فوتو: ۇكىمەت, تەلەگرام
ول جاڭا كونستيتۋتسيادا ازاماتتاردىڭ دەربەس دەرەكتەرىن قورعاۋدى قامتاماسىز ەتۋگە باعىتتالعان نورما بەكىتىلگەنىن اتاپ ءوتتى. اتاپ ايتقاندا, كونستيتۋتسيانىڭ 21-بابىندا «جەكە ومىرگە قول سۇعىلماۋ, جەكە جانە وتباسىلىق قۇپيا, دەربەس دەرەكتەردى زاڭسىز جيناۋدان, وڭدەۋدەن, ساقتاۋدان جانە پايدالانۋدان, ونىڭ ىشىندە تسيفرلىق تەحنولوگيالاردى قولدانۋ ارقىلى قورعاۋ قۇقىعىنا زاڭمەن كەپىلدىك بەرىلەدى» دەپ كورسەتىلگەن.
وسى نورمانى جۇزەگە اسىرۋ ماقساتىندا اكىمشىلىك قۇقىق بۇزۋشىلىق تۋرالى كودەكستى, قىلمىستىق كودەكستى, سونداي-اق دەربەس دەرەكتەر جانە كيبەرقاۋىپسىزدىك تۋرالى زاڭداردى قوسا العاندا, بىرقاتار زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ جوسپارلانىپ جاتىر.
جۇمىستى ەكى نەگىزگى باعىت بويىنشا جۇرگىزۋ جوسپارلانىپ وتىر. ءبىرىنشىسى – ۇيىمداستىرۋشىلىق-تەحنيكالىق شارالار. ول بويىنشا دەربەس دەرەكتەردى قورعاۋدىڭ زاماناۋي قۇرالدارىن ەنگىزۋ كوزدەلىپ وتىر, ونىڭ ىشىندە دەرەكتەردى بۇركەمەلەۋ جانە حەشتەۋ تاسىلدەرى بار.
«بۇل دەرەكتەردى تەحنيكالىق تۇرعىدا قورعاۋعا جانە رۇقساتسىز قول جەتكىزۋ كەزىندە ونىڭ تارالۋ قاۋپىن ازايتۋعا مۇمكىندىك بەرەدى. مەملەكەتتىك دەرەكتەر بازاسىنان دەرەكتەردى جۇكتەپ الۋعا شەكتەۋ قويۋ جوسپارلانىپ جاتىر. اقپاراتتىق جۇيەلەردى ينتەگراتسيالاۋعا باسىمدىق بەرىلەدى, بىراق جەكەلەگەن, زاڭمەن قاتاڭ بەلگىلەنگەن جاعدايلاردى قوسپاعاندا, مالىمەتتەردى جۇكتەپ الۋعا تىيىم سالىنادى», دەپ ءتۇسىندىردى جاسلان ماديەۆ.
مينيستر مەملەكەتتىك ورگاندار دا, جەكە سەكتور دا وڭدەيتىن دەربەس دەرەكتەردى رەتكە كەلتىرۋ جانە ەسەپكە الۋ ءۇشىن كەلەسىدەي تەتىك قۇرىلاتىنىن ايتتى:
- سىنىپتارعا بولىنگەن دەربەس دەرەكتەر وپەراتورلارىنىڭ ءتىزىلىمى,
- سەنىمدى شەتەلدىك اقپارات الۋشىلار ءتىزىلىمى. بۇل تۇستا كيبەرمادەنيەت دەڭگەيىن ودان ءارى ارتتىرا تۇسۋگە ەرەكشە نازار اۋدارىلادى.
ەكىنشى باعىت – جاۋاپكەرشىلىكتى ارتتىرۋ. پايدالانۋشىلار الدىنداعى اشىقتىق پەن جاۋاپكەرشىلىكتى ارتتىرۋ ءۇشىن وپەراتورلار: دەربەس دەرەكتەردىڭ تاراپ كەتۋ فاكتىلەرى تۋرالى ۋاكىلەتتى ورگانعا دا, ازاماتتاردىڭ وزىنە دە حابارلاۋعا, سونداي-اق دەربەس دەرەكتەردى وڭدەۋدىڭ باستالعانى تۋرالى ۋاكىلەتتى ورگانعا حابارلاۋعا مىندەتتى.
بۇدان باسقا, دەربەس دەرەكتەردىڭ جاپپاي تاراپ كەتكەنى ءۇشىن قىلمىستىق جاۋاپكەرشىلىك ەنگىزۋ جانە اكىمشىلىك ايىپپۇل شەگىن 5000 اەك-كە دەيىن ارتتىرۋ قاراستىرىلىپ جاتىر.
