بيىلعى اسا جايما-شۋاق اۋا رايى الماتىلىقتارعا ناۋرىز مەرەكەسىن تاماشا اتاپ وتۋگە قولايلى جاعداي تۋعىزدى. ايتقانداي, باسىندا جىل باسىن بۇرىنعىداي تاۋەلسىزدىك الاڭىندا تويلاۋدى تاريحي ورتالىق مادەنيەت جانە دەمالىس ساياباعىنا اۋىستىرۋ تۋرالى قالا اكىمدىگىنىڭ شەشىمىنە كەيبىر تۇرعىندار تاراپىنان تۇسىنىسپەۋشىلىك تۋىنداعانداي بولعان-دى. الايدا, ناۋرىز مەيرامىن تويلاۋعا ارنالعان مەرەكەلىك شارالاردى ورتالىق ساياباققا اۋىستىرۋ وڭدى شەشىم بولعانىنا مەگاپوليس تۇرعىندارىنىڭ كوزدەرى جەتتى.
سونىمەن, الماتىلىقتار مەن شاھار قوناقتارىنا ناۋرىز مەيرامىنىڭ تاريحى, ءداستۇرى مەن نانىم-سەنىمدەرى جايلى تەاترلاندىرىلعان قويىلىمدار كورسەتىلدى. مەرەكەلىك شارانى كەم دەگەندە 100 مىڭنان استام حالىق تاماشالادى, دەپ حابارلادى الماتى قالاسى اكىمىنىڭ ءباسپاسوز قىزمەتى.
ال مەرەكەنى قالىپتاسقان ءداستۇر بويىنشا قالا باسشىسى اشىپ بەرىپ, ناۋرىز بەن ناۋرىز اراسىندا ەلىمىزگە تىنىشتىق پەن تاتۋلىق, باستاعان ىستەردىڭ باياندى بولۋىن تىلەپ:
– ناۋرىز – قاشاندا حالقىمىزدىڭ باي سالت-ءداستۇرىن ۇلىقتاپ, ءوزارا ىنتىماعىمىز بەن بەرەكەلى بىرلىگىمىزدى نىعايتا تۇسەتىن, ەرتەدەن جەتكەن قاسيەتتى مەيرام. ناۋرىز ءبىزدىڭ ناعىز جاڭا جىلىمىز بولۋى كەرەك دەپ ەلباسى اتاپ وتكەندەي, تاۋەلسىزدىك العان سوڭ, ناۋرىز مەيرامى قايتا جاڭعىرىپ, ەلىمىزدىڭ تۇكپىر-تۇكپىرىندە وتكىزىلىپ كەلەدى. بۇگىندە جالپى, حالىقتىق مەرەكەگە اينالعان ۇلىستىڭ ۇلى كۇنىنە ءبىز ەل ىرگەسىنىڭ تىنىشتىعى مەن ىلگەرى دامۋىنىڭ ارقاسىندا جەتتىك. ەلدەگى تۇراقتىلىق پەن تۇتاستىقتىڭ ارقاسىندا ەكونوميكامىز جىل سايىن كوتەرىلىپ, حالىقتىڭ ءال-اۋقاتى ارتىپ كەلەدى. حالىقتى الەۋمەتتىك قولداۋ مەن ينفراقۇرىلىمدى دامىتۋ دامىلداعان ەمەس. بۇل جۇمىستار تۇراقتى جالعاسىن تابادى, – دەدى احمەتجان ەسىموۆ.
الماتى قالاسىنىڭ اكىمى ناۋرىز مەيرامىن تويلاۋدا مەملەكەتتىك مەنشىككە قايتارىلعان ورتالىق مادەنيەت جانە دەمالىس ساياباعى باستى الاڭ اتانعانىن تىلگە تيەك ەتتى.
– بۇگىن ءبىز ناۋرىزدى الماتىلىقتار ءۇشىن ايرىقشا ورىن الاتىن ساياباقتا تويلاۋدامىز. وتكەن جىلى ورتالىق مادەنيەت جانە دەمالىس ساياباعىندا قايتا جوندەۋ جانە كورىكتەندىرۋ جۇمىستارىن جۇرگىزدىك. 2 مىڭنان استام جاسىل جەلەك پەن گۇلدەر وتىرعىزدىق. سونداي-اق, 350 ورىنعا ارنالعان ىڭعايلى كولىك تۇراعىن سالدىق. ساياباقتى جاڭعىرتۋ جۇمىستارى ءالى دە جالعاسىن تابادى, – دەپ اتاپ ءوتتى شاھار باسشىسى.
مەرەكەلىك كونتسەرتتە ەلگە تانىمال ارتىستەر, ءتۇرلى شىعارماشىلىق توپتار ونەر كورسەتتى. ساياباق اۋماعىندا 30-دان استام كيىز ءۇي تىگىلىپ, ناۋرىز-كوجە, باۋىرساق جانە تاعى باسقا ۇلتتىق تاعامدار دايىندالىپ, كونە اسپاپتار جارمەڭكەسى ۇيىمداستىرىلدى. ونەر كورسەتكەن ارتىستەر ەلىمىزدەگى ءتۇرلى ۇلت وكىلدەرىنىڭ ۇلتتىق ءبيىن ساحنالادى.
مەرەكەلىك تويلاۋ ورتالىق مادەنيەت جانە دەمالىس ساياباعىنداعى «سپارتاك» ستاديونىندا جالعاسىن تاۋىپ, 21.00-دە «كوك-توبە» ساياباعىنداعى وتشاشۋمەن اياقتالادى.
ايناش ەسالي,
«ەگەمەن قازاقستان».
الماتى.