اقتوبەلىك وقۋشىلار رەسپۋبليكالىق بايقاۋدا جەڭىسكە جەتتى

  اقتوبە. 28 اقپان. اقتوبەلىك وقۋشىلار رەسپۋبليكالىق بايقاۋدان ولجالى ورالدى. بۇل تۋرالى «اقتوبە» گازەتى حابارلادى. «اتادان مۇرا» قوعامدىق قورى مەن «ۇلان» گازەتىنىڭ ۇيىتقى بولۋىمەن وتكەن بايقاۋدىڭ ماقساتى – بالالاردى ادەبيەتكە, ونەر مەن بىلىمگە تاربيەلەۋ. اسىرەسە, ۇيىمداستىرۋشىلار جاس جەتكىنشەكتەردىڭ كوركەم شىعارمالارعا قۇشتارلىعىن ارتتىرۋعا, مانەرلەپ وقۋ مادەنيەتىن قالىپتاستىرۋعا جانە ءداستۇرلى ءان مەن كۇيدى دارىپتەۋگە ەرەكشە كوڭىل ءبولدى. بايقاۋ بارىسىندا كوركەمسوز, اسپاپتا ويناۋ جانە ءداستۇرلى ءان نوميناتسيالارى بويىنشا وتكەن سايىستا اقتوبە قالاسىنداعى №24 لينگۆيستيكالىق مەكتەپ-گيمنازيانىڭ ءۇش بىردەي وقۋشىسى جەڭىسكە جەتتى. 10-سىنىپ وقۋشىسى جانەل مۇراتوۆا كوركەمسوز وقۋ نوميناتسياسى بويىنشا درامالىق شىعارمادان مونولوگ وقۋ سايىسىندا باس جۇلدە الدى. ال 8-سىنىپ وقۋشىلارى ءاليحان امانباي مەن الىشەر ءبىرمان پوەزيا جانرى بويىنشا كوركەمسوز وقۋدان 1-ورىن يەلەندى. جەڭىمپازدار لايىقتى ماراپاتتالدى. ساتىبالدى ءساۋىرباي. دەرەك: «اقتوبە» گازەتى. سۋرەت: kaz.tengrinews.kz.