حالىق نازارىنا ۇسىنىلعان جاڭا كونستيتۋتسيا جوباسىندا ايتىلعان اۋقىمدى باستامالارعا ەلىمىزدەگى ساياسي پارتيالار ءۇن قوسىپ جاتىر. ولار ءاربىر وزگەرىستىڭ ارتىندا ەلدىڭ تاعدىرى مەن بولاشاعى تۇرعانىن اتاپ ءوتتى. سوندىقتان بۇل تالقىلاۋعا ءاربىر ازامات اتسالىسۋعا ءتيىس.
جالپىۇلتتىق سوتسيال-دەموكراتيالىق پارتياسىندا كونستيتۋتسيانىڭ جاڭا جوباسىن تالقىلاۋعا ارنالعان ساياسي كەڭەس وتىرىسى ءوتتى. قاتىسۋشىلار كونستيتۋتسياعا ەنگىزىلەتىن وزگەرىستەر مەن ونداعى ۇسىنىلعان ءتۇرلى جوبانىڭ ەلدى دامىتۋعا دەگەن مۇمكىندىگىن سارالادى. سونداي-اق ساياسي جۇيەنىڭ قوعام مەن مەملەكەت اراسىنداعى ىنتىماق پەن جاڭارتۋداعى ماڭىزىن قاراستىردى.
ساياسي كەڭەس مۇشەلەرى اتا زاڭدى تالقىلاۋ قوعامنىڭ جاڭارۋعا جانە ەلىمىزدىڭ قازىرگى دامۋ كەزەڭىنە ساي تۇراقتى شەشىمدەر مەن مۇمكىندىكتەردى ىزدەۋگە دەگەن سۇرانىسىن جوعارىلاتقانىن اتاپ ءوتتى. سونىمەن بىرگە جيىنعا قاتىسۋشىلار كونستيتۋتسيادا بەكىتىلەتىن نورمالار الەۋمەتتىك سالادا, ەڭبەك قاتىناستارىندا جانە ازاماتتاردىڭ ءومىر ساپاسىن ارتتىرۋدا ناقتى جۇمىستاردى العا قويىپ وتىرعانىنا توقتالدى.
رەفورمانىڭ ينستيتۋتسيونالدىق قىرلارىنا دا ەرەكشە نازار اۋدارىلدى. قاتىسۋشىلار بيلىك تارماقتارى اراسىنداعى ءوزارا ءىس-قيمىلدىڭ تۇراقتى مودەلىن قالىپتاستىرۋدىڭ ماڭىزىنا توقتالىپ, وكىلەتتى ورگانداردىڭ ءرولىن كۇشەيتۋ مەن مەملەكەتتىك ينستيتۋتتاردا قابىلداناتىن شەشىمدەرگە دەگەن جاۋاپكەرشىلىكتەرىنىڭ جوعارى بولۋى قاجەت ەكەنىن ەسكە سالدى.
ەلوردادا Respublica پارتياسى اكتيۆىنىڭ كەڭەيتىلگەن وتىرىسى ءوتىپ, ول نەگىزگى زاڭعا سالماقتى كوزقاراسپەن قاراپ, ورتاق پارتيالىق ۇستانىمدى قالىپتاستىرۋعا ارنالعان اشىق ديالوگ الاڭىنا اينالدى.
وتىرىستى اشقان پارتيا توراعاسى ايداربەك قوجانازاروۆ ۇسىنىلىپ وتىرعان قۇجاتتى مەملەكەتتىڭ دامۋى ءۇشىن ساپالىق تۇرعىدان جاڭا كەزەڭ دەپ باعالاپ, تالقىلاۋدىڭ باعىتىن ايقىندادى. ول قۇجاتتا ۋنيتارلى قۇرىلىم مەن اۋماقتىق تۇتاستىقتىڭ مىزعىماي ساقتالعانىن ەرەكشە اتاپ ءوتتى. سونىمەن قاتار جاڭا جوبانىڭ وزەگىندە ادامعا باعىتتالعان, ازاماتتىڭ قۇقىعى مەن قادىرىن الدىڭعى ورىنعا قوياتىن كوزقاراس بار ەكەنىن ايتتى.
وڭىرلىك پارتيا جەتەكشىلەرى رەفورمانىڭ پراكتيكالىق قىرلارىنا توقتالسا, Re.Women ايەلدەر قاۋىمداستىعى مەن ReJastary جاستار قوزعالىسىنىڭ وكىلدەرى رەفورمانى ازاماتتىق قاتىسۋدى كەڭەيتەتىن ناقتى تەتىك رەتىندە قولدايتىندارىن ءبىلدىردى.
وتىرىستا ءماجىلىس دەپۋتاتتارى, Respublica پارتياسى فراكتسياسىنىڭ مۇشەلەرى, ايماقتىق فيليالدار توراعالارى دا ءسوز سويلەپ, وي-پىكىرلەرىن ورتاعا سالدى.
كەشە قازاقستان حالىق پارتياسى فراكتسياسىنىڭ وتىرىسىندا دا دەپۋتاتتار جاڭا كونستيتۋتسياسىنىڭ جوباسىن تالقىلادى. وتىرىس بارىسىندا قحپ فراكتسياسىنىڭ جەتەكشىسى ماگەررام ماگەرراموۆ مەملەكەت باسشىسىنىڭ باستاماسىمەن جۇزەگە اسىرىلىپ جاتقان رەفورمالار ازاماتتاردى بەلسەندى ارەكەتكە, سونداي-اق ەلدەگى شەشىم قابىلداۋ ۇدەرىسىنە جاپپاي قاتىسۋعا ىنتالاندىراتىنىن اتاپ ءوتتى.
دەپۋتات يرينا سميرنوۆا كونستيتۋتسيانىڭ تولىق جاڭارتىلعان پرەامبۋلاسىن ەرەكشە اتاپ ءوتتى. دەپۋتات اسىلبەك نۇرالين ەلدىڭ جاڭا كونستيتۋتسياسى ەڭبەك ەتۋ قۇقىعىن قامتاماسىز ەتەتىنىنە, بۇل قۇقىق قازاقستان حالىق پارتياسىنىڭ سايلاۋالدى باعدارلاماسىندا بەكىتىلگەنىنە نازار اۋداردى.
كەنجەعۇل سەيتجان ازاماتتاردىڭ قۇقىقتارى مەن بوستاندىقتارىن نەگىزگى قۇندىلىق دەپ سانايتىن مەملەكەتتىك ساياساتتى الەۋمەتكە باعدارلانعان ساياسات دەپ جوعارى باعالادى. دەپۋتات يسلام سۇڭقار وتىرىس بارىسىندا ۇسىنىلىپ وتىرعان جاڭا كونستيتۋتسيا ەلىمىزدىڭ جاڭا عىلىمي جانە يننوۆاتسيالىق باعىتىن ايقىندايتىنىن اتاپ ءوتتى.
سونداي-اق ءماجىلىس دەپۋتاتى, «اۋىل» پارتياسى فراكتسياسىنىڭ توراعاسى سەرىك ەگىزباەۆتىڭ جەتەكشىلىگىمەن وتكەن فراكتسيا وتىرىسىندا كونستيتۋتسيانىڭ جاڭا جوباسى مەن وعان ەنگىزىلگەن وزگەرىستەر كەڭىنەن تالقىلانىپ, ماڭىزدى قۇجاتتى ەل ىشىندە بەلسەندى ءتۇسىندىرۋ جۇمىستارىنىڭ قاجەتتىلىگى ايتىلدى.
س.ەگىزباەۆ جينالعان قاۋىمدى ەل بولاشاعى ءۇشىن ماڭىزدى قۇجاتتىڭ باسىم باعىتتارىمەن تانىستىرىپ, ۇسىنىلعان كونستيتۋتسيا جوباسىن مۇقيات زەردەلەۋگە جانە شىندىققا سايكەس كەلمەيتىن ارانداتۋشىلىق جاريالانىمداردىڭ ىقپالىنا تۇسپەي, تەك رەسمي قۇجاتقا سۇيەنە وتىرىپ, سىندارلى پىكىر قالىپتاستىرۋعا شاقىردى.
«اۋىل» فراكتسياسىنىڭ دەپۋتاتتارى اتا زاڭ جوباسىن ءبىراۋىزدان قولداپ, ونىڭ قۇقىقتىق مەملەكەتتى نىعايتۋ مەن ەلىمىزدىڭ ودان ءارى دامۋى ءۇشىن ماڭىزدىلىعىن اتاپ ءوتتى.
جاڭا كونستيتۋتسيا بويىنشا ناقتى شەشىمدى حالىق جالپىۇلتتىق رەفەرەندۋمدا قابىلدايدى.