ۇلتتىق قۇرىلتايدىڭ V وتىرىسىندا قابىلدانعان شەشىمدەر ەل دامۋىنا ايتارلىقتاي اسەر ەتەدى. ساياسي جۇيەدەگى بۇل وزگەرىستەر مەملەكەتتىك باسقارۋدا لاۋازىم يەلەرىنىڭ تاعدىرىن حالىقتىڭ ۇنىمەن, پىكىرىمەن بايلانىستىراتىن تەتىككە اينالماق. پارلامەنتتىڭ ەندىگى جەردە «قۇرىلتاي» دەپ اتالۋىنىڭ ءوزى ۇلتتىق ەرەكشەلىكتەن بولەك, سايلانعان ازاماتقا جاۋاپكەرشىلىك جۇكتەيدى دەگەن سەنىمدەمىن.
ال ۆيتسە-پرەزيدەنت لاۋازىمى ساياسي جۇيەنىڭ تۇراقتىلىعىنا ۇلەس قوسارى ءسوزسىز. مىسالى, كەزىندە پرەزيدەنت اكىمشىلىگىنىڭ جەتەكشىسى رەتىندە مەملەكەتتىك حاتشىلارمەن, مەملەكەتتىك كەڭەسشىلەرمەن جۇمىس ىستەدىم. بۇل جوعارى لاۋازىم بولعانىمەن, وكىلەتتىلىكتەرى كونستيتۋتسيادا تولىق انىقتالماعاندىقتان, بۇل ورىندار سوعان كەلگەن ادامنىڭ بەيىمدىلىگىنە قاراي بەلگىلى ءبىر فۋنكتسيالارمەن تولىقتىرىلىپ وتىردى. كەيدە ءتىپتى ولاردىڭ مەملەكەتتىك اپپاراتتىڭ ىشىندەگى ناقتى ورنى ايقىن بولماي ءجۇردى. ال ۆيتسە-پرەزيدەنت اتاۋىنىڭ ءوزى كورسەتىپ تۇرعانداي جاۋاپكەرشىلىگى دە, وكىلەتتىلىگى دە وتە جوعارى لاۋازىم. بۇل وزگەرىستەردىڭ ءبارى ساياسي جۇيە ورنىقتىلىعىن قامتاماسىز ەتەدى.
ەرەكشە ءبىر نازار اۋداراتىن تاعى ءبىر ماسەلە – كونستيتۋتسيالىق كوميسسيا قۇرۋ باستاماسى. كوميسسيا وزگەرىستەردى تەرەڭ تالداپ, حالىقتىڭ پىكىرىن ەسكەرە وتىرىپ, كونستيتۋتسيانىڭ جاڭا جوباسىن ازىرلەيدى. بۇنى «حالىق ۇنىنە قۇلاق اساتىن مەملەكەت» قاعيداتىنىڭ ءبىزدىڭ كونستيتۋتسيالىق رەفورماداعى كورىنىسى دەۋگە بولادى.
ءاليحان بايمەنوۆ,
مەملەكەت جانە قوعام قايراتكەرى