سەنات دەپۋتاتتارىنىڭ وڭىرلەرگە ساپارلارى جالعاسىپ جاتىر. جەرگىلىكتى تۇرعىندارمەن, ۇجىمدارمەن كەزدەسكەن ولار حالىقتىڭ پىكىرىنە قۇلاق اسىپ, قوعامداعى قوردالانعان ماسەلەلەردى بىرگە تالقىلادى.
سەنات دەپۋتاتى ساكەن ارۋباەۆ جۇمىس ساپارىمەن جامبىل وبلىسىنىڭ جامبىل اۋدانىندا بولىپ, الەۋمەتتىك جانە ينۆەستيتسيالىق جوبالاردى ىسكە اسىرۋ بارىسىمەن تانىستى. ءالي اۋىلىندا جاسوسپىرىمدەرگە ارنالعان اۋداندىق كىتاپحانا مەن مۇراعاتتى جانە بوس ۋاقىت كەشەنىن ارالاپ كوردى. بۇل نىساندار بيۋدجەت قارجىسى ەسەبىنەن پايدالانۋعا بەرىلگەن جانە مادەني ورتانى دامىتۋعا, جاستاردى قولداۋعا, جۇمىس ورىندارىن اشۋعا باعدارلانىپ وتىر. دەپۋتات سونىمەن قاتار تۇرعىن ۇيگە كەزەكتە تۇرعان ازاماتتار مەن وتباسىلاردىڭ الەۋمەتتىك وسال توپتارى ءۇشىن 120 پاتەرلى تۇرعىن ءۇي قۇرىلىسىنىڭ بارىسىمەن تانىستى.
سەناتورلار امانگەلدى ەسباي مەن عالياسقار سارىباەۆ جەتىسۋ وبلىسىنىڭ پانفيلوۆ اۋدانىندا بولىپ, الەۋمەتتىك-ەكونوميكالىق جاعدايدى باقىلاپ, مەملەكەتتىك باعدارلامالاردى ىسكە اسىرۋ بارىسىن كوزبەن كورىپ قايتتى. جۇمىس ساپارى مەملەكەت باسشىسى ق.توقاەۆتىڭ جاقىندا «Turkistan» گازەتىنە بەرگەن سۇحباتىندا بەلگىلەنگەن مىندەتتەر اياسىندا ءوتتى. وندا وڭىرلەردىڭ تەڭگەرىمدى دامۋى, الەۋمەتتىك-ەكونوميكالىق تەڭسىزدىكتەردى قىسقارتۋ, حالىقتىڭ ءومىر ءسۇرۋ ساپاسىن ارتتىرۋ, سونداي-اق بيلىك ورگاندارىنىڭ ازاماتتاردىڭ ناقتى سۇرانىستارىن شەشۋگە باعىتتالۋىن كۇشەيتۋ ماسەلەلەرى قامتىلدى.
ال سەناتور تالعات ءجۇنىسوۆ اقمولا وبلىسىنداعى الەۋمەتتىك ينفراقۇرىلىم نىساندارىن ارالاپ, كراسنىي يار اۋىلىندا دەنساۋلىق ساقتاۋ جانە سپورت مەكەمەلەرىنىڭ قىزمەتىمەن تانىستى. مەملەكەتتىك باعدارلامالاردىڭ ىسكە اسىرىلۋىنا مونيتورينگ جۇرگىزۋ, الەۋمەتتىك نىسانداردىڭ قۇرىلىسى مەن جۇمىس ىستەۋ ساپاسىن باقىلاۋ, سونداي-اق تۇرعىندارمەن جانە ەڭبەك ۇجىمدارىمەن كەزدەسۋلەر وتكىزۋ ساپاردىڭ باستى ماقساتى بولدى. سپورتتىق ينفراقۇرىلىمدى دامىتۋعا ەرەكشە نازار اۋدارىلدى.
ساپار اياسىندا العاشقى مەديتسينالىق-سانيتارلىق كومەك ورتالىعىنا, سونداي-اق كوكشەتاۋ كوپسالالى اۋرۋحاناسىنىڭ پاللياتيۆتىك بولىمشەسىندە بولىپ, مەديتسينا قىزمەتكەرلەرىمەن كەزدەسۋ بارىسىندا مەديتسينالىق قىزمەتتەردىڭ ساپاسى مەن قولجەتىمدىلىگى, دارىلىك زاتتارمەن قامتاماسىز ەتىلۋى, كادر الەۋەتى جانە ەڭبەك جاعدايلارى ماسەلەلەرى تالقىلاندى.
سەنات دەپۋتاتتارى الىبەك ناۋتيەۆ پەن ساعىندىق لۇقپانوۆ اتىراۋ وبلىسىنداعى قىزىلقوعا اۋدانىنا ات باسىن بۇرىپ, اۋداندىق ءماسليحات دەپۋتاتتارى, قوعامدىق كەڭەس مۇشەلەرى, اۋىلدىق وكرۋگ اكىمدەرى, شارۋا قوجالىقتارىنىڭ وكىلدەرى جانە جەرگىلىكتى تۇرعىندارمەن كەزدەسۋلەر وتكىزدى. دەپۋتاتتار سەناتتىڭ بىلتىرعى جۇمىسى تۋرالى حاباردار ەتىپ, قابىلدانعان زاڭدار, سونداي-اق پارلامەنتتىك قىزمەتتىڭ نەگىزگى باعىتتارى تۋرالى ايتتى.
مەملەكەت باسشىسى ق.توقاەۆتىڭ «Turkistan» گازەتىنە بەرگەن سۇحباتىندا ايتقان تۇجىرىمدارعا ەرەكشە نازار اۋدارىلدى. پرەزيدەنت اۋىل شارۋاشىلىعى سالاسىن قارجىلاندىرۋدىڭ تيىمدىلىگىن ارتتىرۋ, مال شارۋاشىلىعى سالاسىنداعى جۇمىستى كۇشەيتۋ, سونداي-اق كووپەراتسيانى ودان ءارى دامىتۋ قاجەتتىگىن اتاپ وتكەنى ايتىلدى.
سەناتورلار ءالي بەكتاەۆ, مۇرات قادىربەك پەن اليشەر ساتۆالديەۆ تۇركىستان وبلىسىنىڭ ماقتاارال جانە جەتىساي اۋداندارىنا بارىپ, حالىقپەن كەزدەسۋلەر وتكىزىپ, بىرقاتار الەۋمەتتىك ماڭىزى بار ينفراقۇرىلىمدىق نىساننىڭ قىزمەتىمەن تانىستى. وڭىردەگى جۇمىس مەملەكەت باسشىسىنىڭ سۇحباتىندا بەلگىلەنگەن تاسىلدەردى ەسكەرە وتىرىپ قۇرىلدى. پرەزيدەنت ايتقانداي, وڭىرلىك دامۋدىڭ مازمۇندىلىعى جانە ىسكە اسىرىلىپ جاتقان جوبالاردىڭ – ينۆەستيتسيالىق باستامالاردان باستاپ, ازاماتتاردىڭ ءومىر ءسۇرۋ ساپاسىن ارتتىرۋعا تىكەلەي اسەر ەتۋگە ءتيىس الەۋمەتتىك باعدارلامالارعا دەيىنگى پراكتيكالىق قايتارىمدىلىعىنىڭ ماڭىزى ءسوز بولدى. وسىعان بايلانىستى سەناتورلار ءىرى ينۆەستيتسيالىق جوبالارعا دا, حالىقتىڭ كۇندەلىكتى قاجەتتىلىكتەرىنە تىكەلەي قاتىستى بازالىق ينفراقۇرىلىم مەن الەۋمەتتىك سالا ماسەلەلەرىنە دە نازار اۋداردى.
سونداي-اق ولار ماقتاارال اۋدانىنىڭ ەلدى مەكەندەرىندەگى سۋمەن جابدىقتاۋ جۇيەلەرىنىڭ جاي-كۇيىمەن تانىستى. تۇرعىنداردىڭ ورتالىقتاندىرىلعان اۋىزسۋمەن ءجۇز پايىز قامتاماسىز ەتىلۋىنە قاراماستان, بىرقاتار اۋىلدا توزعان جەلىلەردى جاڭارتۋ قاجەتتىلىگى ساقتالىپ وتىر. اقجول اۋىلىندا سەناتورلار سۋ قۇبىرى ينفراقۇرىلىمىن قايتا قۇرۋ بارىسىن تەكسەرىپ, سۋمەن جابدىقتاۋ جۇيەلەرىن جاڭعىرتۋدىڭ قادامدارىن تالقىلادى.
دەپۋتاتتار ارمان وتەعۇلوۆ پەن ءلاززات رىسبەكوۆا باتىس قازاقستان وبلىسىنىڭ قازتالوۆ اۋدانىنا باردى. ساپار بارىسىندا ولار الەۋمەتتىك ينفراقۇرىلىم نىساندارىنىڭ جاي-كۇيىمەن تانىسىپ, اۋىلدىق اۋماقتاردى دامىتۋدىڭ وزەكتى ماسەلەلەرىن تالقىلادى. قونىس اۋىلىنداعى 60 ورىندىق جالپى ءبىلىم بەرەتىن مەكتەپكە ات باسىن بۇرىپ, كەيىنگى جىلدارى اۋداندا ءبىلىم بەرۋ ينفراقۇرىلىمىن جاڭارتۋ شارالارى دايەكتى تۇردە ىسكە اسىرىلىپ جاتقانى اتاپ ءوتىلدى. ءتورت جىل ىشىندە بەس جاڭا مەكتەپ پايدالانۋعا بەرىلگەن. سەناتورلار وقۋ ورنىنىڭ ماتەريالدىق-تەحنيكالىق بازاسىمەن تانىسىپ, اۋىلدىق جەرلەردەگى ءبىلىم بەرۋ جۇيەسىن ودان ءارى دامىتۋ كەلەشەگىن تالقىلادى.
بۇعان قوسا سەناتور سۇلتان دۇيسەمبينوۆ جەتىسۋ وبلىسىنداعى سارقانت اۋدانىندا, سوۆەتبەك مەدەباەۆ ۇلىتاۋ وبلىسىندا, سۇيىندىك الداشەۆ پەن بەكبول ورىنباساروۆ اقتاۋ قالاسىندا بولىپ, ينفراقۇرىلىمدىق جانە عىلىمي-ەكولوگيالىق جوبالاردى ىسكە اسىرۋ بارىسىمەن تانىستى.
ماڭعىستاۋ وبلىسىنا بارعان دەپۋتاتتار مەملەكەت باسشىسىنىڭ تاپسىرماسى بويىنشا قۇرىلعان كاسپي عىلىمي زەرتتەۋ ينستيتۋتىنىڭ باسشىلىعىمەن كەزدەستى. جۇزدەسۋ بارىسىندا ينستيتۋتتىڭ ماتەريالدىق-تەحنيكالىق بازاسىن نىعايتۋ, سونداي-اق كاسپي تەڭىزى دەڭگەيىن مونيتورينگ جاساۋ, ءوڭىردىڭ ەكولوگيالىق جاعدايى جانە تەڭىز رەسۋرستارىن ۇتىمدى پايدالانۋ سالاسىنداعى عىلىمي جوبالاردى ىسكە اسىرۋ ماسەلەلەرى تالقىلاندى. جابدىقتاردى جاڭعىرتۋ جانە عىلىمي ينفراقۇرىلىمدى ودان ءارى دامىتۋ قاجەتتىگىن جەتكىزدى.