كەشە ەلوردادا قازاقستاننىڭ شەتەلدەگى ستۋدەنتتىك ۇيىمدارىنىڭ ەكى كۇندىك IV سلەتى باستالدى. «بولاشاق» قاۋىمداستىعى, «نۇر وتان» پارتياسىنىڭ «جاس وتان» جق, سونداي-اق, ءبىلىم جانە عىلىم مينيسترلىگىنىڭ قولداۋىمەن ءوتىپ جاتقان شاراعا 250-دەن استام ستۋدەنت قاتىسۋدا.
نەگىزىنەن ستۋدەنتتەر الەمنىڭ 16 ەلىنەن ( ۇلىبريتانيا, اقش, كانادا, اۆستراليا, گەرمانيا, يسپانيا, فرانتسيا, شۆەيتساريا, ۆەنگريا, چەحيا, پولشا, قىتاي, كورەيا, مالايزيا, رەسەي, ءتۇركيا جانە باسقا دا ەلدەر) كەلىپتى. شەتەلدەگى قازاقستاندىق ستۋدەنتتەردىڭ ۇيىم سانى 60-قا جەتكەن. جيىنعا مەملەكەتتىك ورگاندار مەن ۇلتتىق كومپانيالاردىڭ وكىلدەرى, «بولاشاق» باعدارلاماسىنىڭ ستيپەندياتتارى, كاسىپكەرلىك, ازاماتتىق سەكتور سالاسىنداعى ساراپشىلار جانە باسقا سالالاردىڭ ماماندارى قاتىسۋدا.
سلەتتىڭ تۇسكە دەيىنگى وتىرىسى «سلەتتەن كەلەسى سلەتكە: تۇجىرىم, يدەيا, دامۋ» سۇحبات الاڭىنا ارنالىپ, شەتەلدەگى ستۋدەنتتىك ۇيىمدار كوشباسشىلارى جىل ىشىندەگى جۇمىستارىنىڭ ءناتيجەلەرىمەن ءبولىسىپ, الداعى ءىس-جوسپارلارى مەن جوبالار جايىن ءسوز ەتتى. ال پلەنارلىق وتىرىستا مودەراتورلىق جاساعان «نۇر وتان» پارتياسى قوعامدىق ساياسات ينستيتۋتىنىڭ ديرەكتورى ساياسات نۇربەكتىڭ اتاپ وتكەنىندەي, ەلباسى «بولاشاق» باعدارلاماسى تۇلەكتەرىنە بىرقاتار جاۋاپتى قىزمەتتەردى سەنىپ تاپسىرۋدا. سول تۇلەكتەردىڭ ءبىرى – «بايتەرەك» ۇبح» اق باسقارما توراعاسى قۋاندىق بيشىمباەۆ الدىمەن ءسوز الدى.
ول ءوز سوزىندە «بولاشاق» قاۋىمداستىعى كەڭەسى قۇرىلعاندىعىن تىلگە تيەك ەتە كەلىپ, جاستاردى كاسىپكەرلىككە تارتۋ جايى وزەكتى بولىپ وتىرعاندىعىنا نازار اۋدارتتى. باسقارما توراعاسىنىڭ سوزىنەن ءمالىم بولعانداي, قازىرگى كەزدە العاش رەت قازاقستاندىق «بيزنەس كەيس» جيناعى ازىرلەنۋدە. بۇل كىتاپتى وقىپ شىققان ءاربىر جاس قانداي شەشىم قابىلداعان دۇرىس دەگەن سۇراققا جاۋاپ تابۋى ءتيىس. «مەملەكەت باسشىسى «بولاشاق» باعدارلاماسىنىڭ ستيپەندياتتارى مەن تۇلەكتەرىنە ۇلكەن ءۇمىت ارتىپ وتىر. سوندىقتان دا, ءبىز پرەزيدەنت پەن حالىقتىڭ بىزگە ارتقان سەنىمىن اقتاۋ ءۇشىن بار كۇشىمىزدى سارقۋىمىز كەرەك», – دەدى ق.بيشىمباەۆ.
بولاشاقتىقتاردىڭ مەملەكەت قۇرىلىمىن جەتىلدىرۋدەگى الەۋەتىنىڭ مول ەكەندىگىن جەتكىزگەن بعم جاستار ساياساتى جونىندەگى دەپارتامەنتىنىڭ ديرەكتورى روزا كارىبجانوۆا 2015 جىلدان باستاپ اعىلشىن ءتىلىن ۇيرەتۋ 6+6 مودەلىنە كوشكەندىگىن ايتىپ بەردى. ياعني, ەندى ستۋدەنتتەر اعىلشىن تىلىندە نازارباەۆ ۋنيۆەرسيتەت پەن ءال-فارابي اتىنداعى قازاق ۇلتتىق ۋنيۆەرسيتەتى بازاسىندا وقىتىلادى, ال قالعان جارتىجىلدىقتى شەتەلدەردە جالعاستىراتىن بولادى. «100 ناقتى قادام» – ۇلت جوسپارىن جۇزەگە اسىرۋدا جوعارى بىلىكتى ەڭبەك رەسۋرستارىمەن قامتاماسىز ەتۋ ءۇشىن مىقتى ءبىلىم بەرۋ جۇيەسىنىڭ قاجەتتىگى ەرەكشە سەزىلگەندىگىنە توقتالعان ر.كارىبجانوۆا قازىرگى تاڭدا ەلىمىزدە 10 جوعارى وقۋ ورنىندا يننوۆاتسيامەن اينالىسۋعا مۇمكىندىكتەر اشىلعاندىعىنا توقتالدى. جالپى, ەلىمىزدەگى جوعارى وقۋ ورىندارىنىڭ جانىنان 500-گە تارتا عىلىمي-زەرتتەۋ قۇرىلىمدارى مەن بولىمشەلەرى اشىلعان. سونداي-اق, نازارباەۆ ۋنيۆەرسيتەت تاجىريبەسى نەگىزىندە كەشەندى باسقارۋ تەتىگى ەنگىزىلۋدە. ءبىلىم بەرۋ, عىلىم جانە ءوندىرىستى ينتەگارتسيالاۋ جۇزەگە اسىرىلۋدا. بۇدان باسقا كوممەرتسيالاۋ جونىندەگى 13 وفيس اشىلعان. جانە دە 3 تەحنوپارك پەن 4 بيزنەس ينكۋباتور قۇرىلعان.
قازاقستاندىق جاستاردىڭ شەتەلدەردە قازاقستاندى تانىتاتىنىن العا تارتقان «حالىقارالىق باعدارلامالار ورتالىعى» اق پرەزيدەنتى عاني نىعىمەتوۆ قازىرگى كەزدە شەتەلدەردە 40 مىڭعا تارتا قازاقستاندىق ءبىلىم الىپ جاتقاندىعىن اتاپ ءوتتى. ولار قۇرعان ۇيىمدار «قازاليانس» ۇيىمىنا بىرىكتىرىلىپ, قازاقستاندىق ستۋدەنتتەر وزدەرىن ۇلكەن وتباسى قامقورلىعىندا ەكەندىگىن سەزىنەتىندەي جاعداي قالىپتاسىپ وتىر. ءوز وكىلدىكتەرىنىڭ الەمنىڭ بەس قالاسىندا (لوندون, ماسكەۋ, بەرلين, شانحاي, ۆاشينگتون جانە بوستون) ورىن تەپكەندىگىن اتاعان ع.نىعىمەتوۆ بۇل وكىلدىكتەر شەتەلدەردەگى قازاقستاندىق ستۋدەنتتەرى ۇيىمدارىنىڭ باستامالارىنا قولداۋ كورسەتۋگە ءازىر ەكەندىگىنەن دە حاباردار ەتتى.
ال بۇگىن قازاقستان گۋمانيتارلىق-زاڭ ۋنيۆەرسيتەتىندە «يدەيادان بيزنەس – مودەلگە دەيىن: ستارتاپتىڭ «ومىرشەڭدىك» جولدارى», «بيزنەستەگى ءتيىمدى كەلىسسوزدەر», «كاسىپكەرلىك. العاشقى قادام» جانە «بيزنەستىڭ الەۋمەتتىك جەلىلەردە دامۋى» تاقىرىپتارىندا بيزنەس-ترەنينگتەر ۇيىمداستىرىلادى.
اسقار تۇراپباي ۇلى,
«ەگەمەن قازاقستان».