حالىقتىڭ ەلدەگى جاعدايعا كوڭىلى تولا ما؟

2025 جىلعى 1-10 قاراشا ارالىعىندا ەۋرازيالىق ينتەگراتسيا ينستيتۋتى ەلدەگى قوعامدىق كوڭىل-كۇي مەن ساياسي احۋالدى باعالاۋعا ارنالعان ساۋالناما وتكىزدى. زەرتتەۋ 17 وبلىس پەن رەسپۋبليكالىق ماڭىزى بار ءۇش قالانى قامتىدى. قالالىق جانە اۋىلدىق جەرلەردە تۇراتىن 18 جاستان اسقان 1 467 اداممەن بەتپە-بەت سۇحبات جۇرگىزىلگەن.

زەرتتەۋ ناتيجەسى مەملەكەت باسشىسىنىڭ جۇمىسىنا حالىقتىڭ باسىم بولىگى وڭ باعا بەرەتىنىن كورسەتتى. ساۋالناماعا قاتىسقانداردىڭ 78,5 پايىزى پرەزيدەنتتىڭ سوڭعى ءۇش ايداعى قىزمەتىن ءتيىمدى دەپ ەسەپتەيدى. ال 71,5 پايىزى قاسىم-جومارت توقاەۆتىڭ جاقىن ۋاقىتتا ەلدەگى جاعدايدى جاقسارتۋعا مۇمكىندىگى بار ەكەنىن ايتقان. ەگەر پرەزيدەنت سايلاۋى قازىر وتسە, رەسپوندەنتتەردىڭ 77,3 پايىزى قازىرگى مەملەكەت باسشىسىنا داۋىس بەرۋگە دايىن ەكەنىن بىلدىرگەن.

قوعامدىق-ساياسي اقپاراتقا قىزىعۋشىلىق تا بار. ازاماتتاردىڭ 52 پايىزى ەلدەگى ساياسي جانە ەكونوميكالىق جاڭالىقتاردى ۇنەمى باقىلاپ وتىرادى. اقپاراتتى قايدان الادى دەگەندە, تەلەديدار مەن الەۋمەتتىك جەلىلەر قاتار اتالادى. تەلەديداردى 52,7 پايىز پايدالانسا, Instagram-دى 51,2 پايىز قولدانادى. TikTok, WhatsApp, جاڭالىق سايتتارى مەن YouTube تە كەڭ تارالعان.

سونىمەن بىرگە ادامدار ءبىر-بىرىنەن دە اقپارات الادى. ەلدە نە بولىپ جاتقانىن رەسپوندەنتتەردىڭ شامامەن بەستەن ءبىرى تۋىستارىنان, دوستارىنان, ارىپتەستەرىنەن ەستيدى. بۇل رەسمي اقپاراتپەن قاتار اۋىزشا پىكىر الماسۋدىڭ دا ماڭىزى بار ەكەنىن اڭعارتادى.

ال سەنىم ماسەلەسىنە كەلگەندە جاعداي وزگەشە. اقپارات كوزى رەتىندە ەڭ كوپ سەنىم مەملەكەتتىك رەسپۋبليكالىق تەلەارنالارعا تيەسىلى. رەسپوندەنتتەردىڭ 41,8 پايىزى وسى ارنالارعا سەنەتىنىن ايتقان. الەۋمەتتىك جەلىلەر كۇندەلىكتى قولدانىستا الدا تۇرعانىمەن, سەنىم دەڭگەيى جاعىنان تەلەديداردان كەيىن ورنالاسادى. بۇل حالىقتىڭ رەسمي اقپاراتتى ءداستۇرلى ارنالاردان العاندى ءجون كورەتىنىن كورسەتەدى.

وڭىرلەردەگى قوعامدىق-ساياسي جاعداي دا نەگىزىنەن تىنىش دەپ باعالانعان. ساۋالناماعا قاتىسقانداردىڭ 87,3 پايىزى ءوز ايماعىنداعى احۋالدى تۇراقتى دەپ ەسەپتەيدى. تەك 9,7 پايىزى جاعدايدى شيەلەنىسكەن دەپ سانايدى, ال «وتە كۇردەلى» دەگەن پىكىردى ايتقاندار ءبىر پايىزدان دا از.

ەكونوميكالىق جاعدايعا كەلگەندە باعا ءبىرشاما ساق. ازاماتتاردىڭ 75,4 پايىزى ءوز وڭىرىندەگى ەكونوميكانىڭ قازىرگى جاي-كۇيىن وڭ باعالايدى. دەگەنمەن ءار بەسىنشى رەسپوندەنت جاعدايدى قيىن دەپ ەسەپتەيدى. بۇعان نەگىزىنەن ازىق-ت ۇلىك باعاسىنىڭ ءوسۋى مەن ينفلياتسياعا قاتىستى الاڭداۋشىلىق سەبەپ بولىپ وتىر. ياعني حالىقتىڭ كوڭىل كۇيى ەڭ الدىمەن كۇندەلىكتى شىعىن مەن تابىسقا بايلانىستى وزگەرەتىنىن بايقاۋعا بولادى.

ساياسي پارتيالاردى تانۋ دەڭگەيىندە Amanat پارتياسى الدا كەلەدى. ونى رەسپوندەنتتەردىڭ 62,4 پايىزى بىلەدى. ودان كەيىن «اق جول» مەن «اۋىل» پارتيالارى اتالادى. قالعان پارتيالاردىڭ تانىلۋ دەڭگەيى تومەنىرەك. بۇل حالىقتىڭ پارتيالارعا قىزىعۋشىلىعى بىركەلكى ەمەس ەكەنىن كورسەتەدى.

جالپى زەرتتەۋ ناتيجەسى قوعامدا تۇراقتىلىققا دەگەن سۇرانىس جوعارى ەكەنىن اڭعارتادى. حالىق ەلدەگى ساياسي جاعدايدى تىنىش دەپ قابىلدايدى. مەملەكەت باسشىسىنىڭ جۇمىسىنا وڭ كوزقاراس بار. بىراق باعا ءوسىمى مەن تۇرمىستىق ماسەلەلەر قوعامدىق كوڭىل كۇيگە تىكەلەي اسەر ەتەتىن نەگىزگى فاكتور بولىپ قالا بەرەدى.