ولجاس بەكتەنوۆ قازاقستاندىقتاردى جاڭارۋ مەن كوكتەمنىڭ, جاڭا باستامالاردىڭ مەرەكەسى – ناۋرىز مەيرامىمەن قۇتتىقتادى. قۇتتىقتاۋىندا ۇكىمەت باسشىسى كونستيتۋتسيالىق رەفورمانىڭ ەل دامۋى مەن بىرلىگىنىڭ سيمۆولىنا اينالعانىن اتاپ ءوتىپ, كوكتەم مەرەكەسى ءار شاڭىراققا بەيبىتشىلىك, بەرەكە جانە مولشىلىق اكەلسىن دەگەن تىلەگىن ءبىلدىردى, دەپ حابارلايدى Egemen.kz.
«قۇرمەتتى قازاقستاندىقتار!
بارشاڭىزدى ىرىس پەن ىنتىماقتىڭ ارقاۋى, ىزگىلىك اتاۋلىنىڭ بەرەكە-باستاۋى – ناۋرىز مەيرامىمەن شىن جۇرەكتەن قۇتتىقتايمىن!
بيىل قازاق ەلى پرەزيدەنتىمىز قاسىم-جومارت كەمەل ۇلى توقاەۆتىڭ باسشىلىعىمەن جۇزەگە اسىرىلىپ جاتقان اۋقىمدى وزگەرىستەردى قولداپ, دامۋدىڭ جاڭا كەزەڭىنە نىق قادام باستى. جاڭعىرۋدىڭ جارقىن نىشانىنا اينالعان جاڭا كونستيتۋتسيامىز ۇلتتىق ءداستۇرىمىز بەن مادەنيەتىمىزدى ۇلىقتاپ, قاستەرلى تاۋەلسىزدىگىمىزبەن بىرگە جاساي بەرمەك.
ۇلىستىڭ ۇلى كۇنى بىرلىگى بەكەم حالقىمىزدى ورتاق ماقساتقا ۇيىستىرىپ, بەيبىت ءومىر مەن ەڭسەلى ەلدىك جولىنداعى ارمان-مۇراتىنا جەتكىزسىن. جاڭارعان جىل جۇرتىمىز ءۇشىن جاسامپاز ىستەرگە, تولايىم تابىسقا تولى بولسىن. ءاز-ناۋرىزدا ءار شاڭىراق قۇت-بەرەكەگە بولەنىپ, ىرزىق-نەسىبەگە كەنەلسىن.
سىزدەرگە زور دەنساۋلىق, وتباسىلارىڭىزعا باياندى باقىت تىلەيمىن!
ۇلىس وڭ, اق مول بولسىن!», دەپ قۇتتىقتادى ۇكىمەت باسشىسى.
مەملەكەت باسشىسى ەل ازاماتتارىن ناۋرىز مەيرامىمەن قۇتتىقتادى