ويىل ورمان جانە جانۋارلار دۇنيەسىن قورعاۋ مەكەمەسىنىڭ ماماندارى بارقىن قۇمىندا قاڭتار-اقپان ايلارىندا قاراعاي بۇرشىكتەرىن جينايدى. قانار قاپشىقتارعا تولتىرىلعان بۇرشىكتەر جىلى جەردە كەپتىرىلىپ, اراسىنان قاناتشا پىشىندەس داندەرى ىرىكتەلەدى.
قاراعاي تۇقىمىن الۋ مۇنىمەن بىتپەيدى. قاناتشالار ودان ءارى تازارتىلىپ, ىشىنەن داندەرىن ءبولىپ الادى. «جينالعان تۇقىم ورمان شارۋاشىلىعى مەكەمەسىنىڭ تالىمباعىندا سەبىلەدى. قىلقان جاپىراقتىلار وتە باياۋ وسەدى. ءبىر ءداننىڭ كوكتەپ, كوشەتكە اينالۋى ءۇشىن كەمىندە ءتورت جىل كەرەك. وسى ۋاقىت ىشىندە جاس وسكىندى باسقا جەرگە كوشىرۋگە بولمايدى. بويى ءوسىپ, تامىرى بەكىگەن سوڭ ءتورت جىلدان كەيىن تالىمباقتىڭ كوشەتتەر بولىمىنە اۋىستىرامىز. ورمانشىلارىمىز قاراعاي بۇرشىگىن جيناۋدى جەلتوقساننىڭ سوڭىنان باستايدى. بارقىن قۇمدارىندا 19 مىڭ گەكتار القاپتا ءوسىپ تۇرعان قىلقان جاپىراقتى اعاشتار توعايى ءحىح عاسىردىڭ سوڭىندا ويىل ورمان بەكىنىسى سالىنعاندا وتىرعىزىلعان. ەكى عاسىرعا جۋىق وسى اعاشتار تامىر جايدى, شەكاراسىن كەڭەيتتى. قۇم استىنداعى تۇششى سۋ قورى دا بەتىندەگى وسىمدىكتەردىڭ كوبەيۋىنە اسەر ەتىپ تۇر. 90-جىلداردىڭ توقىراۋىندا تابيعات قورعاۋ مەكەمەسى توزىپ كەتكەنىمەن, كەيىنگى جىلدارى وسى سالادا جاقسى بەتبۇرىس بولىپ جاتىر. ءبىزدىڭ مەكەمە ماماندارى دا ورمان ەكپەلەرىن اعاش تۇقىمدارىنان كوبەيتەدى», دەيدى ويىل ورمان جانە جانۋارلار دۇنيەسىن قورعاۋ مەكەمەسىنىڭ باسشىسى سەرىك مۋسين.
قىس ورتاسىندا تۇقىم شاشاتىن قىلقان جاپىراقتىنىڭ قاناتشالارىن جيناۋ وڭاي ەمەس. ويىل ورمانشىلارى ەكى ايدا 800–1000 كيلو بۇرشىك جيناپ, تازارتا كەلە الىناتىن تازا ءداننىڭ سالماعى 8-10 كيلوگرامنان اسپايدى ەكەن. جۇمىس تۇگەلدەي قولمەن اتقارىلادى. بارقىن قۇمدارىندا قىلقان جاپىراقتىلاردىڭ تۇقىمدارىن جيناۋ جۇمىسى وسىلايشا قىزىپ تۇر.
اقتوبە وبلىسى,
ويىل اۋدانى