پرەمەر-مينيستر ولجاس بەكتەنوۆ ۇلتتىق عىلىم اكادەمياسىنىڭ مۇشەلەرى, مەملەكەتتىك ورگاندار باسشىلارى, بىرقاتار وبلىس اكىمدەرى مەن بيزنەس-قوعامداستىق وكىلدەرىنىڭ قاتىسۋىمەن عىلىم ماسەلەلەرىنە ارنالعان كەڭەس وتكىزدى. جيىندا عىلىمي جوبالاردى جۇزەگە اسىرۋ, عىلىم مەن ناقتى سەكتور اراسىنداعى كووپەراتسيانى نىعايتۋ, سونداي-اق ۇلتتىق عىلىم اكادەمياسىنىڭ الەۋەتىن ەكونوميكانىڭ ءتۇرلى سالاسىن دامىتۋعا تارتۋ باعىتتارى كەڭىنەن تالقىلاندى.
پرەزيدەنتتىڭ ەكونوميكانى تسيفرلىق ترانسفورماتسيالاۋ جونىندەگى تاپسىرمالارىن ورىنداۋ اياسىندا عالىمداردى قولداۋ, عىلىم ناتيجەلەرىن وندىرىسكە ەنگىزۋ مەن يننوۆاتسيالىق شەشىمدەردى ىلگەرىلەتۋ ماسەلەلەرى كۇن تارتىبىنە شىقتى. كەڭەستى اشقان پرەمەر-مينيستر جاڭا كونستيتۋتسيا جوباسىن قوعامعا اشىق ءارى ناقتى ءتۇسىندىرۋدىڭ ماڭىزىنا توقتالىپ, قۇجاتتا ەلدە ءجۇرىپ جاتقان ساياسي ءارى ەكونوميكالىق وزگەرىستەردىڭ, سونىڭ قاتارىندا ءبىلىم, عىلىم جانە يننوۆاتسيا سالاسىنداعى باسىمدىقتاردىڭ ايقىن كورىنىس تاپقانى تۋرالى ايتتى.
«اتا زاڭنىڭ جاڭا جوباسى – بولاشاققا باعدارلانعان پروگرەسسيۆتى قۇجات. وندا ادام مەن ونىڭ قۇقىقتارى, بوستاندىعى مەملەكەتتىڭ نەگىزگى باسىمدىعى رەتىندە جاريا ەتىلدى. پرەزيدەنت قاسىم-جومارت توقاەۆتىڭ «زاڭ مەن ءتارتىپ» ۇستەمدىك قۇرعان, «ادىلەتتى ءارى تازا قازاقستاندى قۇرۋ» يدەياسى حالىقتىڭ كەڭ قولداۋىنا يە بولىپ وتىر. «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» تۇجىرىمداماسى ساياسي جۇيەنىڭ تۇراقتىلىعى مەن ساباقتاستىعىن نىعايتا تۇسەدى», دەدى و.بەكتەنوۆ.
جاھاندىق وزگەرىستەر, جوعارى تەحنولوگيالاردىڭ قارقىندى دامۋى مەن «ورتا دەرجاۆالار» ءرولىنىڭ ارتۋى جاعدايىندا كونستيتۋتسيالىق رەفورمانىڭ ۋاقتىلى ءارى ستراتەگيالىق ماڭىزى بار قادام ەكەنى باسا ايتىلدى. تالقىلاۋ بارىسىندا عىلىمي قاۋىمداستىق وكىلدەرى جاڭا كونستيتۋتسيا جوباسىن قولداپ, عىلىمدى مەملەكەتتىڭ تۇراقتى دامۋىنىڭ وزەگى رەتىندە شوعىرلاندىرۋ قاجەتتىگىنە نازار اۋدارتتى.
ۇلتتىق عىلىم اكادەمياسىنىڭ پرەزيدەنتى اقىلبەك كۇرىشباەۆ جاڭا كونستيتۋتسيا جوباسى ادام قۇقىقتارى مەن بوستاندىقتارىن بەكىتىپ قانا قويماي, ەلىمىزدىڭ ۇزاقمەرزىمدى عىلىمي-تەحنولوگيالىق دامۋىنىڭ بەرىك نەگىزىن قالىپتاستىراتىنىن ايتتى. ال اكادەميك ۆياچەسلاۆ لوكشين مەديتسينا عىلىمىنىڭ دامۋى ۇلتتىق قاۋىپسىزدىك پەن ورنىقتى دەنساۋلىق ساقتاۋ جۇيەسىن نىعايتۋدىڭ نەگىزگى فاكتورى ەكەنىنە توقتالىپ, عىلىمدى ستراتەگيالىق رەسۋرس رەتىندە تانۋدىڭ ماڭىزدىلىعى جونىندە پىكىر ءبىلدىردى. وسى تۇرعىدا جاساندى ينتەللەكت, ۇلكەن دەرەكتەر, تسيفرلىق دياگنوستيكا مەن تەلەمەديتسينا باعىتتارىن دامىتۋ وزەكتى ەكەنى ايتىلدى.
كەڭەس بارىسىندا عىلىمنىڭ ەكونوميكاعا قوساتىن ۇلەسىن ارتتىرۋ ماسەلەلەرى دە قوزعالدى. مەملەكەت عىلىمي ازىرلەمەلەردى قارجىلاندىرۋعا جۇمسالاتىن شىعىستارعا 300%-عا دەيىن سالىقتىق جەڭىلدىكتەر ۇسىنىپ, جەر قويناۋىن پايدالانۋشىلاردىڭ وندىرىستىك شىعىستارىنىڭ 1%-ىن عزتكج-عا باعىتتاۋ تەتىگىن ەنگىزدى. كەيىنگى ءۇش جىلدا عىلىمدى قارجىلاندىرۋ كولەمى 3,5 ەسەگە ارتىپ, بيىل 214 ملرد تەڭگەگە جەتتى. مەملەكەت باسشىسى بۇل كورسەتكىشتى 2029 جىلعا قاراي ءىجو-ءنىڭ 1%-ىنا جەتكىزۋ مىندەتىن قويعان.
پرەمەر-مينيستر وتاندىق عىلىمنىڭ تيىمدىلىگىن, ينۆەستيتسيالىق تارتىمدىلىعى مەن اشىقتىعىن ارتتىرۋ باعىتىندا جۇيەلى جۇمىس جۇرگىزىلىپ جاتقانىن اتاپ ءوتىپ, ۇلتتىق عىلىم اكادەمياسى ەلدىڭ ستراتەگيالىق دامۋىن قامتاماسىز ەتەتىن نەگىزگى زياتكەرلىك ورتالىققا اينالۋعا ءتيىس ەكەنىن ايتتى.
اقىلبەك كۇرىشباەۆ ەكونوميكاعا عىلىمي ازىرلەمەلەردى جەدەل ەنگىزۋگە باعىتتالعان بىرقاتار باستاما ۇسىندى. اكادەميا فورسايتتى جوسپارلاۋدىڭ تۇراقتى قۇرالىنا اينالىپ, وڭىرلىك جانە سالالىق دەڭگەيدە ونداعان سەسسيا وتكىزىپ, پەرسپەكتيۆالىق مىندەتتەر مەن عىلىمي-تەحنيكالىق تاپسىرمالار ازىرلەگەنى ءمالىم بولدى. بۇعان قوسا عىلىم مەن تەحنولوگيالار جونىندەگى وڭىرلىك كەڭەستەردىڭ عىلىمي-يننوۆاتسيالىق دامۋدى باسقارۋداعى ماڭىزى ەرەكشە ەكەنى ايتىلدى.
سالالىق مينيسترلىكتەر ناقتى ناتيجەلەردى تانىستىردى. ونەركاسىپ جانە قۇرىلىس ءمينيسترى ەرسايىن ناعاسپاەۆ تاۋ-كەن مەتاللۋرگيا كەشەنىندە كەيىنگى بەس جىلدا 150 ملرد تەڭگەگە جۋىق ينۆەستيتسيا سالىنىپ, 1,5 مىڭنان استام جوبا جۇزەگە اسىرىلعانىن جەتكىزدى. اگروونەركاسىپ كەشەنىندە وتاندىق سەلەكتسيانىڭ 743 سۇرپى تىركەلىپ, ەگىس القاپتارىنىڭ شامامەن 60%-ى وتاندىق تۇقىمدارمەن قامتاماسىز ەتىلىپ وتىر.
وڭىرلەر دە عىلىمي-يننوۆاتسيالىق ەكوجۇيەنى دامىتۋعا قاتىستى ۇسىنىستارىن ورتاعا سالدى. اقتوبە مەن شىعىس قازاقستان وبلىستارىنىڭ اكىمدەرى زەرتحانالىق بازانى نىعايتۋ, تەحنولوگيالار ترانسفەرتى مەن حالىقارالىق عىلىمي ىنتىماقتاستىقتى كەڭەيتۋ جونىندەگى جوسپارلارىن تانىستىردى. بۇعان قوسا ەرلان باتىربەكوۆ, اسقار جۇمادىلداەۆ سەكىلدى عالىمدار عىلىمي الەۋەتتى شوعىرلاندىرۋ, اتوم ەنەرگەتيكاسى قاۋىپسىزدىگى, راديوەكولوگيا جانە ماتەريالتانۋ سالالارىن دامىتۋ قاجەتتىگىن اتاپ ءوتتى. جيىن قورىتىندىسىندا ۇكىمەت باسشىسى بىرقاتار ناقتى تاپسىرما بەردى.