وليمپيا ويىندارىنا قاتىساتىن ەلىمىزدىڭ سپورتشىلارى قاتارىندا دارىندى جاستار از ەمەس. سولاردىڭ اراسىندا اناستاسيا گورودكونىڭ شوقتىعى بيىك. فريستايلدى سەرىك ەتكەن 20 جاستاعى بۇرىمدى وسىعان دەيىن دە بيىك بەلەستەردى باعىندىرىپ, ءوزىنىڭ شىنايى الەۋەتىن بايقاتقان ەدى.
اناستاسيا 2005 جىلى وسكەمەندە دۇنيەگە كەلدى. بەس جاسىنان فريستايل-موگۋلعا قىزىعىپ, جەرگىلىكتى جاتتىقتىرۋشى ۆيكتور رەيحەردتىڭ قول استىندا جاتتىقتى. بالاۋسا شاعىنان دارا تالانتىمەن وقشاۋلانىپ, ءوز قاتارىنىڭ الدى بولدى. ەلىشىلىك جارىستاردا جەڭىس تۇعىرىنا كوتەرىلگەننەن كەيىن حالىقارالىق دودالارعا قاتىستى. بۇل رەتتە دە ءوزىن جاقسى قىرىنان كورسەتتى. 2021 جىلى الماتىدا وتكەن الەم چەمپيوناتىندا 16 جاسقا دا تولماعان ورىمدەي قىز وزىنەن الدەقايدا تاجىريبەلى قارسىلاستارىن قاپى قالدىرىپ, قولا مەدالدى موينىندا جارقىراتتى. كەلەسى جىلى بەيجىڭ وليمپياداسىندا باق سىنادى. سول ماۋسىمدا جەرلەسىمىز يتالياداعى جاستار اراسىندا وتكەن الەم بىرىنشىلىگىندە موگۋل مەن پاراللەل موگۋلدى قوسا العاندا 1 التىن, 2 كۇمىستى قورجىنعا سالدى.
اپەننين تۇبەگىنەن ورالعاننان كەيىن اناستاسيا ءوزىنىڭ تۋعان ولكەسى – شىعىس قازاقستان وبلىسى اۋماعىندا جول اپاتىنا ءتۇستى. موتوتسيكل تىزگىندەگەن جاس قارا جولدىڭ بويىندا جەڭىل كولىكپەن سوقتىعىسىپ, اۋىر جاراقات الدى. وعان ەكى وپەراتسيا جاسالدى. ءبىرى – ەلىمىزدە, ەكىنشىسى – گەرمانيادا. جاعدايى وڭالعاننان كەيىن گورودكو سۇيىكتى ىسىمەن قايتا اينالىسىپ, ءتۇرلى جارىستا بوي كورسەتتى. كەندى التايدىڭ ارۋى جاستاردىڭ دۇنيەجۇزىلىك دوداسىندا ءبىر ەمەس, بىرنەشە مارتە توپ جاردى. ودان بولەك, كۇمىس مەدالدى دا يەلەندى.
وتكەن جىل اناستاسياعا اسا تابىستى بولدى. اۋەلى ول شۆەيتساريانىڭ ەنگادينىندە شىمىلدىعى تۇرىلگەن ايەلدەردىڭ الەم چەمپيوناتىندا قولاعا قول سوزسا, يتاليانىڭ تۋرينىندە الاۋ تۇتانعان دۇنيەجۇزىلىك ۋنيۆەرسيادادا ەكى مارتە التىن تۇعىردان قول بۇلعادى. سونداي-اق وتانداسىمىز الەم كۋبوگىنىڭ ەكى كەزەڭىندە قارسىلاس شىداتپاي, باس جۇلدەنى ولجالادى. ەندى ءبىز ۋاقىت وزعان سايىن شەبەرلىك دەڭگەيى ءوسىپ كەلە جاتقان اناستاسيادان وليمپيادادا دا جۇلدە كۇتەمىز.