23 قاڭتاردا بۇكىل الەمدە قولمەن جازۋ كۇنى تويلانادى. بۇل اتاۋلى كۇندى جازۋ قۇرالدارىن وندىرۋشىلەر قاۋىمداستىعى ەنگىزگەن. باستاماشىلار بۇل كۇنى بارلىق تەحنولوگيالىق قۇرىلعىلاردى جيىستىرىپ قويىپ, قولمەن جازۋعا كەلىسكەن. الايدا ازىرگە بۇل مۇمكىن بولماي تۇر.
زامان العا جىلجىپ, تەحنولوگيا تەرەڭدەگەن سايىن قولمەن جازۋدان قالىپ بارا جاتقاندايمىز. ءتىپتى بۇگىندە جازۋشىلاردىڭ ءوزى شىعارمالارىن كومپيۋتەر, نوۋتبۋك, باسقا دا قۇرىلعىلاردىڭ كومەگىمەن جازادى. اسىلىندە جازۋشىلاردىڭ ۇزدىك جەتىستىكتەرى – سوڭىنا قالدىرعان كىتاپتارى عانا ەمەس, قولجازبالارى. الەمدە اتاقتى جازۋشىلاردىڭ قولجازبا قاعازدارى قۇندى مۇرا سانالادى. ولاردىڭ تۋىندىلارىنىڭ ءباسىن بيىكتەتەتىن دە – وسى قولجازبالار. ال قازىرگى قالامگەرلەردىڭ قولجازباسى بار ما؟ بولسا دا, ساۋساقپەن سانارلىقتاي عانا.
بۇرىنعى جازۋشىلار الدىمەن قويىن داپتەرىنە نە بلوكنوتقا جازاتىن. سوسىن بارىپ جازۋ ماشىڭكەسىندە تەرەتىن. ال قازىر قولمەن جازاتىندار سيرەك. بىردەن كومپيۋتەردىڭ پەرنەتاقتاسىنا باس قوياتىندار كوپ. كومپيۋتەرمەن تەرگەننىڭ ءبىر ءتيىمسىز تۇسى وي مەن جازۋ جىلدامدىعى ۇيلەسپەيدى. سونىڭ سالدارىنان وي شاتاسادى. كومپيۋتەردە جازىلعان شىعارمانىڭ جويىلىپ كەتۋ قاۋپى دە كوپ. ال قولمەن جازعان دۇنيە ەشقاشان جوعالمايدى. قانشاما قالامگەردىڭ مۋزەيلەردە قولجازباسىنىڭ ساقتالىپ تۇرعانى – سونىڭ ايعاعى.
ونىڭ ۇستىنە قولمەن جازۋ دەگەن ءبىر عانيبەت دۇنيە. ءسوزدىڭ دەنەڭنەن سۋىرىلىپ شىعىپ جاتقانىن بايقايسىڭ. ەرەكشە سەزىمگە بولەنىپ, قاعاز بەتىنە قالام جۇگىرتەسىڭ. وسىلايشا, جازۋدىڭ ءلاززاتىن جان-تانىڭمەن سەزىنەسىڭ. سونداي-اق جازۋ – ميدىڭ جاتتىعۋى. ول ميدى قارتايۋدان ساقتايدى. كەرەك اقپاراتتى كوشىرىپ جازۋ ونىڭ ەستە ۇزاق ساقتالۋىنا كومەكتەسەدى. ال قازىر قالامگەرلەردىڭ كوبى قالامىن پەرنەتاقتاعا ايىرباستادى. جازۋشى تۇگىلى بىلايعى ادامدار دا قولمەن جازعىسى كەلمەيدى. اسىرەسە ۆاتساپ جەلىسىندە جازىپ وتىرۋعا ەرىنىپ, اۋديو جىبەرە سالاتىندار كوبەيدى. بۇل دا بىرتىندەپ جازۋدى ۇمىتتىرىپ جاتىر. بالالار دا قولمەن جازۋدان قاشادى. بۇرىن مەكتەپتەردە كوركەم جازۋ ساباعى وتەتىن. سول ارقىلى بالالاردىڭ جازۋى شىڭدالاتىن. ال بۇگىندە شىرايىن شىعارىپ جازاتىندار شامالى. ويلاناتىن ماسەلەنىڭ ءبىرى – وسى.