ۇلىتاۋ وبلىسىنىڭ قاراجال قالاسىنداعى مەشىت جانىنان ساۋات اشۋ ورتالىعى اشىلدى.
يسلام دىنىندە ءبىلىم الۋدىڭ ورنى ەرەكشە. قاسيەتتى حاديستە: ء«بىلىم الۋ – ءاربىر مۇسىلمان ەر مەن ايەلگە پارىز», دەپ ايتىلۋى دا ءىلىمنىڭ ادام ومىرىندەگى ماڭىزىن ايقىندايدى. وسى ۇستانىمدى باسشىلىققا العان جاڭا ورتالىق جاس ۇرپاقتىڭ ءدىني ساۋاتىن اشىپ, رۋحاني تاربيە بەرۋ جولىنداعى ماڭىزدى قادام بولىپ وتىر.
سالتاناتتى شاراعا ۇلىتاۋ وبلىسىنىڭ باس يمامى بەيبىت باقىتجان ۇلى قاتىسىپ, جاماعاتتى جاڭا ورتالىقتىڭ اشىلۋىمەن قۇتتىقتادى. ول ءوز سوزىندە مۇنداي ءبىلىم وشاقتارىنىڭ قوعام ءۇشىن ءمانى زور ەكەنىن, جاسوسپىرىمدەردىڭ دۇرىس باعىتتا ءتالىم-تاربيە الۋىنا ۇلەس قوساتىنىن جەتكىزدى.
جالپى اۋماعى 150 شارشى مەتردى قۇرايتىن عيماراتتا اسحانا, ۇستازدارعا ارنالعان جەكە كابينەت, سونداي-اق بالالارعا ارنالعان جاتىن ورىندار بار. بۇل شاكىرتتەردىڭ ءبىلىم الۋىمەن قاتار, قولايلى تۇرمىسىن جاساعان كەشەندى ورتالىق ەكەنىن كورسەتەدى.
جاڭا ساۋات اشۋ ورتالىعىنىڭ اشىلۋى – بۇگىنگى جاستاردىڭ ءدىني ساۋاتتى بولۋىنا ىقپال ەتەدى. بالالار مەن جاسوسپىرىمدەر تەك ءدىني ءبىلىم الىپ قانا قويماي, ىزگىلىككە, ۇلكەنگە قۇرمەت, كىشىگە ىزەت كورسەتۋگە تاربيەلەنەدى.
«مەشىت جانىنان اشىلعان بۇل ساۋات اشۋ ورتالىعى الداعى ۋاقىتتا قاراجال قالاسىنداعى ءدىني-اعارتۋشىلىق جۇمىستاردىڭ ماڭىزدى تىرەگىنە اينالماق. مۇندا شاكىرتتەر قۇران الىپپەسىن مەڭگەرىپ, رۋحاني-ادامگەرشىلىك باعىتتاعى تاعىلىمدى ءبىلىم الادى», دەدى قاراجال قالالىق «نۇر» مەشىتىنىڭ باس يمامى تالعات سوۆەتوۆ.
ۇلىتاۋ وبلىسى