استانا. 30 ماۋسىم. كەشە ەلوردادا ورتالىق جانە وڭتۇستىك ازيا ەلدەرىنىڭ زورلىق ەكسترەميزمگە قارسى ءىس-قيمىل جونىندەگى وڭىرلىك كونفەرەنتسياسى ءوز جۇمىسىن باستادى. بۇل تۋرالى باس پروكۋراتۋرانىڭ ءباسپاسوز قىزمەتى حابارلادى.
ونىڭ جۇمىسىنا 24 ەلدەن كەلگەن دەلەگاتسيالار, اقش, ەۋرووداق جانە رەسەيدىڭ ۋاكىلەتتى ورگاندارىنىڭ جەتەكشىلەرى, بۇۇ, ەقىۇ, شىۇ جانە باسقا دا حالىقارالىق ۇيىمدار مەن ازاماتتىق قوعام وكىلدەرى, تەرروريزم مەن ەكسترەميزمگە قارسى كۇرەس سالاسىنداعى جەتەكشى ساراپشىلار قاتىسۋدا.
كونفەرەنتسيانى قازاقستان رەسپۋبليكاسىنىڭ باس پروكۋرورى اسحات داۋىلباەۆ اشتى.
قازاقستان رەسپۋبليكاسىنىڭ پرەمەر-ءمينيسترى كارىم ءماسىموۆ, اقش-تىڭ ىشكى قاۋىپسىزدىك مينيسترلىگى كەدەن-شەكارا قىزمەتىنىڭ جەتەكشىسى گيل كەرليكوۆسكي باسقوسۋعا قاتىسۋشىلارعا قۇتتىقتاۋ ءسوز ارنادى.
سونداي-اق, پرەزيدەنتتىڭ كومەكشىسى – قازاقستان رەسپۋبليكاسىنىڭ قاۋىپسىزدىك كەڭەسىنىڭ حاتشىسى نۇرلان ەرمەكباەۆ جانە ۇلتتىق قاۋىپسىزدىك كوميتەتىنىڭ توراعاسى نۇرتاي ابىقاەۆ ءسوز سويلەدى.
استاناداعى كونفەرەنتسيا اعىمداعى جىلدىڭ اقپان ايىندا ۆاشينگتوندا وتكەن زورلىق ەكسترەميزمگە قارسى كۇرەس جونىندەگى ءسامميتتىڭ زاڭدى جالعاسى ىسپەتتى. بۇل فورۋمدى وتكىزۋ يدەياسىن ورتالىق ازيا وڭىرىندەگى ينتەگراتسيانىڭ بەلسەندى باستاماشىلارىنىڭ ءبىرى رەتىندە قازاقستان ۇسىنعان بولاتىن. رەسپۋبليكا بۇۇ-نىڭ تەرروريزمگە قارسى كۇرەس جونىندەگى نەگىزگى كونۆەنتسيالارىنا قوسىلعان, ەلىمىزدە ۇلتتىق تەرروريزمگە قارسى كۇرەس ورتالىعى قۇرىلعان جانە ول حالىقارالىق جانە وڭىرلىك وسىنداي قۇرىلىمدارمەن بەلسەندى تۇردە ءوزارا ءىس-قيمىل جاساسۋدا. تمد, شىۇ, ۇجىمدىق قاۋىپسىزدىك تۋرالى كەلىسىم جونىندەگى ۇيىمنىڭ تەرروريزمگە قارسى كۇرەستەگى نەعۇرلىم ءتيىمدى حالىقارالىق-قۇقىقتىق ينستيتۋتتارعا اينالىپ كەلە جاتقان قۇرىلىمدارى اياسىندا شارالار قابىلدانۋدا.
ءوز سوزىندە اسحات داۋىلباەۆ ەكسترەميزم مەن تەرروريزم قاۋپىنىڭ عالامدانا ءتۇسۋى بارلىق الەمدىك قاۋىمداستىقتىڭ كۇش-جىگەرىن نەعۇرلىم تەرەڭ شوعىرلاندىرۋدى, وعان قارسى كۇرەستىڭ ءتيىمدى ستراتەگياسىن ازىرلەۋدى تالاپ ەتەتىندىگىن اتاپ كورسەتتى. بۇل وتە كۇردەلى مىندەت جانە الەمدەگى قاۋىپسىزدىكتىڭ تاعدىرى ونىڭ ءساتتى بولۋىنا تىكەلەي بايلانىستى. سوندىقتان بىرلەسكەن كۇش-جىگەر ەڭ الدىمەن راديكالدىق يدەولوگيانىڭ تارالۋىن ەسكەرتۋگە جانە ونىڭ جولىن كەسۋگە, زورلىق ەكسترەميزممەن كۇرەسۋگە دايىن بارلىق سىندارلى كۇشتەرمەن ءوزارا ءتيىمدى قارىم-قاتىناستى قالىپتاستىرۋعا باعىتتالۋى ءتيىس.
كونفەرەنتسيانىڭ كۇن تارتىبىندە زورلىق ەكسترەميزمنىڭ بەلەڭ الۋىن بولدىرماۋ, ونىڭ قوزعاۋشى كۇشتەرىنىڭ تامىرىنا بالتا شابۋ جونىندەگى ءتيىمدى ساياساتتى قالىپتاستىرعان بايلانىستى وزەكتى ماسەلەلەر تۇر.
العاشقى كۇنى قاتىسۋشىلار ەكسترەميزمدى تۋعىزۋشى سەبەپتەر مەن العىشارتتاردى, راديكالدى توپتاردان بولاتىن قاۋىپتەردى, سونداي-اق, الەۋمەتتىك جەلىلەردە جانە ينتەرنەتتە ەكسترەميستىك يدەيالاردى تاراتۋعا, ازاماتتاردى شەتەلدىك قارۋلى قاقتىعىستارعا قاتىسۋعا ازعىرىپ كوندىرۋگە قاتىستى ماسەلەلەردى تالقىلادى.
ەكسترەميزمگە توسقاۋىل قويۋ جونىندەگى ۇلتتىق ستراتەگيالار مەن جوسپارلاردى ازىرلەۋ ماسەلەلەرىن تالقىلاۋ بارىسىندا قىزۋ پىكىرتالاستار بولدى. ەكسترەميزم مەن راديكاليزمنىڭ ءارتۇرلى فورمالارىمەن كۇرەسۋ جونىندەگى مەملەكەتتىك ستراتەگيالار, تەرروريزمنىڭ قارجىلاندىرىلۋىن, قارۋ-جاراق پەن ەسىرتكىنىڭ زاڭسىز اينالىمىن انىقتاۋ جانە ولاردىڭ جولىن كەسۋ جونىندەگى بىرلەسكەن شارالار, راديكالدىق كورىنىستەردىڭ پروفيلاكتيكاسى سالاسىنداعى جۇمىس تاجىريبەسى مەن اقپارات الماسۋ ماسەلەلەرى تالقىلاندى.
مەملەكەتتىڭ ەكسترەميزممەن كۇرەس جونىندەگى كۇش-جىگەرىن قولداۋداعى جۇرتشىلىق پەن ۇكىمەتتىك ەمەس ۇيىمداردىڭ ءرولى, وسى جۇمىسقا ازاماتتىق قوعام كوشباسشىلارىن, سونىڭ ىشىندە جاستاردىڭ, ايەلدەردىڭ جانە ءدىني ۇيىمداردىڭ وكىلدەرىن بەلسەندى تۇردە تارتۋدىڭ ماڭىزدىلىعى ەرەكشە اتالىپ ءوتىلدى.
كونفەرەنتسيانىڭ ارنايى سەسسياسى وسى سالاداعى جۇمىستارعا يننوۆاتسيالىق تاسىلدەردى قولدانۋ ماسەلەلەرىنە ارنالدى. ءارتۇرلى ەلدەردىڭ قۇقىق قورعاۋ ورگاندارىنىڭ الدىڭعى قاتارلى تاجىريبەلەرىنە, قوعام وكىلدەرىن تارتۋ ادىستەرىنە, ازاماتتىق قوعام باستامالارىن جۇزەگە اسىرۋدىڭ ءتيىمدى تاجىريبەسىنە جاسالعان شولۋ جينالعانداردىڭ نازارىنا ۇسىنىلدى.
سونداي-اق, قاتىسۋشىلارعا ۇكىمەتتىك ەمەس ۇيىمداردىڭ ىستامبۇلداعى زورلىق ەكسترەميزمگە توسقاۋىل قويۋ جونىندەگى كونفەرەنتسياسىنىڭ قورىتىندىلارى تانىستىرىلدى.
فورۋم جۇمىسىنىڭ ءبىرىنشى كۇنىنىڭ ناتيجەلەرى بويىنشا قورىتىندى قۇجات قابىلداندى, ونى قازاقستاننىڭ سىرتقى ىستەر ءمينيسترى ەرلان ىدىرىسوۆ جاريا ەتتى.
مالىمدەمەدە دەلەگاتتار زورلىق ەكسترەميزمگە قارسى كۇرەسكە ۇجىمدىق كۇش-جىگەر باعىتتاۋعا, وڭىرلىك جانە حالىقارالىق قاۋىپسىزدىكتى قامتاماسىز ەتۋ جولىندا ءوزارا ءتيىمدى ىنتىماقتاستىقتى كەڭەيتۋگە ءازىر ەكەندىكتەرىن ماقۇلدادى. وسى ماقساتتاردا تەرروريزمگە قارسى ءتيىمدى ستراتەگيانى جاساۋعا باعىتتالعان جان-جاقتى قامتىلعان وڭىرلىك باعدارلاما ازىرلەۋ قاجەت دەپ تانىلدى. اتالعان باستامالار اعىمداعى جىلدىڭ قىركۇيەك ايىندا نيۋ-يوركتە وتەتىن بۇۇ باس اسسامبلەياسىنىڭ وتىرىسىندا كورىنىس تاباتىن بولادى.
جيىننىڭ قورىتىندىلارى بويىنشا باس پروكۋرور اسحات داۋىلباەۆ, اقش-تىڭ ىشكى قاۋىپسىزدىك مينيسترلىگى كەدەن-شەكارا قىزمەتىنىڭ جەتەكشىسى گيل كەرليكوۆسكي, سىرتقى ىستەر ءمينيسترى ەرلان ىدىرىسوۆ, ۇلتتىق قاۋىپسىزدىك كوميتەتىنىڭ توراعاسى نۇرتاي ابىقاەۆ, بۇۇ باس حاتشىسىنىڭ ارنايى وكىلى, ورتالىق ازيا بويىنشا پرەۆەنتيۆتىك ديپلوماتيا جونىندەگى بۇۇ وڭىرلىك ورتالىعىنىڭ باسشىسى پەتكو دراگانوۆ قاتىسقان ءباسپاسوز ءماسليحاتى بولىپ ءوتتى.
ەلامان قوڭىر.
دەرەك, سۋرەت: باس پروكۋراتۋرانىڭ ءباسپاسوز قىزمەتى.