باتىس قازاقستان وبلىسىنداعى «جامبىل» شارۋا قوجالىعىنىڭ جەتەكشىسى بولات اتكەەۆپەن اڭگىمە
ەلىمىزدىڭ ەڭبەككەر ەرلەرى ءۇشىن ناعىز باسەكە, شىنايى باسەكە, جان الىسىپ جان بەرىسپەگەنمەن تامشىلاتىپ تەر توگىپ, قولدان كەلگەن مۇمكىندىكتى جىبەرىپ المايتىن جويقىن باسەكە ەندى كەلگەندەي. رەسپۋبليكامىزدىڭ دۇنيەجۇزىلىك ساۋدا ۇيىمىنا كىرۋى جونىندەگى ماسەلە: «ەندى نە بولار ەكەن؟» دەپ الدەبىرەۋلەردىڭ سىرتتاي قىزىقتايتىن شارۋاسى بولا المايدى. بۇل كوپتىڭ ءىسى. كوپپەن بىرگە كورەتىن, كوپپەن بىرگە بولىسەتىن ناعىز ۇلى توي دا وسى بولماق. بۇعان اۋىلداعى شارۋا باققان اعايىندارىمىز دا ەنجار, سەلسوق قاراي المايدى. سولاردىڭ ءبىرى – اقجايىق اۋدانىنداعى «جامبىل» شارۋا قوجالىعىنىڭ جەتەكشىسى بولات اتكەەۆ. جۇمىس دەسە جانىن بەرگەن قازاقتىڭ نار تۇلعالى ازاماتىمەن اڭگىمەمىز قازاقستاننىڭ دۇنيەجۇزىلىك ساۋدا ۇيىمىنا كىرۋى توڭىرەگىندە ءوربىدى.
– ءسىز مەملەكەت باسشىسىنىڭ قازاقستان حالقىنا ۇندەۋىمەن تانىستىڭىز با؟ بۇل ۇندەۋ سىزگە قانداي اسەر قالدىردى؟
– ەڭ الدىمەن تەلەديدار ارقىلى تىڭدادىم. ال ۇندەۋدىڭ «ەگەمەن قازاقستان» گازەتىندە جاريالانعان ءماتىنى شالعاي نۇكتەدە, جازعى جايلاۋدا جىلقى باعىپ جۇرگەن مەنىڭ قولىما تەك بۇگىن ءتيىپ وتىر. ونى زەر سالىپ, زەيىن قويىپ, بىرنەشە رەت استىن سىزىپ وقىپ شىقتىم. وسى قىسقا دا نۇسقا ۇندەۋ ءماتىنى ناردىڭ جۇگىن ەمەس, بۇكىل ەلدىڭ جۇگىن ارقالاپ تۇرعانداي اسەر قالدىردى. بۇدان مەن ەلىمىزدىڭ الدىندا تۇرعان اۋقىمدى جۇمىستاردىڭ اۋىر سالماعىن سەزىنگەندەي كۇي كەشتىم.
– بوكە, مەملەكەت باسشىسى ۇندەۋدە بۇعان دەيىن دە ايتىلىپ جۇرگەن باسەكە, باسەكەلەستىككە توتەپ بەرۋ دەگەن ۇلكەن دە جاۋاپتى سىنعا ەرەكشە ەكپىن تۇسىرگەنىن اڭعارعان شىعارسىز. بۇعان نە دەيسىز؟
– مەنىڭ ۇعىمىمدا باسەكە وزگەگە ءوزىن مويىنداتا ءبىلۋ, ودان وزىپ شىعۋ دەگەن ءسوز. باسەكە ءبىزدىڭ حالقىمىزعا جات ۇعىم ەمەس. وسى التى ارىپتەن تۇراتىن ءسوزدىڭ العاشقى ءۇش ءارپى ءباس دەلىنسە بۇدان ءارى ءباس تىگۋ, باستەسۋ دەگەن ءتول ۇعىمدار شىعا كەلەدى. مۇنىڭ ءبارىنىڭ ءتۇپ-توركىنى مەن تۇقيانىندا جانە ارعى استارىندا مەرەيى ۇستەم بولۋ, بەلگىلى ءبىر ءىستىڭ ناتيجەسى بويىنشا وزىق شىعۋ دەگەن وي شىعادى. وسى حالىقتىق ۇعىمنىڭ بۇگىندە ءمانى مەن ماڭىزى ودان ءارى تەرەڭدەپ حالىقارالىق سىيپاتقا يە بولىپ وتىر.
ءبىز ءوزارا باسەكەدە قاي كەزدە دە جولىنان ەشقاشان جىعىلىپ كورمەگەن, ءارى بۇل ىستە نامىسىن قولدان بەرمەگەن ەلدىڭ ۇرپاعىمىز. قانىمىز بەن تەگىمىزدە بار وسى قاسيەتتەرىمىزدى جارقىراپ اشاتىن ءسات ەندى تۋدى دەگەن ويدامىن. قازىرگى جاعدايدا باسەكەلەستىككە قول جەتكىزۋگە ءاربىر وتانداسىمىز ءبىر كىسىدەي ۇمتىلاتىن بولسا, بىزگە دسۇ بەرەتىن ارتىقشىلىقتاردى پايدالانا بىلەتىنىمىزدى دالەلدەۋ اسا ءبىر قيىنعا تۇسە قويمايدى.
– ەندەشە, وسىعان ناقتى قانداي مىسالدار كەلتىرە الار ەدىڭىز.
– بىرىنشىدەن, باسەكەگە تۇسە الاتىن, وعان ءتۇسىپ قانا قويماي, وسى باسەكەدە وزا الاتىن تۇستارىمىزعا باسا نازار اۋدارۋعا ءتيىسپىز. ەگەر قاتەلەسپەسەم, رەسپۋبليكامىزدا مۇنداي رەسۋرستار مەن مۇمكىندىكتەر كوزى جەتكىلىكتى. ءبىز و باستان جىلقى باققان, ونى مىنسە كولىك, جەسە ەت, ءارى سۋسىن رەتىندە پايدالانا بىلگەن حالىقپىز. بۇل تۇرعىدا اۋرۋعا ەم, ساۋعا قۋات ءدارى قىمىز دەپ جامبىل اتامىزدىڭ جىرعا قوسقان ولەڭى بار ەمەس پە؟ باسەكەدە وزا ءبىلۋدىڭ ءبىر مىسالى دا ءدال وسى ارادا دەپ تۇسىنەمىن. بۇل ءۇشىن جىلقى ونىمدەرىن وڭدەۋگە مۇلدەم جاڭاشا مەملەكەتتىك كوزقاراس قاجەت دەگەن ويدامىن.
قىمىزدىڭ پاتەنتىن نەمىستەر يەلەنىپ كەتىپتى دەپ قۇر اتتانداپ ۇران سالعانىمىزعا ءبىراز ۋاقىت ءوتتى. ەندىگى جەردە بىزگە پايدا بەرمەيتىن مۇنداي بوس سوزدەردى تىيىپ, قازى-قارتا, جال-جايا, بۇقتىرىلعان جىلقى ەتى سەكىلدى برەندىمىزدى قورعاپ قالۋعا, وسى ارقىلى دۇنيەجۇزىلىك ساۋدا باسەكەسىندە وزىپ شىعۋعا باعىت ۇستاعانىمىز ورىندى. مىسالى, ورال قالاسىنداعى «كۋبلەي» جشس قالبىرداعى وسىنداي جىلقى ەتى ونىمدەرىن تاياۋ جانە الىس شەتەلدەر نارىعىنا شىعارىپ جۇرگەنىن بىلەمىز. تەك مۇنداي ورەلى ىستەردىڭ ءورىسى كەڭەيىپ, ءازىر ونىمدەرگە قاجەتتى شيكىزاتتى ءوز ەلىمىزدەن پايدالانۋعا قام جاسايتىن بولساق, بۇدان ەش ۇتىلماسىمىز انىق. ۇتىلماۋ بىلاي تۇرسىن, باسەكەدەن وزىپ شىعاتىنىمىزعا دا كۇمانىمىز جوق.
– اڭگىمەڭىزگە راحمەت.
اڭگىمەلەسكەن
تەمىر قۇسايىن,
«ەگەمەن قازاقستان».
باتىس قازاقستان وبلىسى,
اقجايىق اۋدانى.