قىزىلوردادا شەتەلدەرمەن تاۋار قاتىناسى جىل سايىن ارتىپ كەلەدى. يندۋستريالىق-يننوۆاتسيالىق دامۋ باعدارلاماسى اياسىنداعى جوبالار سىرتپەن بايلانىستىڭ جاڭا كوزدەرىن اشۋدا. ءبىر عانا “باتىس ەۆروپا-باتىس قىتاي” اۆتوجولىنىڭ 800-دەن اسا شاقىرىمىن قۇرايتىن بولىگى وبلىستىڭ بارلىق اۋداندارىنان دەرلىك وتەدى. ال بۇل جول قۇرىلىسى قاجەتتى تاۋاردىڭ دا, ارنايى تەحنيكانىڭ دا تاسقىنىن مولايتۋدا. مۇنان باسقا, جەرگىلىكتى شيكىزات ونىمدەرىن وڭدەۋ مەن ۇسىنۋعا ارنالعان بيزنەس جوبالار دا جەتكىلىكتى. مىنە, وسىنداي ءىرى شارالاردىڭ سالماقتى جۇگىن جەڭىلدەتۋگە ەلەۋلى ۇلەس قوساتىن جاڭالىق – ارال جانە شيەلى اۋداندارىنىڭ ورتالىعىنداعى كەدەن بەكەتتەرىنىڭ اۆتوماتتاندىرىلۋى. بۇعان دەيىن بۇل بەكەت قىزمەتكەرلەرى جەرگىلىكتى كاسىپكەرلەرگە كەدەندىك رەسىمدەۋ جانە باقىلاۋ امالدارى بويىنشا كەڭەس بەرىپ قانا كەلسە, ەندى ولاردىڭ تاۋارىن وبلىس ورتالىعىنا تاسىماي, وسى جەردە رەسىمدەيتىن بولادى. جاڭاقورعان, شيەلى اۋداندارىنىڭ كاسىپكەرلەرى شيەلىنىڭ ورتالىعىنداعى, ال قازالى مەن ارال اۋدانىنىڭ سىرتقى ەلمەن تاۋار قاتىناتاتىن تۇلعالارى ارالدىڭ ورتالىعىنداعى كەدەن بەكەتتەرىنەن تاۋارىن رەسىمدەپ, كەلگەن جۇكتى بىردەن ءوز وندىرىسىنە ورنالاستىراتىن مۇمكىندىك الدى. كەدەندىك رەسىمدەۋ مەن باقىلاۋ امالدارىن جەتىك مەڭگەرگەن قىزمەتكەرلەر وسى بەكەتتەردە العاشقى رەسىمدەۋ امالدارىن جاساپ تا ۇلگەردى. شيەلىلىكتەر كەن ورنىنان الىناتىن سۇيىق ناتردى ەكسپورتتاسا, قازالىلىقتار يمپورتتالاتىن قۇرىلىس ماتەريالدارىن وتكىزىپ جاتىر.
كەدەنشىلەردىڭ الدىندا جانە ءبىر مىندەت – رەسىمدەۋدىڭ ءتيىمدى امالدارى مەن ادىستەرىن پايدالانۋ تۋرالى ولارعا كەڭەس بەرۋ, ناسيحات جۇرگىزۋ تۇر. كوپ ۇزاماي, ەلدەگى كاسىپكەرلەر ەلەۋلى جەڭىلدىكتى سەزىنەتىن بولادى.
ەڭ باستىسى, جەرگىلىكتى كاسىپكەردىڭ ۋاقىتى مەن قارجىسى ۇنەمدەلەتىن بولدى.
ەركىن ءابىل, قىزىلوردا.