كەلەسى جىلدىڭ اقپان ايىندا يتاليادا قىسقى وليمپيا ويىندارى باستالادى. ءدۇبىرلى الاماندا ەلىمىزدىڭ دەلەگاتسياسىن باستاپ, تۋ ۇستاپ شىعۋشى سپورتشىلار ءالى ناقتى انىقتالعان جوق دەپ جازادى Egemen.kz.
بۇعان دەيىن قىسقى وليمپيادانىڭ اشىلۋىندا تۋ ۇستاپ شىعاتىن سپورتشىلارعا قاتىستى الىپ-قاشپا, نەگىزسىز مالىمەت تاراعان ەدى. وسىنىڭ انىق-قانىعىن تۋريزم جانە سپورت مينيسترلىگى جانىنداعى قوعامدىق كەڭەستىڭ توراعاسى ەلسيار قاناعاتوۆتان سۇرادىق.
«2026 جىلى يتاليادا وتەتىن قىسقى وليمپيادانىڭ اشىلۋ سالتاناتىندا قازاقستاننىڭ تۋىن ۇستاپ شىعاتىن سپورتشىلار تۋرالى جاريالانعان اقپاراتتىڭ شىندىققا جاناسپايتىنىن مالىمدەيمىز. قازىرگى ۋاقىتتا تۋ ۇستاۋشىلاردى تاڭداۋ جونىندە ەشقانداي ناقتى شەشىم قابىلدانعان جوق.
قوعامدىق كەڭەستىڭ وتىرىسىندا ىقتيمال ۇمىتكەرلەر مەن ىرىكتەۋ كريتەريلەرى عانا تالقىلاندى. سوندىقتان بۇل اقپارات رەسمي سيپاتقا يە ەمەس. بۇقارالىق اقپارات قۇرالدارىندا ناقتى سپورتشىلاردىڭ اتى-ءجونىنىڭ اتالۋىن راستالماعان قاۋەسەت رەتىندە قابىلداۋ قاجەت.
تۋ ۇستاۋشىلارعا قاتىستى تۇپكىلىكتى شەشىمدى تۋريزم جانە سپورت مينيسترلىگى وليمپيادانىڭ باستالۋىنا جاقىن قالعاندا سپورتتىق جەتىستىكتەردى, وليمپياداعا دايىندىق دەڭگەيىن جانە ءتيىستى ىرىكتەۋ راسىمدەرىن ەسكەرە وتىرىپ جاريالايدى. ءبىز بۇقارالىق اقپارات قۇرالدارىن ۇلتتىق قۇرامانىڭ قۇرامى مەن تۋ ۇستاۋشىلار تۋرالى اقپاراتتى جاريالاۋ كەزىندە تەك رەسمي دەرەككوزدەرگە سۇيەنۋگە شاقىرامىز», دەدى ە.قاناعاتوۆ.