ۇكىمەتتە پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعاريننىڭ توراعالىعىمەن وتكەن جيىندا الەۋمەتتىك ماڭىزى بار ازىق-ت ۇلىك تاۋارلارى باعاسىنىڭ اپتا ىشىندەگى ديناميكاسى قارالدى. تالداۋ ناتيجەسى كورسەتكەندەي, الەۋمەتتىك ماڭىزى بار ازىق-ت ۇلىك باعاسى وسكەن جوق.
جەكەلەگەن تاۋارلار بويىنشا باعا تومەندەگەنى بايقالدى. ماسەلەن, الما (-2,1%), قيار مەن پياز (-1,3%), شاي (-0,9%), بالىق پەن تاۋىق ەتى (-0,6%) ارزانداعان. وسىعان قوسا باسقا دا بىرقاتار ازىق-ت ۇلىك ونىمدەرىندە تومەندەۋ تىركەلگەن. ال ماۋسىمدىق سيپاتقا يە كوكونىستەر بويىنشا باعا قۇبىلمالى بولىپ وتىر.
ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆا اۋىل شارۋاشىلىعى ونىمدەرىنىڭ ەرتە پىسەتىن تۇرلەرىن جەتكىزۋگە قاتىستى قابىلدانىپ جاتقان شارالار جونىندە باياندادى. ونىڭ ايتۋىنشا, نارىقتا ۇسىنىستى كوبەيتۋ ءۇشىن بيىل ءساۋىر-ماۋسىم ايلارى ارالىعىندا ءۇشىنشى ەلدەردەن كوكونىستەردى باجسىز اكەلۋ تۋرالى ۇسىنىس ەاەو كەڭەسىنىڭ قاراۋىنا شىعارىلماقشى. بۇل – باعا تۇراقتىلىعىن قامتاماسىز ەتۋ باعىتىنداعى قوسىمشا قادامداردىڭ ءبىرى.
كەڭەس بارىسىندا ۆيتسە-پرەمەر استانا مەن الماتى قالاسى اكىمدەرىنىڭ ورىنباسارلارىن تىڭداپ, وڭىرلەردەگى اعىمداعى جاعدايعا جەكە-جەكە توقتالدى. ەلوردادا ازىق-ت ۇلىك ينفلياتسياسىنىڭ باياۋلاۋ ءۇردىسى ساقتالىپ, 2025 جىلدىڭ قورىتىندىسى بويىنشا الەۋمەتتىك ماڭىزى بار تاۋارلاردىڭ ورتاشا باعا يندەكسى 107,4% دەڭگەيىندە قالىپتاسقان. بۇل ەل بويىنشا ەڭ تۇراقتى كورسەتكىشتەردىڭ ءبىرى سانالادى. باعانى ۇستاپ تۇرۋعا ۋاقتىلى كەلىسىمشارتتار جاساۋ مەن ءىرى ساۋدا جەلىلەرىمەن ساۋدا ۇستەمەسىن شەكتەۋ جونىندەگى كەلىسىمدەر سەپ بولعان. ەلوردادا بۇگىندە 180-نەن استام ساۋدا نۇكتەسى الەۋمەتتىك تاۋارلاردى ساتادى. سونىمەن قاتار دەلدالدىق سحەمالاردى انىقتاۋ, جارمەڭكەلەر سانىن ارتتىرۋ باعىتىنداعى شارالار جالعاسىپ جاتىر. 2026 جىلى استانادا 300-دەن استام دەمالىس كۇنگى جارمەڭكە وتكىزۋ جوسپارلانعان, ال جالپى ەل بويىنشا 10 مىڭعا جۋىق جارمەڭكە ۇيىمداستىرىلادى.
الماتى قالاسىندا 2025 جىلدىڭ قورىتىندىسى بويىنشا الەۋمەتتىك ماڭىزى بار ازىق-ت ۇلىك تاۋارلارىنىڭ باعا يندەكسى 8,9%-دى قۇراعان, ال جىل باسىنان بەرى ءوسىم نەبارى 0,2% دەڭگەيىندە. قالادا ەت پەن ءسۇت ونىمدەرىنىڭ نەگىزگى تۇرلەرى بويىنشا باعا تۇراقتى, ال تاۋىق ەتى مەن جەكەلەگەن ءسۇت ونىمدەرى ارزانداعان. باعانىڭ ءوسۋى كوبىنە كوكونىستەر مەن باكالەيا تاۋارلارىنا تيەسىلى. دەگەنمەن الماتىدا قىرىققابات پەن قاراقۇمىق جارماسىنىڭ باعاسى رەسپۋبليكالىق ورتاشا كورسەتكىشتەن تومەن. قالا بيلىگى باعانى تۇراقتاندىرۋعا تىكەلەي جەتكىزۋ تىزبەگىن كەڭەيتۋگە, دەمالىس كۇنگى جارمەڭكەلەر سانىن ۇلعايتۋعا جانە ساۋدا جەلىلەرى مەن بازارلاردا باعا مونيتورينگىن كۇشەيتۋگە دەن قويىپ وتىر.
جيىندى قورىتىندىلاي كەلە, سەرىك جۇمانعارين وڭىرلەردەگى جۇمىستى جانداندىرۋدى تاپسىردى. ول اۋماقتىق ساۋدا مەن تۇتىنۋشىلاردىڭ قۇقىقتارىن قورعاۋ دەپارتامەنتتەرىنە الەۋمەتتىك ماڭىزى بار تاۋارلارعا بەلگىلەنگەن شەكتى ساۋدا ۇستەمەسىنىڭ ساقتالۋىن قاتاڭ باقىلاۋدى ءارى مونيتورينگتى كۇشەيتۋدى مىندەتتەدى.