وليمپيا ويىندارىنا اتتانعان ساناۋلى قانداسىمىزدىڭ اراسىنداعى ەڭ مىقتىسى – ابزال اجعاليەۆ. جانكۇيەرلەر ءدۇبىرلى دودادا جۇلدە الىپ جۇرگەن شورت-ترەكتىڭ حاس شەبەرى اپەننين تۇبەگىندە اتوي سالادى دەپ ۇمىتتەنىپ وتىر.
ەلىمىزدە وسى سپورت ءتۇرىنىڭ قارىشتاپ دامۋىنا ولشەۋسىز ۇلەس قوسقان اتاقتى باپكەر مادىعالي قارسىبەكوۆ پەن جاسۇلان مۇحامبەتقاليەۆ ورال قالاسىنداعى شورت-ترەك ۇيىرمەسىنىڭ تابالدىرىعىنان اتتاعان بوزبالانىڭ بويىنداعى ەرەكشە قابىلەتتى بىردەن بايقادى. قانداي سىناققا سالسا دا, جاس دارىن تاباندىلىق پەن جانكەشتىلىكتىڭ شىنايى ۇلگىسىن كورسەتە ءبىلدى. جاتتىعۋ بارىسىنداعى ەڭبەكقورلىعى ەرەن بولدى.
ايبارلى ابزالدىڭ قورجىنىندا وليمپيا ويىندارى مەن الەم چەمپيوناتىنىڭ مەدالى عانا جوق. وزگە جارىستاردا سان مارتە جەڭىس تۇعىرىنا كوتەرىلدى. اتاپ ايتساق, قورجىنىندا ازيا ويىندارىنىڭ تولىق جۇلدە جيىنتىعى بار. سونداي-اق الەم كۋبوگىنىڭ جەڭىمپازى, دۇنيەجۇزىلىك ۋنيۆەرسيادانىڭ بىرنەشە دۇركىن جۇلدەگەرى, ەلىمىزدىڭ 12 دۇركىن چەمپيونى دەگەن مارتەبەلى اتاقتارعا قول جەتكىزگەن ساڭلاق. ءۇش بىردەي وليمپياداعا قاتىسىپ, سونىڭ ەكەۋىنىڭ اشىلۋ سالتاناتىندا قازاقتىڭ كوك بايراعىن ۇستاپ شىقتى. 2014 جىلى سوچيدە بەسىنشى ورىن السا, 2018 جىلى پحيونچحاندا التىنشى ساتىعا جايعاستى. 2022 جىلى بەيجىڭدە جەڭىس تۇعىرىنا سىنىق سۇيەم عانا جەتپەي, ءتورتىنشى ورىنعا تۇراقتادى.
ابزالدىڭ بويىندا ناعىز چەمپيونعا ءتان قاسيەتتىڭ بارلىعى بار. ول – ەڭبەكقور, جاتتىعۋ زالىندا شەلەكتەپ تەر توگۋدەن ەش تارتىنبايدى. جەڭىسكە جەتۋ جولىندا ەش ايانىپ قالمايدى. تەحنيكاسى جەتىك, شەبەرلىگى شىڭدالعان, دۇرىس تاكتيكا قۇرىپ, قاجەت كەزىندە شۇعىل شەشىم قابىلداي الادى. مىنە, وسى قاسيەتتەر ا.اجعاليەۆتى بيىل وليمپيا ويىندارىنىڭ شىڭىنا جەتەلەۋگە ءتيىس.