ىشكى ىستەر مينيسترلىگى ستالكينگ ءۇشىن قىلمىستىق جاۋاپكەرشىلىك قاراستىرىلعانىن حابارلاپ, ول ءۇشىن قانداي جاۋاپكەرشىلىك كوزدەلگەنىن ەسكە سالدى.
مينيسترلىك ازاماتتاردىڭ جەكە ءومىرى مەن قاۋىپسىزدىگى زاڭمەن قورعالاتىنىن, ال اڭدۋ, قايتا-قايتا مازالاۋ قىلمىس ەكەنىن ەسكەرتەدى. قايتا-قايتا قوڭىراۋ شالۋ, حابارلاما جىبەرۋ, الەۋمەتتىك جەلىلەر ارقىلى باقىلاۋ, ادامنىڭ ەركىنەن تىس ىزىنە ءتۇسۋ – ستالكينگ.
«بۇل ارەكەتتەر ادامنىڭ قاۋىپسىزدىگىنە جانە پسيحولوگيالىق جاي-كۇيىنە تىكەلەي قاۋىپ توندىرەدى. قازاقستان رەسپۋبليكاسىنىڭ قىلمىستىق كودەكسىنىڭ 115-1-بابىنا سايكەس, ستالكينگ فاكتىسىنە زاڭمەن قاتاڭ جاۋاپكەرشىلىك كوزدەلگەن.
اتالعان باپقا سايكەس, 200 ايلىق ەسەپتىك كورسەتكىشكە دەيىن ايىپپۇل سالىنىپ, 200 ساعاتقا دەيىن قوعامدىق جۇمىستارعا تارتۋ كوزدەلگەن. سونداي-اق 50 تاۋلىككە دەيىن قاماۋعا الۋ جازاسى قاراستىرىلعان», دەلىنگەن مينيسترلىكتىڭ رەسمي حابارلاماسىندا.
مينيسترلىك حابارلاماسىندا كونستيتۋتسيا ءاربىر ازاماتتىڭ جەكە ومىرىنە قول سۇعۋعا بولمايتىنىن جانە قاۋىپسىزدىك قۇقىعىن قورعاۋعا كەپىلدىك بەرەتىنى ايتىلعان. ياعني زاڭ بۇزۋشىلىق – مىندەتتى تۇردە جاۋاپكەرشىلىككە اكەلىپ سوعادى. سوندىقتان وزگە ادامنىڭ «جوق» دەگەن جاۋابىنا مىندەتتى تۇردە قۇرمەتپەن قاراۋ زاڭمەن مىندەتتەلگەن.
سونداي-اق قۇقىق قورعاۋ ورگاندارى قوعامدىق قاۋىپسىزدىكتى قالىپتاستىرۋ ماقساتىندا ينتەرنەت الاياقتىقتىڭ جاڭا سحەماسى تۋرالى ەسكەرتەدى. شەتەلدىك دەرەككوزدەردىڭ مالىمەتتەرى بويىنشا الاياقتار تەگىن ەلەكتروندىق كىتاپتار رەتىندە Telegram-عا زياندى فايلداردى تاراتادى. ءسويتىپ, تelegram-نان كىتاپتاردىڭ ۇلكەن جيىنتىعى قولجەتىمدى ەكەنى جايلى شەكتەۋسىز حابارلاما جىبەرەدى.
قاجەتتى باسىلىم سۇرالعاننان كەيىن بوت ناقتى سەرۆيسكە يميتيتسيا جاساي وتىرىپ, كىتاپ سيۋجەتىنىڭ قىسقاشا سيپاتتاماسىن جاسايدى, بىراق كىتاپتى وقۋ نەمەسە جۇكتەۋدىڭ ورنىنا «ارنايى قوسىمشا» دەگەن اتاۋمەن ۆيرۋستىق فايل جىبەرەدى.
فايلدى ورناتقان كەزدە الاياقتار قۇپياسوزدەر مەن قاراجات ۇرلاپ, حات الماسۋعا جانە فوتوسۋرەتتەرگە قول جەتكىزەدى. سونداي-اق بۇل «تەگىن كىتاپحانانىڭ» سالدارى سمارتفوندى قاشىقتان باسقارۋ جانە جەكە دەرەكتەردى جوعالتۋعا اكەپ سوعادى. سول سەبەپتى پوليتسيا بەيرەسمي كوزدەردەن باسقا قوسىمشالاردى ورناتۋ قاۋىپتى ەكەنىن ەسكە سالادى.
مينيسترلىك كيبەرگيگيەنا ەرەجەلەرىن ساقتاۋ جانە جەكە قىراعىلىق وسىنداي قاۋىپ-قاتەرلەردەن قورعاۋدىڭ نەگىزگى شارالارى ەكەنىن قاپەرىڭىزگە سالادى.