وسكەمەندىك شەبەر يۋري كوستانيان اعاشتان قازاق حاندارى مەن باتىرلارىنىڭ ءمۇسىنىن جاسايدى. ول بۇل ىسپەن 70-تەن اسقان شاعىندا دا تۇراقتى اينالىسىپ ءجۇر. شەبەردىڭ ايتۋىنشا, اعاش ءمۇسىن قاشاۋ توقتاۋسىز ەڭبەك پەن ءتوزىمدى تالاپ ەتەدى.
يۋري كوستانياننىڭ مۇراجاي-ءۇيى اعاش مۇسىنگە تولى. مۇندا 400-دەن اسا ەكسپونات بار. تۋىندىلارىنىڭ باسىم بولىگى قازاق تاريحىنا ارنالعان. شەبەردىڭ ەڭبەكتەرى شەتەلگە دە شىققان. ول 12 جىل بۇرىن پاريجدە كورمە وتكىزىپ, ونەرسۇيەر قاۋىمدى تاڭعالدىرعان. قازىر ونىڭ كەي مۇسىندەرىن ارنايى ىزدەپ كەلىپ, ساتىپ الاتىندار كوبەيگەن. باتىرلارمەن قاتار, كەنەسارى, ابىلاي, حاقنازار حانداردىڭ اعاشتان ويىلعان بەينەلەرى دە نازار اۋدارارلىق. شەبەر شىڭعىس حان جانە ونىڭ ۇرپاقتارىنا قاتىستى دا تۋىندىلار جاساعان.