ۇلى اعارتۋشى ىبىراي التىنسارين: «حالىق مەكتەپتەرى ءۇشىن مۇعالىم ءبارىن جاسايدى. بارلىعى مۇعالىمگە, ونىڭ پەداگوگيكالىق جۇمىسقا دايىندىعىنا, ءوز ءىسىن جاقسى كورۋىنە بايلانىستى. مۇعالىم – مەكتەپتىڭ جۇرەگى» دەگەن بولاتىن. ال پەداگوگيكا سالاسىنداعى زامانىمىزدىڭ ءىرى تەورەتيگى شالۆا اموناشۆيلي: «ءبىلىم سالاسىنا رەفورما مۇعالىمنەن باستالۋى كەرەك» دەيدى. الەمدەگى دامىعان وزىق وتىز ەلدىڭ قاتارىنان ورىن الۋعا ۇمتىلىپ وتىرعان ەلىمىزدە ەڭ الدىمەن ءبىلىم سالاسى باسەكەگە قابىلەتتى بولۋى ءتيىس. باسەكەگە توتەپ بەرمەي, توپتى جارۋ وڭاي بولمايدى. «ورلەۋ» بىلىكتىلىكتى كوتەرۋ ۇلتتىق ورتالىعىنىڭ جۇمىس ىستەگەنىنە ءۇش جىل بولدى. بالاباقشا تاربيەشىسىنەن باستاپ, جوعارى وقۋ ورنى وقىتۋشىسىنا دەيىنگى ءبىلىم سالاسى قىزمەتكەرلەرىنىڭ بىلىكتىلىگىن كوتەرۋ جۇمىستارى وسى ورتالىق ارقىلى مۇمكىن بولادى.
بيىل رەسپۋبليكالىق «ورلەۋ» بىلىكتىلىكتى كوتەرۋ ۇلتتىق ورتالىعىنىڭ «پەداگوگيكا قىزمەتكەرلەرىنىڭ بىلىكتىلىگىن ارتتىرۋ: بۇگىنگى احۋالى, تاجىريبە, بولاشاعى» اتتى حالىقارالىق عىلىمي-پراكتيكالىق كونفەرەنتسياسى قوستانايدا ءوتتى. وعان قازاقستاننىڭ بارلىق وبلىستارىنان جانە رەسەيدەن, اۆستراليادان جانە قىرعىزستاننان مۇعالىمدەر, پەداگوگ-عالىمدار قاتىستى.
كونفەرەنتسيا جۇمىسى «ءورلەۋ» بىلىكتىلىكتى كوتەرۋ ۇلتتىق ورتالىعى قوستاناي فيليالىنىڭ وسى شاراعا ارنايى جاساعان كورمەسىنەن باستالدى. كونفەرەنتسيا قوناقتارى كورمەدەن قوستاناي وبلىسىنداعى مەكتەپتەردە ادىستەمە جۇمىستارىنىڭ قانشالىقتى جاقسارعاندىعى, ۋاقىت تالابىنا ساي ءبىلىم ساپاسىن, مۇعالىم بىلىكتىلىگىن كوتەرۋدە ەنگىزىلگەن جاڭالىقتار, پەداگوگتار ىزدەنىسى, شىعارماشىلىعى جونىندە مول ماعلۇمات الدى. جالپى حالىقارالىق ءىرى كونفەرەنتسيانىڭ قوستانايدا ءوتۋى دە كەزدەيسوق ەمەس. «ورلەۋ» بىلىكتىلىكتى كوتەرۋ ۇلتتىق ورتالىعىنىڭ قوستاناي وبلىستىق فيليالى رەسپۋبليكادا بارلىق كورسەتكىشتەر بويىنشا ءۇش جىلدان بەرى الدىنا قارا سالماي الدا كەلەدى.
كونفەرەنتسيادا «ورلەۋ» بىلىكتىلىكتى كوتەرۋ ۇلتتىق ورتالىعى» اكتسيونەرلىك قوعامىنىڭ باسقارما ءتورايىمى, پەداگوگيكا عىلىمدارىنىڭ دوكتورى, پروفەسسور گۇلناز احمەتوۆا بىلىكتىلىكتى كوتەرۋ ۇلتتىق ورتالىعىنىڭ جەتىستىكتەرى مەن شەشىمىن كۇتكەن مىندەتتەر تۋرالى بايانداما جاسادى. وسى ۇلكەن جيىنعا قاتىسقاندار ەكى كۇن بويى مۇعالىم بىلىكتىلىگىن كوتەرۋدەگى ءتۇيىندى ماسەلەلەردى تالقىلادى. بۇگىنگى ۋاقىت ىرعاعى ءبىلىم سالاسىندا تۇيىقتالىپ قالماۋدى تالاپ ەتەدى. شەتەلدەردەگى وزىق تاجىريبەلەر كورسەتىپ وتىرعانداي, ءبىلىم سالاسى قىزمەتكەرلەرىنىڭ بىلىكتىلىگىن كوتەرۋدەگى جاڭا ۇلگىنىڭ تۇجىرىمدامالىق نەگىزى مۇعالىمدى ءومىر بويى وقۋعا, ءبىلىمىن جەتىلدىرىپ, بىلىكتىلىگىن كوتەرىپ وتىرۋعا باعىتتايدى. قازىر قوعامدا ادامدارعا تەوريالىق بىلىممەن قارۋلانۋ از, ول ومىرگە بەيىم, دايىندىعى مىقتى, ياعني شىعارماشىلىقپەن ويلاي الاتىن, بەلسەندى, ءوزىن ءوزى دامىتىپ وتىراتىن بولعاندا عانا بەلگىلى ناتيجەگە قول جەتكىزەدى. سوندا عانا ۇستاز شاكىرتىمەن جۇيەلى جانە جان-جاقتى جۇمىس جۇرگىزە الادى. بىلىكتى ۇستاز وقۋشىنىڭ ءوز بەتىنشە ءبىلىم الۋعا, ىزدەنۋگە, تالداي, تۇجىرىمداي بىلۋگە بۇلاق كوزىن اشا الاتىنداي قاسيەتكە يە بولادى.
– رەسپۋبليكاداعى بىلىكتىلىكتى كوتەرۋ جۇيەسى تاريحىندا ءبىرىنشى رەت وقۋ-ادىستەمەلىك كەشەندەر جاسالدى. ونىڭ قۇرامىنا كۋرستاردىڭ جاڭارتىلعان مازمۇنى جانە باقىلاۋ-باعالاۋ ماتەريالدارى ەندى. ياعني, بۇل ءوز بەتىنشە العان ءبىلىمىن تەست ارقىلى تەكسەرۋگە, تاپسىرمالار الىپ وتىرۋعا مۇكىندىك بەرەدى, – دەدى گۇلناز احمەتوۆا. – بىلىكتىلىكتى كوتەرۋ جۇيەسىنىڭ يننوۆاتسيالىق جۇمىستارىنداعى كەلەسى باعىتتىڭ ءبىرى ۇشتىلدىلىك بولىپ وتىر. ەلباسى تاپسىرعانداي, جاس ۇرپاق ءۇش ءتىلدى ءبىلۋى ءتيىس. ونى جۇزەگە اسىرۋ تيىمدىلىگىن ارتتىرۋ ءۇشىن, ەقىۇ-نىڭ ىقپال ەتۋىمەن «ورلەۋ» بىلىكتىلىكتى كوتەرۋ ۇلتتىق ورتالىعى ءتىل مەن كەز كەلگەن ءپاندى بىرىكتىرىپ وقىتاتىن «CLIL» ادىستەمەسىن ەنگىزىپ وتىر. ءبىر ءپاندى ەكى تىلدە جۇرگىزەتىن ۇستازدار دايىنداۋ تاجىريبەسى بىزدە بار. بولاشاقتا جوعارى وقۋ ورىندارىندا پاندەردى ستۋدەنتتەرگە اعىلشىن تىلىندە بەرۋ ءۇشىن «ورلەۋ» پەداگوگيكالىق جوعارى وقۋ ورىندارىنىڭ وقىتۋشىلارىن شەتەلدىك ارىپتەس ءبىلىم وردالارىنا وقىتۋعا دايىندىق جۇمىستارىن جۇرگىزۋدە. جالپى قازىرگى ۋاقىت ءومىردىڭ قاي سالاسى بولسىن شەتەلدەردىڭ تاجىريبەسىمەن تانىسۋدى, وزىعىنان ۇيرەنۋدى تالاپ ەتەدى. سوندىقتان «ورلەۋ» بىلىكتىلىكتى كوتەرۋ ۇلتتىق ورتالىعى فيليالدارىنىڭ 311 قىزمەتكەرى فرانتسيا, وڭتۇستىك كورەيا, اۆستراليا, سينگاپۋر, انگليا مەن رەسەيدە ءبىلىم بەرۋ جۇيەسىن دامىتۋدىڭ وزەكتى پروبلەمالارى بويىنشا ءبىلىمىن كوتەرىپ كەلدى.
مۇعالىمدەر بىلىكتىلىگىن كوتەرۋ جۇيەسىن جاڭعىرتۋدىڭ ءتيىمدى جولدارىنىڭ ءبىرى سانالاتىن قىسقا مەرزىمدى كۋرستار «ورلەۋدىڭ» بارلىق فيليالدارىندا بار. ولاردا دەڭگەيلىك باعدارلامالار بويىنشا حالىقارالىق كەمبريدج ۋنيۆەرسيتەتى سەرتيفيكاتى بار 238 ترەنەر جۇمىس ىستەيدى. وتكەن جىلى «ورلەۋ» فيليالدارىندا دەڭگەيلىك باعدارلاما بويىنشا 11239 مۇعالىم سەرتيفيكات الدى.
– سەرتيفيكات مۇعالىمنىڭ بىلىكتىلىگىن عانا ەمەس, ايلىق جالاقىسىنىڭ دا كوتەرىلۋىنە سەبەپ بولادى. مەملەكەت ءبىرىنشى رەت بىلىكتىلىگى جوعارىلاعان ۇستازداردىڭ ايلىق جالاقىسىن كوتەرۋگە قارجى سالىپ وتىر. بۇل مەملەكەت تاراپىنان ءبىلىم بەرۋ سالاسىنا جاسالعان تاعى ءبىر تەڭدەسسىز قامقورلىق ەكەنى ءسوزسىز, – دەدى گۇلناز احمەتوۆا.
كونفەرەنتسيادا «ورلەۋدىڭ» بارلىق وڭىرلەردەگى فيليالدارى كۇشىن بىرىكتىرۋ, ولارداعى جاڭالىقتاردى, جاقسى ءتاجىريبەلەردى تاراتۋ ماسەلەلەرى قارالدى. «ءورلەۋ» بىلىكتىلىكتى كوتەرۋ ۇلتتىق ورتالىعىنىڭ ءۇش جىلداعى باستى جەتىستىكتەرىنىڭ ءبىرى – مۇعالىم ىزدەنىسىنە جول اشتى. بۇگىندە ۇستاز ءوزىنىڭ ءبىلىمىن, بىلىكتىلىگىن كوتەرۋ ءۇشىن قايدا بارىپ وقيمىن دەسە دە مۇمكىندىك تابادى. ون-لاين سەمينارلارعا, حالىقارالىق كونفەرەنتسيالارعا, بايقاۋلارعا قاتىسقىسى كەلسە بارلىعى دا «ءورلەۋ» ارقىلى جۇزەگە اسادى.
ءيا, «ورلەۋ» العا ۇمتىلعان ۇستازدى ورگە سۇيرەيدى.
ءنازيرا جارىمبەتوۆا,
«ەگەمەن قازاقستان».
قوستاناي.