ەڭبەكشىقازاق اۋدانىنىڭ تۇرعىندارى رەسپۋبليكالىق رەفەرەندۋمعا قاتىسۋ بارىسىندا ۇلتتىق سيمۆولدار مەن بەينەلەردەن شابىت الىپ, كرەاتيۆتى كوزقاراس تانىتىپ جاتىر, دەپ حابارلايدى Egemen.kz.
الماتى وبلىسى اكىمدىگىنىڭ مالىمەتىنشە, ەسىك قالاسىنداعى №123 سايلاۋ ۋچاسكەسىندە داۋىس بەرۋ بارىسىندا تۇرعىنداردىڭ نازارىن ەرەكشە قاتىسۋشى اۋداردى – قازاقستان تاريحى مەن مادەنيەتىنىڭ ماڭىزدى سيمۆولدارىنىڭ ءبىرى سانالاتىن التىن ادام بەينەسىندەگى ازامات. قالا تۇرعىنى سايلاۋ ۋچاسكەسىنە «التىن ادام» بەينەسىندە ساندەلگەن كوستيۋممەن كەلىپ, مەرەكەلىك كوڭىل-كۇي سىيلاپ, جينالعانداردىڭ قىزىعۋشىلىعىن تۋدىردى.
الماتىدا «بۇركىت» رەفەرەندۋمدا ءوز تاڭداۋىن جاسادى
اكتسياعا قاتىسۋشىنىڭ ايتۋىنشا, ونىڭ تاڭداۋى ەلدىڭ بولاشاعىنا ءوز ۇلەسىن قوسۋعا دەگەن ۇمتىلىستان تۋىنداعان.
«مەن ەڭ دۇرىس جولدى تاڭدادىم – ءوز ەلىمنىڭ بولاشاعىنا بەيجاي قاراماي, ونىڭ دامۋىنا بەلسەندى قاتىسۋ. مەنىڭ اتا-بابالارىم دا كەزىندە ماڭىزدى شەشىمدەر قابىلداعان, مەن ولاردىڭ اماناتىنا ادال بولۋعا تىرىسامىن. بۇگىن ءدال «التىن ادام» بەينەسىن تاڭداعانىم دا كەزدەيسوق ەمەس. بۇل بەينە حالقىمىزدىڭ تاريحىن ايشىقتاپ, جەرلەستەرىمنىڭ بويىندا ماقتانىش سەزىمىن وياتىپ, ۇلتتىق رۋحتى نىعايتادى», دەدى ول.
وسىنداي باستامالار داۋىس بەرۋ ۇدەرىسىنە ەرەكشە اتموسفەرا سىيلاپ, ءوڭىر تۇرعىندارىنىڭ ازاماتتىق جاۋاپكەرشىلىگىنىڭ جوعارى ەكەنىن كورسەتەدى. كوپشىلىك ءۇشىن رەفەرەندۋمعا قاتىسۋ تەك ماڭىزدى قوعامدىق-ساياسي وقيعا عانا ەمەس, سونىمەن قاتار ۇلتتىق داستۇرلەر مەن مادەني مۇراعا دەگەن قۇرمەتتى ءبىلدىرۋدىڭ ءبىر كورىنىسى بولدى.
پرەزيدەنت قاسىم-جومارت توقاەۆ رەسپۋبليكالىق رەفەرەندۋمدا داۋىس بەردى