكى ءىسى ەمەس پە؟
جۇرت ءارتۇرلى بولجام ايتادى. بىرەۋلەر رەسەيدىڭ «تۇركيا اعىسى» ارقىلى كەلەتىن جانە وسى ەلدەن وتەتىن گازىن ەسكە الادى, بىرەۋلەر رەسەي مەن ماكەدونيانىڭ نەگىزىنەن پراۆوسلاۆيەلىك ەلدەر ەكەنىن دە العا توسادى. بۇل قاقتىعىس سەربيانىڭ وڭتۇستىگىن دە شارپۋى مۇمكىن. وسىنىڭ بارىنە ماسكەۋ بەيجاي قارامايدى دەيدى. ولارعا تۋىستار قازىر بۇرىنعىدان قاجەتتىرەك.
وسى جەردە كوسوۆو ويعا ورالادى. ءبىر كەزدە سەربيا باسشىلىعى ءوزىنىڭ ءبىرشاما ايماعىندا ەتنوستىق تازالاۋ ساياساتىن جۇرگىزگەندە, ونى ماسكەۋدىڭ قولداعانى بار. باتىس ەلدەرىنىڭ, ناتو-نىڭ ارالاسۋىمەن سوندا وعان جول بەرىلمەي, ونىڭ اقىرى كوسوۆونىڭ تاۋەلسىزدىك الۋىمەن اياقتالعان. ماكەدونيا سوندا دا زارداپ شەككەن. جارتى ميلليونداي بوسقان حالىق ماكەدونياعا اعىلىپ, ءبىراز كۇيزەلتكەن. سول ەتنوسارالىق قايشىلىق بۇگىن ماكەدونيانىڭ وزىندە قايتالانۋى مۇمكىن.
ايتتى-ايتپادى, وسىناۋ 2 ميلليوننان ءسال عانا اساتىن حالقى بار شاعىن مەملەكەتتە ايتارلىقتاي كۇردەلى جاعداي قالىپتاسىپ وتىر. وعان سىرتتاعىلار ارالاسار بولسا, ءىستىڭ ناسىرعا شابارى انىق. بۇدان ۇتاتىن ەشكىم بولمايدى.
ماماديار جاقىپ, جۋرناليست.